10
بعدت الافكار من بالي منو يكول متزوجه اساسا الولد مبين عمره صغير وهي كبيره رغم مو مبيين عليها العمر اكيد اكو غلط
رجعت للبيت بالليل متأخر صرت اتعب من الدوام وارتاح بمجرد مااشوفها وهي مبتسمه ومحضره احلى الأجواء اتعشه وابدل وارتاح وبعدها ننزل شويه يم اهلي
وهي وياي تنزل شويه ..وبعدها تصعد تكمل قرايه مرات اصعد وياها مرات ابقه اخليها تكمل قرايتها لو ساعه بس ماأريد اشغلها
من تبقه جوه ابويه يحير شيسمعنه كلام او يقصدها هي بالذات
اما يعقب ع طعم الچاي الي مسويته رغم اني وامي وفرقد نكله طييب وهو يحجي ع امي انتي سويلي بأيدج الي سوته متعرف تسوي يعني متعمد يسمعها ميريد يضوك شي من ايدها
صرت
اتحمل واعدي كلشي
وهي خطيه متشكي بس اشوفها تضوج وعيونها تنملي دموع وتصعد قبلي ومن
اصعد وراها تستقبلني كأنها مسمعانه شي واكعد اني اعتذر منها واطلب تتحمل الخاطري او اذا متريد تضوج عادي لتنزل من انزل اني خلي تتجنبه بوجودي
اني احس هو يريد يضوجني الي من يسمعها كلام ويغثها بوجودي
صرت اسألها بغيابي شلون يعاملها تكلي لتخلي ابالك كلشي طبيعي صدفه صارت
اتعودت ع هاالمعامله الي والها رغم ابد مشايف ابويه هيج هو من النوع الي يحترم ولده قبل الزواج وبعده ويحترم البنات حيل ويكول الكنه من اجت البيتنه صارت بنتنه بعد
ماادري ليش غير مبادئه عقاب الي لأن حس محترمته بزواجي لو هو حظي وحظها هي الي متجي وياها عدل
شكد ممريحها اني احس بداخلها غصه
مقاطعة امها الها وزعلها, معاملة ابويه الها, وشلون يفرق بينهن هي وزوجات اخويه لو سفر ابوها واخوتها
وفوك هذا اني انشغلت عنها منا دوامي للثنتين وازدحام الطرق اوصل متأخر يادوب اكل ع السريع اناملي ساعه ساعه ونص واطلع للمختبر وارجع بالليل كلشي متشوف مني وهي هم دوام ومتشكي ابد بس اني احس بيها
بس الحلوو انو هي ع طول تراسلني وهالشي بكد ماعاجبني بكد ميحسسني انو هي ماعدها غيري تقضي وقت وياه او تحجي واشوفها هوايه تكتم بداخلها ومتشكي وتخلصها وياي غزل وضحك وشقه ومواقف تصير بينه نذكرها مرات
الي عجبني بيها اكثر ابد مو متطلبه وقنوعه حيل ترضا بالقليل واي شي يفرحها
بهذي الفتره احاول اسدد العليه من دين الابويه وفرقد
ومخلي ميزانيتي محدوده بيني وبينها والاكثر الها تحتاج ملازم ومصاريف حفلات التخرج هواي هم محسب حسابها وكنت مشترك بسلفه وحاسب حساب كلشي
اموري زينه ممضايق حيل بس فرق اكيد عن ماكانت عند امها او ابوها قبل الزواج
احاول مااقصر عليها واشوف كلشي يرضيها ويفرحها الهذا ريحتني من هالجانب
مرت اشهر وبدت اطبق وبالتطبيق اختلف كلشي وصرت اوصيها واشدد عليها رغم ثقتي بيها بس اكو اشياء فهمتها من اتعيينت صارت تخوفني اكو بحسن نيه يتصرفن تصرفات وغيرهم يفسرونها شي ثاني
داخل المستشفيات ناس تختلف تفكيرهم حسب المجتمع العايشين بي وكل واحد يشوف الصح من جانبه وغيره خطأ الي متختلط ناس تسميها معقده وناس تسميها محافظه وناس تشوف الي هي بي ماله داعي
والي منفتحه ناس تشوف مو مؤدبه وناس تشوفها مجامله وناس تشوف بيها مجال حتى!
أنت تقرأ
عرين ألذكريات ذنبي
Романтикаحياتي جميله لو انها تخلو من ذكريات موجعه لمن أفنت حياتها من اجلي كان همها حمايتي من اوجاع مرت بها سابقاً حاولت ان اكون كما تريد واكون كما تريد ان اكون ولكن هل يدوم هذا ؟ وهل تنجح محاولاتي ؟ امي سعادتي وجزء من احزاني
