عرين ألذكريات ذنبي

٢٤

قبل استيقاظي كان على قلبي ان يعلم ؛

الماي يعطش , يشرب بـ روحه ويموت !

تصير دمعه يصير كتالك ردن , 🥀🖤

ياگلب لا تـحيي جرحك شبعه موت ,

صدك اكرام الجرح من .. (يندفن) ..

............

اخذني ساندني من قوة الالم مو كادره اقدم رجلي حتى مشي مو كادره امشي
احس بطني تتملخ ووجع قوي بنهاية ظهري
خوفي وتفكيري والوحده الاني بيها زادت آلامي
لكيت نفسي كل ماتجيني نوبة مغص قويه امسك ايده بقوه الى ان تروح شويه اهدأ وهو متمسك بكتفي وايدي
عمي متصل بفرقد الظاهر بعده كاعد نزل وكل الابهر اني اسوق وكعدت عمتي يمه

فرقد حاجه ابهر كله اخذ جنسيتها لتنساها
جاوبه لا هي عندي بالسياره الاوراق كلها
عمتي كعدت يم فرقد وعينها عليه كل شويه تندار كالت الابهر

..زين هيج يصير لا انت الي احتويتها ولا هي الصبرت عليك وكالت خل يهدأ رجلي واتفاهم وياه گبيتوو فرد گبه شجاكم نار وبارود الاثنين الي يشوفكم يكول ماكو اهدأ منهم

هو سكت واني صوتي مابيه اطلعه من الالم والتعب والخوف وخجلانه هم فرقد احترمه هو واحمد هم يحترموني حيل وماعندي وياهم ميانه منظري مو حلو كلي دم وقبلها حجيت هواي يمهم بدون مااسيطر ع نفسي
حاولت الملم الباقي من احترامي واكتم صوتي رغم الالم بس زادت الاوجاع نص الطريق صرت اون غصب عني ظليت اعض ايدي انتبهلي و بعدها عني اخذهم بأيده

احس روحي بدت تنسحب مني وعرگت حيل واطرافي بردت
خليت راسي على كتفه استسلمت بعد مابيه اكابر

حسيت ضربات خفيفه ع خدي

..اريج شو انتبهيلي زينه انتي لو فقدتي وعيج
انتبهي ياعيني حنوصل مباقي شي دا تسمعيني

اشرتله براسي منتبهه اسمعك

صاح الفرقد استعجل

وصلنه المستشفى ودخلوني صالة الولاده الطبيبه شافتني وكالت اسقاط بس مااعرف الطفل باقي لو لا نتأكد يلله وحولتني ع السونار
رجعتلها حولتني الغرفة العمليات وطلعت اخذت توقيع من ابهر

رجعت سألتني كم سؤال وخلتلي كمام وبعدها ماحسيت ع شي

گعدت دايخه عيوني مغوشه افتح عيني واسدها بقوة
اسمع يمي مريات يسولفن ويسألن عمتي عني

انتبهتلي عمتي كالت

..يوم غمضي اصبري لتباوعين ادوخين هسه بعده البنج مأثر عليج
بقيت احاول الى ان استقر وضعي
سألت عمتي

..عمه طفلي راح يعني

..الله يعوضكم عمه بعدكم شباب يعوضج الله بغيره وبي صالح الكم ان شاءالله