مخابرات خلف الاسوار بقلم / اسماء جمال

اقتباس

مالك حاول يتكلم بس عينيه متعلقه بعينيها ف كلامه طالع متهتهه او متلغبط : حلم افهمى .. صدقينى انتى مش فاهمه حاجه .. اصبرى و هفهمك انتى مش فاهمه .. انا هحكيلك من الاول
حلم ضحكت ضحكه شبه هزيان البنج : انا فعلا مش فاهمه .. غبيه بقا هتعمل ايه ؟ بس خلاص فهمت .. مكنتش فاهمه و خلاص فهمت ..
مالك بصّلها بترقّب : فهمتى ايه بالظبط ؟ انتى مش فاهمه .. إدينى فرصه اشرحلك اللى عندى بعدها اعملى اى حاجه عايزاها بس إسمعينى الاول .. لازم تسمعينى
حلم زعّقت كإنها بتتخانق مع نفسها : انت تخرس خالص .. فااهم .. اخررس .. لا انت هتتكلم و لا انا هسمعك .. مش هديك فرصه تخدعنى تانى يا مالك .. مش هتستغفلنى تانى .. الغبيه اللى كنت بتستغلها و تفهّمها اللى انت بس عايزها تفهمه خلاص فاقت .. فاقت من دوامتك و إتعالجت منك ..
مالك وجعه قوى صوتها اللى بيترعش و هى بتتكلم و دموعها اللى مجمداها متنزلش و لسه هيقرّب منها هى زقته بعنف : انا بقرف منك .. من لمستك.. من إنك حتى تبصلى
مالك وقف بحذر : طيب ممكن تهدى و خلينا نتكلم .. و زى ما قولتلك هقولك كل حاجه
حلم زعقت : و انا مش عايزه اسمع منك حاجه .. مش عايزه اسمع صوتك .. فااهم
مالك بيحايلها عشان محتاج تسمعه مش خوف .. خايف عليها مش منها : بس انا لازم اتكلم معاكى يا حلم و دلوقت قبل ما امشى
حلم ضحكت بتوهان ضحكه عاليه : تمشى ؟ و مين قالك إنك هتمشى ؟
مالك : حبيبتى اهدى .. انا مقدر زعلك بس لازم تفهمى إنه كان غصب عنى .. كل حاجه كانت غصب عنى .. و الله كانت غصب عنى مش بإيدى .. إدينى فرصه افهّمك .. اصبرى و هفهمك انتى مش فاهمه
حلم زعقت : انا مش غبيه .. فااهم .. انت اللى غبى .. غبى قوى .. إتعاملت معايا على إنى غبيه .. حقك .. لإنى فعلا كنت غبيه .. بس معملتش حساب اليوم اللى هفهم فيه .. اللى عنيا هتفتّح .. كان لازم تعرف ان عنيا هتوجعنى من كتر ما انا مغمضاها .. هيحى يوم و افتّحها ..
كان لازم  منه .. و لا كنت عامل حسابك هفضل طول عمرى غبيه ؟؟
مالك : حلم لازم الاول تفهمى ان انا
حلم بتزعق و بس و قافله كل جوارحها ف وشه مش بس قلبها يحس بيه او حتى عقلها يفكر بمنطق .. ده حتى عينيها بتقفلهم بعنف عشان متشفهوش ..
هى رافضه يتكلم لمجرد إنها رافضه تسمع : مكنتش فاهمه و خلاص فهمت .. فهمت الظابط اللى مبقاش ظابط .. الظابط اللى البلد علّمته و درّبته و شغّلته و وقّفته على رجله و يوم ما وقف داس برجله دى عليها .. علّمته يبقى راجل و يوم ما استرجل استرجل عليها و وقف ضدها و بقا يستخدم كل اللى ادتهوله عشان يحاربها بيه .. وقفلها نِد ل نِد و بقا يستخدم كل امكانياته ضدها..امكانياته اللى هى اصلا ادتهاله
مالك بيحاول يتكلم : حلم صدقينى و رحمة امى
حلم زعقت : امك ؟ امك ؟ امك اللى ربتك و كبرتك و يوم ما سابتك رميت تربيتها ورا ضهرك ؟ دفنتها معاها ؟ الا صحيح لسه فاكراها ؟
مالك الكلام مزّعه من جوه و سيرة أمه توّهته ف صوته إتخنق بدموع : إدينى فرصه اتك
حلم قاطعته بزعيق : اخرس بقا .. اخرس .. مش عايزه .. مش عايزه اسمعك .. انت لسه هتكدب تانى ؟ لسه ليك عين ؟ يا بجاحتك يا اخى .. عارف كان نفسى اقولك طلقنى
مالك إتجمد من كلمتها : بلاش .. اسمعينى الاول ارجوكى و حياة اى حاجه كانت بينا
حلم كملت كإنها مش سامعاه : كان نفسى فعلا اقولك طلقنى .. بس انت مسبتليش فرصه .. حتى حق الاختيار ده خدته .. انا بكرهك

✋✋✋✋✋✋
بسسسسسسسسسسس

تكرهى مين ده انتى نص الجروب عايز يعلقك من حواجبك 😂😂😂😂😂😂
ست حلم استهدى بالله و اهدى و قولى هديت لاحسن انا حايشه العيال عنك بالعافيه 😂😂😂😂😂