ظلام عُمر

( 11 )

#ظلام_عُمر
#رقيه_عباس

وَماذا عَن الذي تَخشى عَليه الكَسر كسركُ ؟ .

بدر مني رد فعل قوي دفعته حيل من صدره ماشفت وجهه او معاني وجهه جانت ظلمه
يادوب ضوه خفيف

عفته ورحت للحمام جان اكو ضوه من باب الحمام مبين رحت وكفت كدام المرايه وسديت الباب قفلته

-ورطت نفسي ورطه بس الله الي يخلصني منها شلون هيج صار جان يكدر ميكول اسمها؟او يمكن راد يخليني اعرف مراح اصير مرته ولا افكر بهل شي؟او جاي يظهرلي انو هوه يحبها وميكدر يعيش ويه غيرها؟

بس اكو هواي طرق؟ ليش هيج سوه

المفروض هاي الليله تكون حلوه مثل اي شخصين متزوجين وحتى يسموها "ليلة العمر"

بس! جانت بالنسبه النه ثنينه عباره عن وجع وألم بألم

جنت احجيها واضرب على المغسله والميز واني قابضه ايدي بتعدت وانتجيت على الحايط

بهاي الليله بس ماكدرت الومه كدامه ادري بي يحبها وهوَ كلي يعني ماكدر الومه بس

من كالها حسيت بشعور شكد ما اكول قاسي ومؤلم مراح احد يحس بي صح ما احبه واصلاً ما اعرفة بس تبقى تأذي

احساس عبارة عن الم يترس الجسم داخلياً محد يحسه بس الي يعيشه

بهذا اليوم عرفت شكد اني ممحظوظه ووحيده نقهرت وهواي افكار هواي داهمتني حاولت اشرد منها  كمت غسلت وجهي

ولا دمعه نزلت من عيوني وليش حتى ابجي واتعب عـيونـي؟ على شي  ميتغير بـدمـوعي

غسلت وطلعت جان مموجود رحت المكاني وبعد تفكير دام ساعة حتى نمت وكل شوي اكعد صارت نومتي متقطعه لحد ما نمت وكعدت على صوت باب الحمام وراها اجه صوت المي بقيت بمكاني مغمضه ومتلفلفه بالغطه  لحد ما طلع عُمر من الحمام وره ربع ساعة تقريباً

حسيت بخطواته داخل الغرفة بقيت مثل ما اني مغمضه اجه وكف يمي من جهة رجليه  وكف تنهد وبده يصيح بـ اسمي

عمر:-  زينه

- كمت بسرعه واني خاله الغطه عليه باوعت بعيونه بدون كلام

عُمر:-صباح الخير

زينه:- صباح النور

عُمر:- كومي تريكي الاكل بره وغيري ملابسج حتى نرجع لان هواي عالم هناك موجودين مو حلوه نضل

هزيت راسي واشرتله يطلع من الغرفة بدون اي شي طلع اني كمت اخذت ملابس ورحت للحمام غسلت وبدلت اثناء مجاي اغسل انتبهت على ايدي عظمات ايدي لونهن ازرگ واكو احمر بيهم

-هاي شنو اصابعي كلها هيج بسرعة تذكرت من جنت اضرب المغسله بـ أيدي المكان جان بي ألم بي قليل  ، طلعت للصاله جان واكف بره بالبلكون