تعافيت به

تعافيت به ٣٣

خلصت الاجتماع وطلبته من الموظفين ينصرفو ووكلته اي زول بي مهمه عشان ينفذها رغم اني اتضايقته من عدم وجود  المدير التنفيذي الجديد الا انه النائب حقهه والطريقه الشرح بيها العرض اكدت لي انه عكس توقعاتي وكل الكلام الاتقال عنه صاح يعني حتى في غيابه كان محضر كل الأوراق والمستندات المطلوبة وماف شي ناقص حسيت بفضول اني اعرفه وحبيت اقابله بعد طلعو الموظفين جاني مهند راجع طبعا م لاقيته الا في الاجتماع سلمته عليهو بشوق وقلته ليهو وين انت ي زول وحمد الله على السلامة والبركه فيكم كمان منو الاتوفى قال لي الله يسلمك ياخ والله واحده قريبه الحاجه من بعيد قلته ليهو ربنا يرحمها ياخ وليه م كلمتني على الأقل كان امشي معاك قال لي م كان في وقت وبعدين انت ناسي انه كان لازم تكون مع نور وم تخليها براها وصح م حكيت لي الحصل شنو؟ قلته ليهو دا موضوع طويل بحكي ليك وقت تاني بس اسي عايز اسالك رئيس القسم التنفيذي الجديد اسمهه منو؟؟ قال لي والله م عندي فكره ي مازن بس عارف سبب غيابه سألته السكرتيره قبل شويهه وقالت إنه اتصل كتييرعلى الشركه وقدم إذن بطلب رسمي وعمل كل الإجراءات اللازمة الاجازه عشان مرته ولدت قبل يومين وتقريبا م معاهم زول هنا عشان كدا أطر انه ياخد الاجازه دي صدقني هو زول كويسجدا رغم اني م قابلته لسه بس دايما بتواصل معاهو بالفاكس وكل موظفين البحيري بشكروا فيهو وإنت بي عصبيتك كنت حتخسره ساي ياخ حتبطل غشامتك دي متين ابتسمته وقلته ليهو فعلا ي مهند يعني الطريقه القدم بيها النائب بتاعه العرض تأكد انه اشتغل عليهو بمجهود عظيم وإنه دا شغل زول متمكن وخبير ويستحق المنصب الأنا اديتو ليهو في الشركه قال لي ايوا فعلا انا زاتي بقى عندي فضول الاقيهو والسمعته من الموظفين إنه كان صاحب شركات بس م عارف حصل شنو قال لي الدنيا م بتعرف متين بتتغير إن شاء الله اول م ينزل نقابله مع بعض ونشوف قصته شنو النوع الزي دا لازم نستفيد منه في الشركه ممكن يعمل نقلات كبيرة لو كان زي م بيتقال عنه قال لي ان شاء الله ي صحبي واها  نور ماشهه كيف في الشغل  قلته ليهو والله كويسه م بطاله بس للان م قعدته فهمتها المفروض يحصل شنو بس الشغل البسيط الطلبتو منها نفذته ودا كان بمثابه اختبار بالنسبه ليها انا قدرته احدد منو كيف اتعامل معاها ومستواها في الاداره وححاول ابدا معاها التدريب بي أي طريقه بس ننهى المشروع العامل لينا زحمه دا ونرتاح من همهه وافضى لنور المهم انت بكره حتمشي تعمل التوكيلات كلها ودي الأوراق وعليها كل توقيعات الشركاء تمم الإجراءات عشان تنجز سرعه وتنزل السودان تبدأ الشغل هناك بأسرع وقت قال لي خير ي مازن يلا نمشي ولا عندك شغل الساعه ٤:٣٠ الشركه شبهه فاضيه الا العندهم شغل متأخر وناس دوام المساء اللي عليهم شغل بدري ولا عندك معاهم حاجه  قلته ليهو لالا م عندي حاجه مع ناس المساء اليوم بس منتظر نور عشان نطلع سوى قال لي اهاااا نوووور قلته ليهو اي نور في شنو  عادي يعني وبعدين هي م بتعرف الفندق براها وانا بوصلها بس قال لي انا اسي سألتك ي زول وبعدين ي حنين انت احب اقول ليك انه نور رجعت من الاجتماع خلص لأنه انا مشيت اسلم عليها في مكتبها م لقيتها وسألته رؤى وقالت لي انها طلبت تاكسي ومشت يعني تقدر تمشي مع مهند دا اسي 😎قلته ليهو مشت كيف يعني ومن دون تكلمني حتى قال لي وتكلمك ليهه زوله دوامها انتهى تنتظرك ليهه ابتسم ورفع لي حاجبه قلته ليهو عادي ي مهند وبالله بطل فهمك الوسخان دا قصدي انا عندي معاها كلام وعمها عايز يلاقيها وكل القصه إياد موصيني عليها وكنت خايف انها م تعرف الفندق بس م اكتر وي سيدي مدام مشت براها احسن برضو اوك يلا نمشي نحن كمان  قال لي اياااد اهااا قلته لي إياد موصيك عليها باين شديد انه إياد نوصيك توصيه جامده وإنك من النوع اللي بيشتغل بي وصايا اياد قلته ليهو مهند 😒ضحك قال لي خلاص ي صحبي ولا تزعل نفسك  انا مصدقك ممكن نمشي اسي؟ ولا م تعبته من كلامك عن نور لسه قلته ليهو مهند م تنرفزني واقسم اديك بنيهه في وشك دا اغير ملامحك ضحك تاني وقال لي لالا َعلى شنو ي صحبي ارح وانا خشمي مسكته وطلعنا على العربيه قال لي احكي لي الحصل شنو لما مشيت تجيب نور حكيت ليهو الحصل كله قال لا حولا يعني البت كانت حتضيع قلته ليهو اتخيل بس قال لي طيب وعمها اسي رده فعله شنو قلته ليهو شششت ياخ ذكرتني عمها قال عايز يلاقيني ويلاقيها  وحيجي حوالي الساعه خمسه الفندق وانا حتى نور من اللخمه م كلمتها 🤦‍♂️قال لي بالغته ياخ الساعه خمسه الا ربع حالياً خلينا نمشي على الفندق وانت اتصل على نور قلته ليهو فكره برضو اتصلت عليها كذا مكالمه م ردت شويهه وصلنا الفندق سألته الرسيبشن إذا في زول منتظرني قالو لي ايوا في واحد اسمه عبدالله الحسيني منتظرني مشيت عليهو لقيت راجل باين عليهو أربعيني ملامحه هاديه وتحسها مألوفه اتحركته باتجاهو سلمته عليهو وعرفته على نفسي سلم علي ببشاشهه وقال لي كيفك ي ولدي أن شاء الله تمام قلته ليهو الحمد لله والله بعد موال من السلام والتعارف قال لي والله ي ولدي م عارف اقول ليك شنو بس شكرا كتير على الانت عملته مع نور بتي يعني م عارف لو م كنت وصلته في الوقت المناسب كان حصل عليها شنو قلته ليهو العفو ي عمي م عملته الا الواجب قال لي كتر خيرك ي ولدي اها نور وين اسي قلته ليهو والله م عندي خبر لأنها طلعت من المكتب قبل م انا اطلع بس حتكون في غرفتها دقيقه حطلع ليها لأنه مع لخمة الشغل نسيت اكلمها بي تواصلنا وانك حتجي والمسافه دي انتو اطلبه حاجه قال لي لالا ي ولدي ماف داعي والله انا زاتي مستعجل قلته ليهو معقوله ي عمي اتلفته على مهند قلته ليهو شوف عم عبدالله عايز شنو وخليك معاهو لحدي م اجيب نور قال لي تمام خليت مهند قاعد وطلعته على غرفه نور دقيت الباب كذا مره ماف زول رد سألته واحد من الموظفين وقلته ليهو نور وصلت ؟؟ قال لي ايوا وصلت بدري ودخلت غرفتها وم طلعت منها قلته ليهو طيب مشيت دقيت الباب تاني وبقيت انادي عليها بس م جاني رد منها قلبي قبضني وخفته يكون حاصل معاها حاجه نزلته تحت طلبته مفتاح الاحتياط ورجعته كنت عايز ادخل بس م حبيت ادخل غرفتها وخصوصا هي بت وغريبه عني طلبته واحده من الموظفات وخليتها تدخل تشوفها وفضلته منتظر بره شويه جاتني طالعه وقالت لي ايو الانسهه موجوده وكانت نايمه بس صحت ومنتظراك دقيت عليها الباب تاني قالت لي اتفضل صوتها كان تعبان دخلته لقيتها قاعده في السرير ولسه بي ملابس الشغل وشعرها منكوش وعيونها واقعه ملامحه كانت جميله شديد مع عيونها النعسانه والبراءة اللي في وشها ❤️حسيت اني عايز اسرح فيها بس إداركته نفسي قلته ليها شنو ي زوله دا كلهه نوم خوفتينا عليك قالت لي مازن النصري ارحمني بتطلع لي من وين انت ياخ عايزه انوم انووووووووم😭 الطريقه الدراميهه القالت بيها الكلام دا خلتني اضحك تلقائيا قلته ليها كدا برضو وانا العايز اتطمن عليك قالت لي اي كدا ي زول م تعمل لي فيها الحنين عايز تنجضني في الشغل وفي الفندق الله بسألك ي النصري والله ضحكته وقلته ليها ي بت م تخلي الدراما الانت فيها دي 👊 و نايمه كدا مالك ووشك شاحب من شنو؟ قالت لي وشي شاحب من المرمطه المرمطتني ليها من اول يوم دي جيت تعبانه وم عارفه نمته متين زاتو بس انت الجابك هنا شنو خير مالك؟ جاي تعذبني هنا تاني مش واعععععي  قلته ليها ياخ انا م لاقاني انسان لميض ولسانه مترين زيك ي بت انا مديرك ومفروض يكون في احترام وكدا 😹 الله يسألك وين الممرمطه الانتي بتتكلمي عنها دي انا الليله م خليتك تعملي اي شي اصلا يعني لما نبدأ الشغل الجد حتعملي شنو طيب  قالت لي انا كنت عارفه انك ناوي لي على الشر اصلا انت جيتك لحدي هنا م لي خير النبي خليني انوم ورجعت اتغطت بالبطانيهه ضحكته وجريت منها البطانيهه قلته ليها هوي ي شافعه قومي فوق وخلي الدراما البتعملي فيها دي واسمعيني انا جيت لشنو ضحكت وقالت لي أحيي بس انا اهاا خير قول  قلته ليها لالا خير عمك تحت جاء عشان يشوفك قالت لي بي خلعه عمو عبدالله! ؟قلته ليها اي قالت لي بلهفه حبيبي والله مشتاقه ليهو بس هو عرف كيف أنه انا هنا قلته ليها كلمته انا من امس وكنت عايز احكي ليك بس انت طلعتي من الشركه قبل تكلميني💔 قالت لي اي صح اسفه وربي بس كنت تعبانه والله عشان كدا قلته ليها طيب ي ستي يلا عشان عمك منتظر قالت لي دقيقه حنزل ليهو نزلته من السرير لبسته شبشبي وقلته لي مازن يلا عاين لي وقعد يضحك قال لي نازله كدا بشعرك المنكوش دا قلته ليهو اي ي زول مالك مع شعري أنت اعمل رايح وانا بعمل فيها إنه كيرلي ضحك لمن دمع وانا ضحكت معاهو قال لي ارح اصلا م بتكلم مع مجانين انا قلته ليهو ههه مجنون براك ي زول وفضلنا نتغالظ على بعض ونحن نازلين وصلنا تحت ولقيت عمو عبدالله ومعاهو مهند جريت على عمو وأول م شافني وقف وجاء باتجاهي حضنته وفضلته ابكي ومازن ومهند كانوا بعاينو لي بس يعني من يوم شركتنا انهارت وحصلت المشاكل ديك في بيتنا عمو استقر هنا وم رجع السودان تاني فضلته مسافه ببكي وانا في حضنه قال لي كفايه ي بتي الله يرضى عليك اهدي ي عمو💔 قلته ليهو عمو م شفته الحصل لي بابا قال لي قولي الحمد لله ي بتي ربنا يعافيهو أن شاء الله م تخافي حيقوم بالسلامه قلته ليهو بابا م صحى ي عمو بابا بقى م بمشي واسامه م لقيته قال لي معليش ي بتي الله يجازي الكان السبب بس انت اهدي وقولي الحمد لله وتعالى اقعدي قعدته جمبه واداني مويه شربته وهديت شويه سألته من اولادو ومرتو الحاصل قال لي انهم بخير وم عليهم عوجهه بعدها مهند قال لي كأنه نحن م هنا ي اخونا يعني م عايزه تسلمي علي ابتسمته وقلته ليهو مهند كيفك ياخ معليش اتلخمته مع عمو قال لي ولا يهمك ي زوله وانا بخير الحمد لله انت كيفك والشغل معاك قلته ليهو والله تمام فتحنا مواضيع الشغل وحكيت لي عمو الحاصل كله وأنه ضمينا شركتنا للنصري بعدها طلب مني امشي معاهو البيت بس رفضته وفهمته اني مرتاحه هنا وحقدر اركز على الشغل اكتر ووعدته اني ح أجي اقعد معاهو كل فتره والتانيه كم يوم وحكون على تواصل دايم معاهو وعمو عبدالله نسبه لأنه بشبه بابا شديد م حاول  يضغط علي وقال لي خير ي بتي البريحك بس اوعك تنقطعي مني ❤️وسجل لي أرقامه ورقم مرته وعنوان البيت والشركه بتاعته م خلى شي م سجله عندي واخد تلفون مهند ومازن وغايته وبيته م كان بعيد من الشركه بس م حسيت اني عايزه امشي من الفندق وأنه راحتي هنا احسن بعدها عمو ودعني بعد م وصاني كتير ووصى مازن ومهند على كمان وطلع فضلنا انا ومهند ومازن نحكي ومازن وضح لي حاجات كتير عن الشغل المفروض تتعمل وأنه المطلوب مني شنو لأنه الليله م كان عندنا فرصهه نتكلم كتير فاخدنا وقتنا وحكينا وفهمته الشغل الواجب علي الزمن جرا والساعه عملت ٧مساء مازن قام وقال  لي نستاذن نحن بعد كدا وي نور حاولي تكوني بكره بدري في الشركه قبل الترحيل يفوتك ولا انا ممكن اعدي عليك قلته في نفسي بسم الله دا مالو الصباح بي وش والمساء بي وش الولد دا منفسن ولا شنو قلته ليهو لالا م مشكله انا حجي مع الترحيل انت م تتعب نفسك حسيته اتضايق من كلامي لكن م قال حاجه اكتفي بأنه يقول لي تمام وطلعو الاتنين بعدها طلعته غرفتي اخدته دش وسرحته شعري واتصلت على شهد والبنات فيديو كول جماعي وفضلنا نرغي وحكيت ليهم الحاصل معاي كله وتعامل مازن معاي شهد قالت لي شامهه ريحه غرام وهيام انا قلته ليهو ليها غرام ولا كيلو هاهاها قالت لي زريفه قلته ليها ي بت اتلهي هو مازن بعرف يحب غير نفسه دا ولد منفسن اصلا م بشبه إياد في شي ريم قالت لي احلا منفسن في الدنيا شهد قالت ليها صدقتي احي منو منفسن البسبوسه بالقشطهه قلته ليهم والله قعدو يضحكو وكملو انبراش وشغلوها لي بعدها قلته ليهم هي انتو حتصاحبوني اتخارجو انا براي جعانه ماشهه اكل وعندي ملفات طلبها مني المنفسن دا لو م عملتها ممكن يقتلني بكرا شهد قالت لي شوف البقره دي بالله خسي شويه خلي اللبس يظبط فيك م شايفه نفسك في الصور الرسلتيها عامله كيف وتعالي هنا ي قليله الأدب لبسك دا ضيق وقصير شديد قلته ليها سو وط ي بيبي لبسي عادي جدا ومافيهو شي 😏ريم قالت ليها اي لبسها حلو وظابط ولويه قالت ليها حلو وظابط في عينك انت التانيه نور لبسك دا محزق عليك شديد غيريهو قلته ليهم انزلو من راسي انتو الاتنين بالله م فاقداه محاضرات عن الإخلاق ويلا يلا هش ماشهه اشوف باقي شغلي م ناقصاكم وقفلته الخط فكرته في كلام البنات وبالجد لاحظته انه كلامهم صح وأنه مفروض انا كبرته وماف داعي للبس دا بس تاني كسرته الحنك واتجاوزته الموضوع ونزلته تحت عشان اشتغل شلته اللابتوب بتاعي والملفات ومشيت قعدته في الحديقه بتاعت الفندق وطلبته عصير وسنتدوتش وفضلته قاعده اكل واشتغل فجأه سمعت صوت وراي بقول لي احم احم اتلفته لقيتو مهند استغربته طبعا قلته ليهو اهلين ي مهند اتفضل قعد جمبي وقال لي جنو ي جنو كيف امسيتي 😹 ضحكته وقلته ليهو تمام الحمد لله وانت كيفك قال لي بخير والله قلته ليهو م مشيت البيت ولا شنو؟ قال لي لالا مشيت بس كان في اجتماع هنا ومازن م حيقدر يحضرو عشان كدا جيت راجع ولمحتك قاعده ومجتهده م شاء الله عليك😹❤️ قلته ليهو بحاول عشان صحبك المتوحش دا م يقوم علي ضحك وقال لي شششت ياخ انت لسهه معلقه في مازن المتوحش وم نسيتي الكلمه دي وفكرتي تغيري رايك قلته ليهو هئه اغير رأي من شنو صحبك متوحش ومنفسن حنكذب يعني  ضحك وقال لي م غلطته نهاي لما سميتك جنو والله ماف زول قادر يقول لي مازن كدا غيرك  قلته ليهو عشان منفسن ي يمه وبيني وبينك وديهو دكتور مدام انت صحبه لأنه عندو انفصام مرات مسكين وبرئ ومرات كريهه وم بنزل من الحلق  فضل يضحك وقال لي والله انت م نصيحه حاسبي بس م يسمعك  قلته ليهو يسمع ساي ي زول خايفه منو انا 😏 قال لي ي زوله م بنخاف يعني  قلته ليهو نوهاي فضل يضحك معاي ويشغلها لي واتونسنا مسافه بعدها قال لي نور معليش ممكن اسالك سؤال بس احتمال يكون خاص شويهه قلته ليهو اتفضل عادي قال لي ليه انت مسكتي مجلس الاداره من بعد مرض ابوك وين اسامهه اخوك؟ حسيت السؤال نزل على قلبي زي السكين سكته مسافهه وسرحته قال لي اسف م تتضايقي وخلاص لو م عايزه تحكي عادي بعتذر شلته نفس طويل و قلته ليهو  لالا عادي بس اسامه اصلا ما اخوي الحقيقي وحاليا هو م عايش معانا عايش هنا وانا م عارفه هو وين بالضبط ودا برضو من الأسباب الخلتني أجي هنا اني افتش عنهه وحتى انه م بعرف بي مرض بابا لسهه ومعليش بس م بقدر اقول ليك اكتر من كدا قال لي اها اسف ي ستي وربنا يقوم الوالد بالسلامه ان شاء الله وترجعي من هنا واخوك معاك ❤️قلته ليهو أن شاء الله يارب قال لي اخدي راحتك ي زوله وغير الموضوع باحترام❤️وفضل يشرح معاي في الملفات واتناقشنا في الموضوع بتاع الشراكه بعدها استاذني وطلع وانا رجعته غرفتي صحيت الصباح بدري وكنت مقرره امشي السوق واشتري شريحه جديده عشان ارجع لمازن تلفونه طلبته تاكسي مشيت السوق وفعلا اشتريت شريحه ومشيت الشغل شلته بوكس بتاع شوكلاته ومعاهو التلفون بتاع مازن وكتبته ليهو رساله محتواها "شكرا❤️" ودخلته مكتبي واصلته شغلي عادي مرت الايام سريعهه وانا ومازن ومهند بقينا شبه أصحاب الوقت كله مع بعض وخصوصا انا ومازن قربنا من بعض ويقينا نطلع سوا وننزل سوا مهند سافر السودان وابتدا المشروع والحمد لله كان ناجح والشركة بتاعتنا أحوالها ماشهه تمام وبابا وضعه الصحي في تحسن حسب كلام إياد والبنات م كانو بقصرو معاي يرسلو لي المحاضرات وبشرحوها لي وكنت بحاول اوفق بين الشغل والدراسه ومازن ومهند م قاعدين بقصرو معاي ومع الايام اكتشفت فعلا انه مازن بتاع الشغل مختلف تماما عن مازن الحقيقي ❤️وقدر شنو هو إنسان طيب ومحترم رغم القسوه الكانت بتظهر عليهو لحدي م يوم ونحن في المكتب دخلت علينا تالي وجات جاريه سلمت علي واستلمتني شكل وضرب وكيف انا م بسأل عنها المده دي كلها ولا زرتهم وبعد حب وتحانيس حتى رضت وقالت لي يلا الليله تمشي معاي البيت بس قلته ليها تالي حبيبي وربي اسفه بس الليله م بقدر وعمو واولادو منتظرني قالت لي م بعرف بس انت م عايزه تجي البيت وتتعرفي على ماما وبابا قلته ليها والله ح اجيكم بس ارجع من ناس عمو وح اتعرف عليهم وح اقعد معاكم يومين حلو كدا  قالت لي لا ي زوله انت بتكذبي على كل مره بتقولي حتجي وم بتجي من يوم جيتي البلد دي وكل يوم مدياني ماسورة انت بقيتي م بتحبيني قلته ليها تالي أخص عليك انا برضو بتاعت مواسير اي شويه لكن م للدرجه دي 😹وبعدين م احب القمرايه دي كيف بس انت عارفه ضغوطات الشغل لكن  انا وعدتك صح صرت وشها  وقبلت مني بالاتجاه التاني اشرته لي مازن الكان واقف وبضحك فيني وغمضته ليهو عيوني على اساس يراضيها ابتسم ومشى باتجاها قال ليها أميرتنا الحلوه سماح المره دي لي نور عشاني والمره الجايهه لو م جات نزعل منها سوا وغمز ليها عينهه ابتسمت وقالت ليهو تمام قالت لي دي اخر مره ي نور تاني ماف أعذار قلته ليها سمعا وطاعه ي مولاتي قالت لي اي انت حنكيهو وهو يجي يحنكني دي اخر مره انا اتحنكته ليكم بمزاجي لكن المره الجايه م بتحنك فاهمين 😏 مازن قعد يضحك وقال ليها لااله الا الله خلاص ي جماعه عيلة النصري ضاعت منك لله ي إياد وانا متهه بالضحك عليهو وتالي برضو قعدت تضحك 😹أتلفت وقال لي الله يسألك دا كلام بت عمرها ١٤ سنهه ونزلت السودان مره واحده اشوف فيك يوم ي إياد انت وصحباتك  ضحكته وقلته ليهو ي زول أحسن ليك لا يويو ولا صحباتو سألوك فضلنا نرغي كدا بعدها السواق جاء وساق معاهو تالين ومازن طلب يوصلني اتحركته على الفندق شلته لي كم غيار ومنها على بيت عمو اول م وصلنا عايزه انزل مازن قال لي احم اتلفته وقلته ليهو خير 😏قال لي اممم يعني بكره م حنطلع مع بعض؟؟ قلته ليهو قصدك حتفقدني اصلا انا عارفه م حتعرف تتنفس من دوني  ابتسم وقال لي اها ي أكسجين الحياه حتقلبيها درامه قلته ليهو أخص ي جارحني 😔 ضحك وقال لي نور انزلي قبل م ارميك بالشباك دا قلته ليهو ظابط اصلا عادي الطعنه بتجي من القراب ونزلته قعد يضحك وأول م اتحركته بي اتجاه الباب قال لي نور ❤️اتلفته عليهو قال لي خلي بالك من نفسك ❤️ ابتسمتهه ودخلته بيت عمي سلمته عليهم واتونسته معاهم شويهه لاني طولته منهم حرفيا استملوني بنات تشغيلات وزله وم بتجينا وموال من اللوم ومرت عمي شاكلتني وأنه كيف انزل في فندق والبيت قريب بعد حب وتحانيس حتى اقنعتهم بي قعدتي في الفندق حقيقي عيلة عمو عبدالله دي انا اكتر عيله بحس فيها بالانتماء وجو الاسره من بعد عيلتنا بعدها قلته ليهم هي انا حدخل انوم عشان بكرا عندي شغل بدري دخلته الغرفه غيرته ملابسي ورقدته في السرير مسكته تلفوني لقيت مكالمه من مازن ورساله محتواها كان "مش كنت عايزه تعرفي الجواب اي ي ستي حفقدك وبي المعنى الاوضح ح اشتاق ليك ❤️" رجعته ليهو بي رساله وقلته ليهو "نفس الاحساس ❤️" وقفلته التلفون على كدا ودي كانت بدايه حاجات كتيره جدا تقريبا انا ومازن قربنا من بعض اكتر وبنرغي يوميا سواء في مواضيع الشغل أو غيروا المهم انه نتكلم قعدته ٤ ايام مع ناس عمي وكان عمو بوصلني الشركه الصباح والمساء برجع مع مازن وكنا متابعين شغل المشروع وكانت فيهو شويه مشاكل والشغل كان ضاغط علينا ومتخوفين من حاجات كتيره الايام ماره سريعه و مازن التوتر كان باين عليهو من المشروع ومرات كتيره كان بفكر يتنازل عنه بس التشجيع من المدير التنفيذي للشركة كان بديهو حافز زي م كان بحكي لي تقريبا كان بدعمهم وبوريهم المخاطر والثغرات الممكن تحصل وكانو بحاولو يعالجوها بدري بدري  لحدي م في يوم صحيت الصباح على صوت تلفوني وكانت مكالمه من مازن اتخلعته وقلته ليهو مازن خير في شنو قال لي نووووور❤️❤️ بفرحهه كدا قلته ليهو خير مالك قال لي مبروووك المشروع نجح وحقق أرباح كبيره جدا وغير متوقعه زاتو وشركتنا بقت من أفضل الشركات في السوق... ❤️❤️❤️

وتظنهه تدميراً بينما هو تدبير فأحسن الظن بالله دائماً...... ❤️

#تعافيت-به
#هويدا - عبدالله