انت املي _ باللهجة الجزائرية 🇩🇿 _

بارت 45 و 46

الكلام تقطع على الكف اللي جاها مجات طلع وجهها كانت زادتلها دوزيام

حياة : هاذي هي رنيم نولد و نربي و نكبر باش مع الاخر تقوليلي هكذا هذا حقي ... منحبش نزيد نشوف وجهك فهمتي

خرجت و خلاتني حسيت روحي ندمت لي قلتلها هكذا مهما كان تبقى ماما و ملازمش نقوللها هكذاك ؛ بابا لي دخل و مسحلي على راسي

يوسف : خليها يامات و تنسى ياك بنتي

درتلو براسي ايه و حطيت راسي على كتفو

يوسف : رنيم بنتي واش رايك تروحي تقعدي يامات عند مانك و كي تهدى الحالة ارجعي و على الخدمة خلي انا نهدر مع صاحبي يشوف مع وليدو كيفاش يديرلك يامات كونجي هكذا

درتلو براسي ايه

يوسف : صحا بنتي ارقدي دوكا ريحي و غدوة صباح ان شاء الله نديك

درتلو براسي ايه و هو خرج ؛ تنهدت و حطيت راسي على المخدة قاعدة غير نتقلب و النعاس محبش يجيني قعدت هكذاك حتى اذن الفجر صليت منبعد رقدت شوية و نضت على سولا لي نوضتني

رنيم : سولا ... صباح الخير
سولا : صباح الخير ... رنيم بابا قالي نقولك وجدي روحك
رنيم : اممم

نضت غسلت وجهي و جبدت كابة صغيرة حطيت فيها حوايجي ؛ درت عبايتي و خرجت كارهة لقيت ريهام و سولا واقفين مع بابا سلمت عليهم و خرجت
الطريق كامل و انا عقلي غايب فوسط التخمام لقيت روحي رقدت واحد ساعة هكذاك نوضني بابا كنا وصلنا

يوسف : رنيم هيا نوضي

تفاطنت منبعد لقيت روحي قدام دار ماني هبطنا ؛ بابا دخل سلم عليهم و رجع و انا دخلت للشمبرة لي كانت وجدتهالي مرت خالي سمرة

رنيم : يعطيك الصحة طاطا
سمرة : بلا مزية حنونة كشما خصك قوليلي و نتي دوكا ريحي منبعد اهبطي ريحي معانا شوية راني نعرفك تحشمي
رنيم : ههه خلاص دوك نسقم حوايجي و نهبط

نعرفكم هنا فهاذ الفيلا كاين ماني و خالي الكبير حسين  عايش معاها هو و مرتو سمرة معندهمش لولاد على هاذي تلقاهم يفرحو بينا بزاف كي نروحو و طاطا سمرة تموت على البنات كي نروحو حنا و بنات خوالاتي تلقاها مسكينة غير تفرح بيهم و تشرليهم و طيبلهم و ديرهم فعينيها و كاين خالي الوسطاني نبيل غير كيف تزوج بسارة و الصغير خالد و هو طبيب نفسي
........

سلمى : نورتولي داري كي جيتو علبالكم فرحتوني كي جيتو
ليال : تعرفي كل مرة نقولو نجيو حتى ميرا تقولي كل يوم نروحو نشوفو طاطا راكي تعرفي مع شغالات الدنيا لي ميخلاصوش
سلمى : علبالي علبالي المهم جيتو ايه ليال كيفاش راهم داركم
ليال : راهم سافا طاطا
سلمى : و نتي ميرا عمري كيفاش راكي نتي و غيث تعرفي الهامل هذاك عندي 3 ايام و انا نعيطلو ميردش حتى الدار مراهوش يجي
ليال : ههه يكون راهو مع لالة
سلمى : شكوون هاذي !!!