انت املي _ باللهجة الجزائرية 🇩🇿 _

بارت 1

قبل ما نبداو اي واحد راح ينقل الحكاية بلا ما يتواصل معايا و يستاذن ما يلوم غير روحو اذا لقيتو مبارطاجيها عندو ، الواتباد يمد لكل كاتب حقوق الطبع و النشر سما مكالاه ترفدوا تعب الناس بلا اذن

فتحت عينيا نثاوب كي سمعت صوت اذان الفجر ، عينيا نحسهم يوجهو و جسمي مكسر راسي يقول غمضي عينك و رجعي ارقدي
استغفرت ربي و رفدت الغطاء لي عليا ، لبست بانتوفتي و رحت توضيت
حطيت الحصيرة لبس طقم الصلاة و صليت كملت و سلمت طلعت يديا للي خلقني للوحيد لي يفهمني دعيت منبعد وقفت رفدت الحصيرة طويتها و نحيت الطقم
النعاس لي كان حاكمني راح ؛ وقفت قدام التاقة نشوف فقطرات الشتاء لي يهبطو و دموعي بداو يهبطو معاهم تلقائيا
من يوم يومي حساسة نبكي بالخف و منبينش حتى و تجرحني و تاكلني و نقعد ساكتة
هاذي انا رنيم عمري 25 سنة مقعدليش بزاف و ندير 26 ، نبان اصغر هه هكا يقولولي ؛ حنا فالدار اربعة بنات انا اكبرهم منبعد لجين 24 سنة منبعد ريهام 22 سنة و اخر العنقود سلسبيل 16 سنة
عايشين مع ماما حياة و بابا يوسف لي يجي كل ثلاثة شهور باش يشوفنا بحكم يخدم فالصحراء شحال نتوحشو ... بابا ماشي مجرد اب بابا اكبر نعمة رزقني بيها ربي نحبو و نحترمو لدرجة لا توصف هو بابا و صاحبي و خويا و كلش قريبة ليه لدرجة منقدرش نتصور حياتي بلا بيه

حطيت راسي على التاقة و و تنهدت ؛ دورت راسي بالزربة نخزر فالساعة لقيتها السبعة شهقت

رنيم : اياه راح الحال

خرجت نجري لشمبرة سلسبيل ؛ دخلت لقيتها راقدة تشخر رحت نحرك فيها

رنيم : سوسو هيا نوضي

رحت نفتح فالتاقة باش تتهوا الشمبرة و نهدر فنفس الوقت

رنيم : سلسبيل هيا نوضي راح الحال

ما خرجتش من الشمبرة غير كي تاكدت بلي ناضت ؛ لميت شعري و دخلت للكوزينة نوجد فالقهوة ؛ فوقتها دخلت ماما

رنيم : صباح الخير
حياة : صباح الخير
..........

قعدت حياة و رنيم كملت وجدت القهوة و تلمو على الطابلة رفدت حياة ترشفت من الفنجان و طلعت راسها لسلسبيل لي دخلت و جبدت الكرسي و قعدت
عقدت حياة حواجبها و نطقت

حياة : نحي عليا الخماج لي فمك
سولا : غلوس هذا غلوس يا ماما .... اصلا شفاف ميبانش وعلا....
حياة : نحيه خير منكسرلك راسك ؛ قاتلك غلوس مزال مخلقتي وليتي تتمكيجي و تخرجي و لوين للمسيد
سولا : خلاص راح نحيه خلاص
حياة : و وقتاش شريتيه هااا
سولا : مشريتوش ماما مشريتوش تاع رنيم ديتو

تبسمت رنيم على مناقرتهم بصح هذيك الابتسامة راحت وقت نطقت حياة
......
رنيم تحكي ***

حياة : مفهمتش لاه مخبية المكياج هذاك ما درتيه ما خليتي الناس تتمتع بيه لوكان مديتيه للجين و ريهام يديروه قال يديروه لرجالهم ماشي كيما نتي مفهمتش بلحطناك بالمكياج البارح و الراجل معجبتيهش

بلعت غصتي و هبطت راسي

سولا : ماما ...
حياة : روحي تقراي هذاك هو ... يلااه

حسيت لسولا لي تخزر فيا بحزن منبعد خرجت

حياة : ديري الطعام للفطور و حطي اللوبيا تتشمخ
رنيم : ايه

ناضت ماما و انا عينيا تغرغرو بالدموع ، نضت فرزت الحالة و رحت سيقت الدار هذا هو الروتين تاعي
دخلت للدوش غسلت يديا من النشاف ؛ قابلتني بوشات تاع المكياج تاعي محطوطة تما غمضت عينيا نتفكر فكلامها ، هاذي هي معاناتي انا اكبر وحدة فخواتاي و كيما يسميني المجتمع بايرة ؛ لجين تزوجت فال 19 و موراها ريهام فال 21 سنة ، ماما من الناس لي تقدس بزاف الزواج و اول واحد يطرق بابنا تحب تمد بنتها ليه باش تتهنى عليها على قولها بصح انا زهري مكانش كيما خواتاتي رغم لي شابة و معندو مخصني بصح مجاش مكتوبي و البارح جا واحد يشوفني حكاو عليه لماما قال يناسب رنيم ، مطلق عمره 40 سنة و عندو زوج ولاد مالغري مكنتش حابة الفكرة بصح قبلت غير على جال ماما اما بابا كان معارض الفكرة تماما بصح ماما اصرت قالت بلي راهي بدات تكبر راهي متستناش صاحب ال 20 سنة يخطبها و فالاخر انا قنعت بابا غير باش متزعفش ماما
المهم كيما كان الحال جا و شافني بصح معجبتوش قال حاب وحدة تكون اصغر و سيفيليزي ههه ضحكني و زاد على ما بيا يعني الغلطة فيه ماشي فالمراة لي طلقها

زيرت على البوشات لي كانت فيدي و جبدت منها المكياج كسرتو و رميتو داخل لابوبال دايمن هكذا نفرغ غشي و زعافي فالقش ، تبسمت بقهرة و كلام ماما يتعاود في وذني ، نعرف لي حابة تشوفني كيف اندادي براجلي و ولادي بصح هذا مكتوب و مراهيش فيدي حتى انا متمنية نلقى راجل يحبني و يحترمني متمنية نعيش دور الحبيبة و الزوجة و الام مسحت دمعتي لي هبطت لي عييت نحاول نتحكم فيها بصح مقدرتش دايمن قاعدة على شفارتي تستنى فالسبة باش تهبط ؛ مروحت بيدي على وجهي و غسلتو خرجت للكوزينة طيبت بعدما كملت طفيت على النار و رحت رفدت طبسي حطيت فيه الفطور غلفته و رحت لشمبرتي جبدت خيماري حطيتو على راسي و لبست عبايتي و رحت للصالون

هذه هي اول حلقة البنات نحب نلقى تفاعل باش نكملها راح نحاول نحطلكم يوميا راني نسيي نكتب و نظم فيها قد ما نقدر نطلب منكم تصبروا شوية عليا باسكو راكم تعرفوا راني نقرا ماشي كيما موالفة نكتب فليفاكونس و نحب نلقى تفاعل باش نكمللكم 💛💚