Slide

Chapter 9: Dinner

NAKASAKAY NA SA BACKSEAT NG ITIM NA SASAKYAN SI VIRGO. Nasa driver's seat naman ang kanyang personal bodyguard na si Greg. Pagkatapos bigyan ang lalaki ng instructions kung ano ang gagawin, umusad na ang kotse patungo sa La Grilla. Tinted ang salamin ng sasakyan kaya halos hindi humahaplos sa kanyang mukha ang liwanag mula sa mga poste.

Kakalabas lang nila mula sa subdivision na tinitirahan ng mga Ferdinand nang mapansin niya sa salamin sa ibabaw ng dashboard ang pagsunod ng isang itim na sasakyan.

Nakalagpas na sila sa intersection pero hindi mawala-wala sa likuran ang kotse.

"Greg," kalmado niyang saad habang deretso na sa kalsada ang tingin niya, "paunahin mo nga 'yung mga sasakyan sa likuran natin. Let them overtake."

Gumalaw ang mga mata ni Greg, sinigurado na hindi lalabag sa batas-trapiko ang gustong mangyari ni Virgo bago sinunod ang utos.

Tulad ng inaasahan, may mga sasakyang walang anu-anong nag-overtake. Nanatili sa likuran nila ang itim na kotse na kanina pa niya napapansin. Mukhang nakahalata na rin si Greg.

"Ilang minuto na siyang nakasunod, Sir?" anito, walang bahid ng anumang panic sa boses ng bodyguard niyang sanay na sa trabaho nito.

"Simula nung nakalabas tayo sa subdivision. 'Yan 'yung sasakyang nasa gilid ng gate na hinintay na makalabas itong kotse bago umusad."

"Sharp eye," seryoso nitong saad.

"Alam mo naman na kailangan kong maging alerto. Lalo na sa posisyon ko ngayon, Greg."

Hindi na ito umimik pa. Mukhang nasa malalim nang pag-iisip ang binata kung paano magagampanan ang trabaho nito na protektahan siya.

"Ang mabuti pa, Sir," sa wakas ay instruksyon ni Greg, "sa main entrance ng La Grilla ko na kayo ibaba."

"People will see me," aniya. "They'll recognize me."

"Buhay mo ang nakasalalay dito, Sir."

Hindi man halata, pero isa si Greg sa mangilan-ngilang tao na tumitiklop si Virgo. Sa loob ng maraming taong tapat na serbisyo ng bodyguard, wala nang pagdadalawang-isip pa si Virgo pagdating sa mga desisyon nito. Ganoon kalabis ang kanyang tiwala rito.

"At ano naman ang gagawin mo?"

"Ililigaw sila," anito. "Babalikan ko kayo after thirty minutes."

"Thirty minutes?"

"Estimate, Sir. Baka mapalaban ako."

Kampanteng sumandal si Virgo sa kanyang kinauupuan. "Sana malaman mo rin kung sino 'yang bumubuntot sa atin."

"Susubukan ko, Sir."

Sinabihan man niya ng ganoon si Greg, may palagay na si Virgo kung sino ang lulan ng kotseng nakabuntot sa kanila.

Greg began eating up a faster pace on the road. Mabilis na nagpalipat-lipat ito ng pwesto. Kakabig sa kaliwa, kakabig sa kanan, sisingitan ang bawat sasakyang may bukas na espasyo sa kanilang lane na kayang magpadaan ng dalawang magkatabing sasakyan sa iisang linya.

Halos hindi alisin ni Virgo ang paningin sa salamin. He had to keep track of that car. Unti-unti na itong nawawala sa kanilang likuran, nahaharangan ng ilang mga sasakyan na ayaw nang magpasingit sa iba matapos nila masingitan ang mga ito.

Hanggang sa abot-tanaw na nila ang La Grilla. Mabilis na binaba siya ni Greg sa main entrance, walang tanong-tanong na nagmadali siya sa entrance. Nilabas agad ni Greg ang sasakyan sa vicinity ng establisyemento para palabasin na umikot lang ito roon at wala sa kanila ang bumaba sa club.

Habang kinakapkapan, dama niya ang matamang titig ng bouncer na doble yata ang laki ng katawan sa kanya. Nangingilala ang tingin nito at mukhang hindi nakatiis.