روايه زين

الحلقه الاولى من روايه زين

روايه زين
الحلقه الاولى
بقلم سحر فرج
❤💜❤

الشخصيات👇👇👇

زين الجبالى🌹منتج ومخرج سينمائى ناجح .. يعشق عمله وهو شاب فى اوائل الثلاثينات . شخصية قويه، حاد الطباع وشديد الغضب، يهابه كل من يعمل معه فى هذا المجال، يمتاز بملامح رجوليه وجاذبية شديده .. بشرته قمحيه وعيونه سوداء كالليل وحاده كالصقر .. طويل وجسم رياضى قوى يدل على صلابته .. عنيد وقاسى ومتعجرف ويكره المرأه او التعامل معها او العلاقات النسائيه ويرى من وجه نظره انها ضعف ولا يعترف بالحب .. رغم الوسط الفني الذى يعمل به ويعشق العمل فيه .

ليل🌹فتاه فى منتصف العشرينات .. تتمتع بجمال طبيعى وعيون ملونه .. تعيش مع أبيها عبد الرحمن واخوتها غير الاشقاء فى منطقه ريفيه .. وتربت على يد سعاد زوجه أبيها بعد وفاه والدتها منذ سنوات كثيرة .. وتعمل بائعه فى كشك كبير على الطريق الزراعى .
وباقى الشخصيات هانتعرف عليها فى الحلقات القادمه .

الفصل الاول🌹

باب الغرفه اتفتح على اخره، ودخلت سعاد بعصبيه وراحت لحد الشباك وفتحته وقالت : يااااااا ليل، يا بت يا ليييل، يازفت ياللى اسمك ليل، أصحى يا بت الساعه بقت سبعه وسياتك لسه نايمه، قومى وأخلصى علشان تقفى بدل أبوكى شويه فى الكشك، زمانه تعب من الوقفه والقاعده هناك طول الليل فى عز البرد ده .
ليل بدأت تفتح عيونها بالعافيه أول لما ضوء الشمس ملى المكان كله حواليها وكمان على صوت زعيق سعاد مرات أبوها وقالت : يا فتاح يا عليم، أنا نفسى أعرف بس فى حد يصحى حد بالمنظر ده، يا شيخه حرام عليكى نفسى أفضل نايمه زى خلق الله لحد ما أشبع نوم وأقوم براحتى، أنا مش عارفه الواحد هايفضل فى الهم والغلب ده لحد إمتى، عيشه تقرف، ده أنا لسه يادوبك نايمه بعد ما صليت الفجر وملحقتش أنام حرام عليكى كام ساعه على بعضهم من صوتك وصوت عيالك العفاريت اللى برة دول .
ونزلت من على السرير ولمت شعرها الطويل اللى كان مفروض على ضهرها بالتوكه وخدت بعضها وراحت على الحمام على طول .
سعاد بعصبيه ونرفزة ردت وقالت : اه منك ومن لسانك اللى عاوز القطع ده، يا بت اتلمى على الصبح، أمتى تغورى وتتجوزى ونخلص من خلقتك ومن أم لسانك الطويل ده،
أنا عارفه ما ريحتنيش وموتى مع أمك ليه زى ما ماتت كتك الهم .
وخدت بعضها وخرجت من غرفة ليل وراحت على المطبخ علشان تجهز الفطار لعيالها الصغيرين "محمود ورضوى" عقبال لما جوزها عبد الرحمن أبوا ليل يرجع من الكشك .

وفى مكان تانى فى حى راقى بالقاهرة وبالتحديد فى "فيلا الجبالى" اللى كان عايش فيها "زين الجبالى" الابن الكبير للعائله العريقه وصاحب اكبر شركه للإنتاج السينيمائى والإخراج، وكان معاه "سميحه" والدته وأخوه الصغير "عمر"
باباهم توفى من حوالى خمس سنين بعد صراع مع المرض وترك لزين شركه كبيرة للإنتاج السينمائى بيديرها هو وأخوه عمر .
سميحه والدة زين نزلت من غرفتها من فوق ودخلت على المطبخ ووجهت كلامها للدادة وقالت : صباح الخير، يالا يا زينب جهزى الفطار انتى وميرفت قبل ما الاولاد ينزلوا من فوق، زمانهم صحيوا من بدرى ونازلين ورايحين على الشركه .
دادة زينب ردت وقالت : صباح الفل يا ست هانم، دقايق وتكون السفر جاهزة اطمنى حضرتك.
سميحه ابتسمت وقالت : اعملى حسابك النهارده سماح وشاهندا جاين من السفر وعوزاكى تعملى كل الأكل اللى هما بيحبوه من إيدك يا زينب اوعى تنسى .
دادة زينب بكل حب ابتسمت وقالت : عيونى يا ست سميحه كل اللى حضرتك عوزاه هايتنفذ على طول، هو إحنا عندنا أغلى من الست سماح والست شاهندا ربنا يخليكم لبعض دايما .
ويا دوبك خرجت سميحه من المطبخ لمحت ابنها زين نازل من فوق .
زين مبتسم و عيونه على والدته فابصلها وقال : صباح الخير يا ست الكل وقرب منها وباس راسها بكل حب .
الام : صباح النور يا حبيبى .. اتأخرت فى نزولك ليه النهارده يعنى يا زين حتى اخوك عمر لسه منزلش لحد دلوقتى !؟
زين : انا فعلا اتأخرت شويه عن ميعادى النهارده لأنى نمت متاخر كان ورايا شغل كتير متعطل وكان لازم اخلصه واديه لعمر يخده معاه على الشركه .
الام : ربنا يعينك يا حبيبى .. ما تقعد يا زين واقف ليه كدة يا ابنى؟
زين : معلش يا أمى انا لازم أخرج دلوقتى عندى مؤتمر ولازم أحضره فى كليه الإعلام ورئيس الجامعه بنفسه هايبقى موجود .. ويادوبك عقبال لما أوصل هايكون ميعاده جه ومش عاوز اتأخر عليه.
الام ردت وقالت : يا حبيبى طيب استنى اخلى زينب تعملك أى سندوتش مع كوبايه الشاى بلبن بتاعتك .. مش معقول تخرج من غير فطار يا حبيبى، وبعدين انا عرفاك كويس لو اندمجت فى الشغل وروحت الجامعه او الشركه او الاستوديو مش هتاكل اى حاجه خالص وهاتنسى نفسك .
عمر نازل من فوق وسامع كلامهم وبهزاره المعتاد قال : دلعى يا اختى فيه دلعى .. أصل مفيش غير سى زين هو إللى ابنك وخايفه عليه وعلى صحته وانا مش موجود اصلا.