Mʏ Lɪɢʜᴛʜᴏᴜsᴇ (Cᴏᴍᴘʟᴇᴛᴇᴅ)

Chapter-34

Unicode

စတော်ဘယ်ရီရောင်နှုတ်ခမ်းနီတောင့်က ဖူးကြွနေတဲ့နှုတ်ခမ်းလွှာလှလှပေါ်မှာ ဘယ်ညာပြေးကာနှုတ်ခမ်းအလှ ပိုကြွအောင်ပံ့ပိုးနေလျက်။

မှန်ထဲမှာပေါ်နေတဲ့မျက်နှာနုနုက အာရှသူဆန်ဆန် အပြစ်ပြောစရာမရှိအောင်ပြည့်စုံနေပေမယ့် အပြာရောင်ဘက်သမ်းချင်နေတဲ့မျက်၀န်းလဲ့လဲ့နဲ့ရွှေဝါရောင်ဆံနွယ်တို့ကအနောက်တိုင်းသွေးစပ်သူတစ်ယောက်ဆိုတာကိုသိသာစေတဲ့အချက်များပင်။

အညိုဖျော့ဖျော့ မျက်ကပ်မှန်ကို မျက်လုံးထဲနေရာတကျထည့်ပြီးတဲ့နောက်မှာတော့ မှန်ထဲကမိန်းမပျိုရဲ့နှုတ်ခမ်းထက်မှာအပြုံးခပ်ရေးရေးပေါ်လာတယ်။

မှန်ထဲမှာပေါ်နေတဲ့ သူမရဲ့ရုပ်ရည်နဲ့ခန္ဓာကိုယ်အချိုးအစားက ပုရိသတိုင်းနှစ်ခါမငေးပဲမနေနိုင်လောက်အောင် ဆွဲဆောင်မှုရှိလွန်းတာကိုတော့ငြင်းမရ။

အဆင်းတင့်တယ်ရုံတင်မကပဲ အရည်အချင်းလည်းထက်မြက်လွန်းတဲ့သူမကို လိုချင်သူများကလည်း ဒုနဲ့ဒေး။

တရုတ်က နာမည်ကြီးသူဌေးစာရင်းထဲမှာတစ်ဦးအပါအ၀င်ဖြစ်တဲ့ ဖခင်နဲ့ UKကFashion Brandကြီးတစ်ခုကိုပိုင်တဲ့မိခင်တို့ကြောင့် အန်နာဆိုတဲ့မိန်းကလေးရဲ့ ဘ၀ကလိုတိုင်းတ, ရခဲ့တာမလို့ အစစအရာရာပြည့်စုံနေပြီးသား။

စီးပွားဖက်တွေထဲမှာအန်နာ့ကိုသဘောကျနေကြတဲ့သူတွေအများကြီးမလို့ ခေါင်းခေါက်ရွေးလို့တောင်ရတယ်ဆိုပေမယ့် အချစ်မပါတဲ့အိမ်ထောင်ရေးတစ်ခုကိုတည်ဆောက်ဖို့စိတ်မ၀င်စားတာကြောင့် ဘယ်ယောက်ျားကိုမှလိုတာထက်ပိုပြီးမဆက်ဆံခဲ့ဘူး။

ဒါပေမယ့် အန်နာ့ဘ၀မှာပထမဆုံးအနေနဲ့ စိတ်၀င်စားမိတဲ့ယောက်ျားတစ်ယောက်က Xiao Groupပိုင်ရှင် ရှောင်းကျန့်ပဲ။

လုပ်ငန်းလုပ်ရာမှထက်မြက်လွန်းသလို တည်ကြည်ပြတ်သား‌တဲ့ရှောင်းကျန့်က အန်နာတို့အသိုင်းအဝိုင်းမှာ နာမည်ကြီးတစ်ယောက်။

ရှောင်းကျန့်ကိုအပြင်မှာမတွေ့ခင်က ကြားရတဲ့သတင်းတွေကြောင့် လေးစားရုံကလွဲပြီးတစ်ခြားစိတ်မရှိခဲ့ရိုးအမှန်။