Unicode
"အနီ့ ပန်းချီပြခန်း ပိတ်လိုက်ရပြီ "
မျက်လုံးတွေ မို့အစ်သည်အထိ ငိုနေခဲ့သော အနီ့ အသံ ခပ်အစ်အစ်လေးက ဘယ်လောက်ထိ စိတ်ထိခိုက်နေမလဲဆိုတာ Two ပင် ခန့်မှန်းလို့ရနေပြီ ။
"Two ကြိုက်တဲ့ ပန်းချီကား တစ်ချပ်ပဲ အနီ ပြန်သယ်လာခဲ့တယ် ကားထဲမှာ "
ငိုနေသည့်ကြားထဲက Two တောင် မတွေးမိတဲ့
Two ကြိုက်တဲ့ ပန်းချီကားအကြောင်း လှမ်းတွေးနေပေးသေးသည် ။ အနီဟာ ဘယ်လိုမျိုးလဲ ။
"အဲ့ဒါကို စိတ်ပူရမယ့် အချိန်လား ၊
အခု အဲ့ဒါဆို အနီက ဘာဆက်လုပ်မှာလဲ "
အဲ့ဒီ မေးခွန်းကို မေးလိုက်တဲ့အချိန်မှာ Two ဆီက နွေးထွေးမှုနဲ့ ပုံစံတူတဲ့ စိုးရိမ်စိတ်လေး
ပါသွားမှန်း Two ကိုယ်တိုင်တောင်မှ ရိပ်မိလိုက်သည် ။ အနီ လည်း ရိပ်မိလောက်မှာပါ ။ မျက်ရည်တွေနဲ့ မော့ကြည့်လာတဲ့ မျက်ဝန်းတွေမှာ အနီ့ ပျော့ညံ့မှုတွေကို အရိုးသားဆုံး မြင်ရသည် ။ အနီက ငိုကြွေးနေတဲ့အချိန် တကယ့် ကလေးလေးလိုပဲ ။ ဒါက အနီ့ ပုံစံအမှန်ပဲလား လို့ မေးခွန်းထုတ်မိတော့ ဘယ်ကဝင်လာမှန်းမသိ Two စိတ်တွေက လေးလံလာသည် ။
"အခု အနီ တို့ မိသားစု ဆေးရုံကို ဦးစီးရမယ် "
"အနီ အဆင်ပြေပါ့မလား "
ထိုတစ်ကြိမ် မေးခွန်း ကိုတော့ အနီက သူမ၏ ပင်ကိုယ် မျက်ဝန်းတောက်တောက်တွေနဲ့ ရဲရင့်စွာ ပြန်ဖြေလေသည်။
"အနီ ပဲလေ တခြားသူမှ မဟုတ်တာ
ဘယ်သူမှ မလုပ်နိုင်လဲ အနီလုပ်မယ် အနီ ချစ်တဲ့သူကို ကာကွယ်နိုင်ဖို့ အနီ တတ်နိုင်တာ အကုန်လုပ်မှာ "
Two ရဲ့ မျက်ဝန်းထဲကို အသေအချာကိုပဲ စိုက်ကြည့်ရင်း ပြောနေခဲ့တဲ့ အနီ့ စကားတွေက ဘာအဓိပ္ပါယ်လဲ မသိ အနီ ချစ်တဲ့သူကို ကာကွယ်ဖို့ ဆိုတဲ့စကားက ဘာကိုရည်ညွှန်းပါသလဲ ။ တစ်ချို့အရာတွေက အပေါ်ယံတွေပါလို့ သိထားပြီး တစ်ခါတစ်လေ အစစ်အမှန်ဆိုတာကို ခံစားမိနေပြန်သည် ။တစ်ခါတစ်ရံ အနီက ပျော့ညံ့သယောင်ရှိပြီး တစ်ခါတစ်ရံ အနီက သူမတူအောင် ရဲရင့်နေပြန်သည် ။ အနီ့ ကို ဘယ်လိုနားလည်ရမှန်းပင် မတွေးတတ်တော့ ။
