روايه زين

الحلقه الخامسه من روايه زين

روايه🌸 زين
الحلقه 🌸 الخامسة
بقلم 🌸سحر فرج

حسان بابتسامه كلها شوق بص لاوضه ليل وقال .. امتى يا سعاد يا اختى امتى ؟ امتى تعرف انى بحبها وعاوزها وشريها ؟
وهاخليها اميرة .
تفتكرى ليل هاتوافق عليا لما تعرف انى عاوز اتجوزها .
وللاسف ليل كانت خارجه من اوضتها 😲😲
وحسان وسعاد بصوا لبعض اوى بصدمه ..

ليل باستغراب .. فى ايه بتبصوا لبعض انتم الاتنين كده ليه شوفتوا عفريت !!

سعاد لسه هاتنطق حسان سبقها وقال .. ابدا ابدا مفيش حاجه دى سعاد لسه صاحيه من النوم وافتكرتنى انا اللى جهزت السندوتشات للعيال وقولتلها انك انتى اللى عملتلهم لما صحيتى من بدرى .

سعاد مش عاجبها طريقه اخوها فى الكلام مع ليل وبتمصمص فى شفايفها وعيونها على ليل وبتبصلها من فوق لتحت وقالت .. انتى لسه لابسه هدوم البيت ليه ان شاء الله يا هانم .. مش ناويه تروحى تفتحى الكشك يا بت انتى ولا ايه .. اللى كان بيفتحه وبتتكلى عليه مات يا اختى وخلاص ومفيش غيرك دلوقتى اللى هاتفتحيه بداله طول النهار علشان نصرف على البيت وعلى اخواتك الصغيرين .. وكمان الاكل والشرب وفواتير الكهرباء والمايه ولا انتى ناسيه .

ليل باستغراب بصت لسعاد وقالت .. انتى عوزانى اروح افتح الكشك وابويا لسه ميت امبارح .. انتى اكيد اتجننتى .. انتى مفكرانى ايه مش بحس زيك .. انا واحده من لحم ودم وهاموت من الحزن والوجع على ابويا وانتى ولا كأنه كان جوزك فى يوم من الايام ولا حتى عامله حساب عشرة ولا اى شىء خالص حتى حسيسينى انك زعلانه عليه يا شيخه .

سعاد عفاريت الدنيا اتنتطط اودام عينها وقالت انا مجنونه يا بنت ال .......... ولسه هاتقرب من ليل وتمد ايديها عليها لولا حسان وقفها .. فقالت .. جن اما يلهفك يا قليله الادب .. انا مجنونه انااااا يا بنت عبد الرحمن .. اما وريتك يا ليل المجنونه دى هاتعمل فيكى ايه .. وغصب عنك بقى هاتسمعى الكلام وهاتروحى دلوقتى وتفتحى الكشك ايه رايك بقى .. جنان بجنان يا ليل ووورينى هاتقدرى تعملى ايه يا حيلتها 😡
واه مش زعلانه على ابوكى وحمدت ربنا وقولت هم وانزاح من على قلبى .. عمره ما ورانا يوم عدل وش الفقر ده .. قطيعه تاخده مطرح ما راح استريحتى يا اختى .

ليل مصدومه من كلام سعاد وقالت .. حسبى الله ونعم الوكيل فيكى حسبى الله ونعم الوكيل.

حسان .. يا سعاد يا اختى استهدى بالله ليل متقصدش الكلام اللى انتى فهمتيه ده هى اكيد كانت عاوزة تقول .......
وقبل ما يكمل كلامه ليل بكل قوة وتحدى قالت .. لا اقصد كل كلمه انا قولتها ومن هنا ورايح مش هاعمل اى حاجه هى تطلبها منى .. انا كنت زمان بسكت واستحمل واشيل فوق دماغى علشان خاطر ابويا الله يرحمه لكن من دلوقتى مش هاسكت يا سعاد واعلى ما فى خيلك اركبيه ودخلت اوضتها وشدت عبايه سوده من بتوعها وراحت ناحيه باب الشقه وفتحته وخرجت من غير ما حد فيهم ينطق ورزعت الباب وراها .