تعافيت به

تعافيت به ٢٠

تقريبا يوم الليله كان من أسوا الايام المريت بيها في حياتي وكان بدايه نهايه لحاجات كتيره بعد بابا اتبرى من اسامهه قدام العيله وترجيات ماما وجدو وحبوبهه كلها م جابت نتيجهه معاهو وم رد على زول فيهم اكتفى بي انه طلع غرفته وخلانا تايهين في أفكارنا عمتي قالت ليهم أظن بعد كدا ماف داعي نحن زاتنا نقيف هنا اصلا الحصل حصل والشركه ضاعت وقروشي معاها حسبي الله ونعم الوكيل فيك انت ي الفقر من جيت البيت دا وانت م وش خير اصلك حرامي ونصاب زي ابوك واحد وانا حقي م عافياهو ليك يشاقيك ويلاقيك اسامهه كان قاعد في الأرض والدموع ماليه وشو وم فتح خشمه ولا قال اي حاجه وماما  خاتهه ايديها الاتنين في راسها وتستغفر وتبكي💔 ولينهه كانت واقفه جمبي ودموعها مغرقه وشها والموقف كان بالنسبه ليها صعب شديد اما انا فالبجد م كنت فاهمه البحصل حوليني أو م مستوعبه كميه بتاعت اسئله م عارفه ليها جواب ؟ فضلنا على الحاله دي مسافه طويله بعدها جدو قال لي اعمامي خلونا نمشي ي جماعه الكلام دا داير ليهو قعده بي رواقه وذهن صافي ونقاش براحه عشان نفهم حنعمل شنو في المصيبه دي ولأنه حاليا ماف زول فينا عندو حيل يتناقش بيهو عمتي قالت ليهو نحلها شنو ي ابوي انت شايف انه عندها حل م خلاص راحت الحلول جدو قال ليها كل عقده وليها الف حلال اذكري الله ي منى ي بتي بتتسهل عمي عبد الرحمن قال ليهو والله ي حاج م بوافقك الرأي انت عارف الشركه عليها ديون قدر شنو للبنك وعشان م اتسددت الديون دي حتتعرض على المزاد ولو م جابت حق الدين احتمال يرهنوا البيت دا كمان جدو قال ليهو ي ولدي م تتفائل بالشر أن شاء الله البيت والشركه م بتجيهم عوجه ولو ادفع عمري دا كله م بخلي تعب أولادي يروح شركتي الفاتحه دي مش ليكم انتو ولليوم الزي دا طوالي ندفع الدين من قروشها وانتهى الموضوع عمي عبدالرحمن قاليهو مع احترامي ليك ي ابوي بس ماف طريقه انه ندفع قروش والشركه زاتها ماف وضع يسمح بكدا نحن مضينا عقود جديده ودفعنا فيها مليارات واي زياده على القروش دي معناها نحن برضو حنعرض الشركه للخساره جدو قال ليهو افهم من كدا يعني ي عبدالرحمن م عايز تساعد اخوك قال ليهو م معنى انه م عايز اساعد اخوي انا م معاي اساعد اخوي حاليا جدو قال ليهو أخص عليك والله اسي م بتخجل من كلامك دا عمو عبدالله قال ليهم ي جماعه ممكن نمشي البيت نتناقش هناك لأنه زي م قلته ي ابوي الموضوع عايز دراسه والوقت والمكان م مناسبين جدو قال ليهم خير وجاء على ماما قال ليها م تشيلي هم ي بتي واستغفري ومشى على اسامهه وربت على كتفه قال ليهو معليش ي ولدي كلنا بنغلط وابوك زعلان م تاخد في خاطرك منو الله يهديكم و عاين لي انا وقال لي خلي بالك من ابوك وطلع وكلهم طلعو معاهو فضل عم معاويه الكان قاعد في الكرسي وم قال اي شي بس براقب من سكات لينهه نزلت لاسامه في الأرض وهي بتبكي قالت ليهو اسامهه قوم على حيلك الله يرضى عليك كفايه رفعته وساقته من أيدو وقعدتو في الكرسي اسامه تقريبا م كان حاسي بي أي حاجه وداخل في حاله بتاعت صدمه ساكت ودموعو في عيونه وم فتح خشمه بكلمه عم معاويه قال ليهو ي اسامه م كدا ي ولدي شد حيلك شويهه زي م قال جدك ابوك زعلان وانا وانت عارفين كدا كويس الشركه دي انا وابوك اسسناها من بدري شديد وتعبنا عليها السنين دي كلها فصعب نشوفها بتقع قدامنا وم قادرين نعمل شي اسامهه قال ليهو بس انا م عملته حاجه ي عم معاويه انا م عارف الحاجات دي دخلت في بعض كدا وانا... فجأة بابا جاء داخل وقال لي اسامهه انت لسه هنا مش انا قلته ليك م عايز اشوف وشك في البيت دا اسامهه قال ليهو ي ابوي اسمعني بس اديني فرصه أوضح ليك بابا قاطعه وقال ليهو انا م ابوك فاهم ولا لا انا م عندي ولد واعى اسمعك تناديني ابوي تاني وتوضح لي شنو تاني بعد سرقتك لي في شنو تاني ممكن يتوضح ماما قالت ليها عماد اسمعوا عايز يقول شنو الله يهديك قال ليها سوسن ولا كلمه م كفايه العملو لحدي هنا وقال لي اسامهه يلا قوم برا البيت دا م اشوف وشك هنا تاني والا قسما عظما اقتلك بي ايدي دي اسامهه كان بعاين لبابا بنظرات كلها اسى ورجى ودموعو براها كانت بتحكي الف حكايهه عم معاويه حاول مع بابا كتير وحتى ماما وانا واسامه بس بدون فايده بابا كان رافض انه يتناقش في الموضوع دا رفض تام في الاخير اسامهه استسلم ومشى لمى ملابسه هو ولين وجاء نازل كنا واقفين كلنا وعم معاويه كان بحاول يهدي في بابا، ماما شافته جاي بشنطته جرت عليهو وجدعت منو الشنطه قالت ليهو اسامه انت جنيت عايز تمشي تخلينا عايز تخلي امك براها لو ابوك زعلان منك انت تزعل لينهه ي بتي اتكلمي مع راجلك د اوقولي ليهو الكلام دا غلط فهمي انه المشاكل م بتتحل كدا بس لينه كانت بتبكي وتعاين لي ماما وانا خلاص الفيني كملت وم كنت فاهمه اي حاجه بقيت قاعده في الأرض وحاسه الدنيا دي لافه بي بابا كان واقف زي الجبل ومدينا ضهرو رجاء ماما ودموعها وكلام عم معاويه م حرك فيهو ساكن بالعكس كأنه بقويهو زياده ماما لما تعبت قعدت في الأرض وبقت تبكي وتترجى في اسامهه عشان م يمشي اسامهه نزل في الأرض معاها ودموعو في عيونه 💔قال ليها اعفي لي دموعك دي ي امي بس انا لأول مرة في حياتي ح اعصي اوامرك وم حسمع كلامك خليني امشي لاني وجعتك ووجعته ابوي بعد كل العملتو عشاني  اديني رضاك وخليني امشي واتحرك على اتجاه بابا وقال ليهو انا عارف اني اذيتك وسببته ليك وجع كبير من دون قصد م عايزك تسامحني ابدا بس عايزك توعدني انك حتكون قوي زي ما عودتنا والانتكاسة الحاصله في الشركه دي انا متأكد عماد الحسيني قادر يتجاوزها ودي أوراق تنازل عن حصتي في فرع الخليج انا رجعتها بي اسمك وحاليا الشركهه سيولتها كويسهه وممكن تستفيد منها في دفع نص المبلغ للبنك عشان م يعرضو الشركه الهنا للمزاد ولما الشركه ترجع تقيف سدد باقي المبلغ وبكدا الشركه حتكون في أمان وعايز اقول ليك حاجه قبل م اطلع انا عمري م كان عندي نيه اكسر بخاطرك أو اجرحك أو اسرقك ولا القروش بتهمني ابدا وانا اتظلمته ي ابو.. اقصد ي استاذ عماد وعايز اشكرك على أنك ربيتني وعلمتني لحدي م وصلته لاسامه الحسيني وجميلك حيفضل دين في رقبتي لحدي م اموت انا م زعلان منك عشان طردتني واتربيت مني انا زعلان عشان م قدرته اارد ليك الجميل بطريقه تستحقها بس معليش وحقك علي وبشكرك على السنين الربيتني فيها وعلمتني واديني حنان الابو وعيشتني وسط عيله 💔على العموم انا طالع واوعدك اني اختفى من حياتك للأبد زي م انت عايز وم حتشوف وشي دا مره تانيه ابدا ولا حتسمع اسمي السبب ليك الوجع دا بس عايز اقول ليك حاجه اخيره انا مظلوم وحيجي اليوم الحتعرف فيهو الحقيقه دي اديني عفوك ورضاك بس وابقى طيب ي حاج وجاء علي قلته ليهو اسامهه م تمشي وانا بتنهد وبقطع في الكلام قلته ليهو حتخليني لمنو من بعدك مسكني وشي بي أيدو وقال ليي هشششش خلاص بطلي بكى انت لازم تكوني قويهه وتتحملي مسؤولية امك وابوك م عايزك تضعفي نهاي واتذكري انا معاك بي قلبي امك وابوك محتاجنك في الوقت دا فابقي قدر المسؤولية وخلي بالك من نفسك ومنهم قلته ليهو اسامهه م تمشي وحضنته فكاني منو بالقوه وقال لي لينه يلا شال شنطته واتحرك باتجاه الباب ماما جرت على بابا وبقت تقول ليهو عماد وقفوا ي عماد اسامهه مشى ي عماد وقفوا ولدي فات ي عماد ناديهو شوف ولدك فات ي عماد الله يرضى عليك وقفوا العن الشيطان ي عماد الله يهديك بس بابا ابدا م اتحرك ولا كلف نفسهه يتلفت عليهو انا وقعته في الأرض وبقيت ببكي وبعاين لاسامهه البدأ طيفه يختفي تدريجيا لحدي م طلع نهاي من البيت... 💔