سحر عينيك

الحلقة الـ٢٠

رواية سحر عينيك
الحلقة الـ٢٠
بقلمي سارة ياسين

قلبي لاتنسون التصويت ، التعليق بين الفقرات ، مُتابعة لحسابي 🫶🏻 .

- هَـب الحَنين
أنـتَ وَينـك ؟لا قَريب و نِـعـتنيلَك
لا تِجي و نِلمحَها عـينك
راح نِمشي
و لأن ماڪو أنـتَ بَعد إلـمن نِدوم ؟
هيَ ظَـلت ذِڪرياتَـك
و أنتَ
و شويّه سوالِف
و أنتَ وَينك ؟
فاڪدينَك .

_________________________________

نداريت عليّ ، لگيته واگف وملامحه بَاردة مثله
ماتگدر تُعرف بشنو يفكر او اذا هو
فرحان
ضايج
مقهور
اول مرة اصَادِف شَخص مِثله ..

اردف ببرود وهو يتقدم للطاولة ويخلي السويچ وتلفونه
شاهين :- أخذي راحتچ انه داخل اسبح لو تريدين تروحين انتِ ؟

اردفت بسرعة
وتين :- لا ادخل انتَ عادي .

همهم بهدوء واخذ له ملابسه ودخل للحمام
بلعت ريگي واني اتنفس براحة ، بعده ؏ كلامه وما خلف بي
رحت طلعت لي تراك مَستور جايبته ويا غراضي

ووگفت ؏ المراة
صفنت بروحي
بدلتي
مكياجي
المفروض بهيج يوم اكون أسعِد أنسَانة ويا الشخص الي راح اكمل حياتي وياه
الـ راح يعوضني علىٰ كُل قهر شفته
وكُل ألم عشته

بس للأسِف الي صار عكس كُل شي تمنيته ..

هزيت راسي ابعد الافكار الـ بدت تحتل عَقلي ، بديت افتح بشعري الحمدلله ما تعبني هوايه بسرعة نفتح
ويا أخر ماشه وخرتها

نفتح باب الحمام وطلع هو
شعره ينگط مي ، لابس تشيرت اسود نص ردن وبجامه والخاولي علىٰ كتفِة ينشف بشعره

تقرب اخذ تلفونه وگعد علىٰ القنفة بدون ما يصدر أي كلام ، هذا الشخص راح يخبلني بتصرفاته

بعدت عيوني عنه واخذت ملابسي وغراضي
غسولات وشامبوا لأن ما أمن بلفنادق
دخلت سبحت

طلعت بعد فترة لافه المنشفة علىٰ شعري ، لگيته گاعد يتصفح بلتلفون
رفع نَضره ورجع نزله بلا مُبالاة .

جففت شعري وضفرته
ندگ الباب ، گام هو وشوية ورجع
طلعوا اهل الفُندق دازين العشه
خلاه علىٰ الطَاولة واردف

شاهين :- تعالي أكلي ..

رمشت بعيوني هذا شبي يحجي كلمتين ويسكت ؟الكلام عنده بفلوس لو شنو ؟
اخذت نفس عميق واني اهدي بروحي
واعرف جايتني أيام
يجوز اصعب من الفاتو

تقربت كعدت يمه ، جان العشَا هواية متنوع مشويات ومقبلات ، فواكه وحتىٰ بقلاوة بكل انوعها
بدينه ناكل والصَمت يعِم بـ ارجاء الغُرفة ..

كملت بسرعة وگمت
وهو هم ما اكل هوايه
جان هادئ وهدوئه غَريب
ما اعرف شخصيته هيچ
لو بسبب الزواج هيچ ؟ ..