انت املي _ باللهجة الجزائرية 🇩🇿 _

بارت 13

ناضت رنيم صباح لبست لي لقاتو قدامها و خرجت ؛ تخمم ففاطمة و واش تكون دارت حاسة بالدوخة تدي و جيب فيها من قلة الماكلة و التخمام لي راهي فيه ؛ رجليها جمدو وقت شافت فؤاد مقابلها مرة اخرى لي وقت شافها جا عندها

فؤاد : حاسبة روحك راح تهربي ... راح تخلصيها غالية بزاف نتي و ختك

رنيم محبتش ترد عليه و هي اصلا معلبالهاش واش تقول ؛ جات جايزة طبعها

فؤاد : كي نهدر متحطينيش فالثقيل ؛ على حساب الشوفة محبيتوش تفهمو بالملاحة خليني نشوف واش راح ديرو كي نبهدلكم قدام كامل الحومة

رنيم ولات ترجف حاسة روحها راح تطيح ماشي موالفة بهاذ المشاكل و حياتها كامل متفايدتهم و اليوم ختها جابتهملها 

ادم : هيا وريلنا واش راح دير

رنيم تحكي :

دورت راسي متفاجئة من صوتو لي جا مورايا

فؤاد : واش دخلك نتا
ادم : ارواح معيا عندي هدرة معاك
فؤاد : معندي حتى هدرة معاك
ادم : ايه نتا تحب تهدر مع النسا نسيت

خبطو بيدو لكتفو

فؤاد : سقم هدرتك معايا
ادم : كيفاش

كنت خايفة تنوض بيناتهم ولا ؛ حاسة روحي عايشة ففيلم حياتي كانت هادئة بزاف مفهمتش وقتاش ولات فيها هاذ الحكايات رجفت وقت شفت ادم جبد يد فؤاد لي كانت على كتفو ؛ سمعت غير صوت صباعتيه كي تكسرو و فؤاد عيط من الوجع حتى هبطو دموعو

ادم : و دوكا جي ولا لالا

دارلو فؤاد براسو ايه و تبعو ؛ قاعدة ندلك فصباعتيا حاسة صباعتيا لي تكسرو قلبي شوية و خرج من بلاصتو ، قعدو شحال و هما يهدرو بعيد منبعد فؤاد راح و ادم زاد شوية و جا

ادم : مراحش يزيد يقلقكم كامل و لا يهددكم

هدر هدرته و راح ، تبسمت و حسيت روحي رتحت روحت للاكراش فرحانة حاسة عبئ ثقيل و راح عليا
دخلت كيما العادة و جاز الصباح عادي مع الولاد لي والفتهم بزاف و والفوني ، قاعدة ناكل فالروز لي جبته معايا باسكو منحبش ناكل بزاف برا حتى تفكرت لي صرا صباح وليت نتبسم وحدي ، خيره منقدرش ننساه عرفته غير البارح و ساعدني شحال من خطرة و بلا مقابل بصح روماركيت بلي جاي شنايفي تتمتم يتشنف تمتم يتقلق ، قاطعتلي افكاري رهف لي دخلت ؛ فيدها حبة بانان تاع الفطور تاعهم

رنيم : رهف حبيبتي واش راكي ديري هنا

قسمت نصف من البنان تاعها و مدتلي

رنيم : هذي ليا اوووه صحا

رهف من بين البنات لي عاقلين بزاف هنا بصح متهدرش بزاف و دايمن جابدة روحها الشي لي محيرني ، جاست لي دارتو دوكا قاسني فرحت بزاف كي مدتلي معاها باسكو انا من الناس لي تقدر الاشياء لي يديرها الغير ولو كانت صغيرة ، لقيتها تلاحت عندي معنقتني

رهف : نحبك
رنيم : ياعمري مام انا نحبك
رهف : .... نقدر نقولك ماما

جمدت من هدرتها و تبسمت بسيف

رنيم : وعلاش ماماك وين راهي

دارتلي بكتافها معلباليش

رهف : عمو يقولي بلي راهي عند ربي و انا معنديش ماما .... هنا كامل عندهم غير انا

تبسمت بقهرة وقت فهمت بلي ميتة

رنيم : و انا واش راني ندير هنا ؛ رهف الشابة و العاقلة تقدر تعتبرني كيما ماماها ياك
رهف : صح
رنيم : ايه 

بدات تصفق و تضحك اول مرة نشوفها تضحك هكا ؛ حطت راسها على صدري و غمضت عينيها و انا قاعدة نلعبلها بشعرها

ريحاب : اوهوه رهف واش راكي ديري هنا
رهف : راني مع ماما
ريحاب : كيفاش وقتاش ولداتك باش تكون يماك
رنيم : ريحاب وشبيك ... رهف حبيبتي روحي ارمي قشور البنان و شوفي صحابك واش راهم يديرو

دارتلي براسها ايه و راحت

ريحاب : واش درتي يا طفلة
رنيم : واش درت طفلة قاتلي اذا معليش نقولك ماما و يماها ميتة واش نقوللها غاضتني مروحتش تبنيتها ولا تزوجت بباباها
ريحاب : هكذا و صح تتزوجي بيه
رنيم : الله يهديك
ريحاب : حابة نفهم وعلاش جاية عاقلة و رزينة هكذا
رنيم : ههه راكي تشكري ولا تعايري 
ريحاب : ههه لالا صح حابة نتعلم شوية باسكو لساني متبري مني
رنيم : اممم بزاف ناس ميحبوش واحد عاقل على هاذي اقعدي كيما راكي خير
ريحاب : بالعكس نتي مليحة و نية بزاف بصح مرات كاين ناس كي يعاملوك بالسيئة لازم تردي حقك
رنيم : بصح ربي وصانا نقابلوا السيئة بالحسنة يعني مول النية دايمن يربح و اذا مربحش يسلك على خير بلاك صح مرات تكوني تسمحي فحقك على حساب غيرك الشي لي انا صح ما نحبوش فيا بصح نلقى ربي يديرلي مخرج من حيث لا يحتسب نمدلك مثال الرسول عليه الصلاة والسلام مالغري كانوا بزاف ناس معاديينو و ماشي ملاح معاهم بصح كان متسامح معاهم و هذا ما يعنيش ضعف الشخصية بالعكس ؛ معلباليش اذا قدرت نوصلك المساج بصح  كوني على حساب الشخصية لي نتي تريحك منقدروش نكونوا  كامل كيفكيف كل واحد متميز بصفاته
ريحاب : ههه هدرتك شابة

هذا هو البارت ان شاء الله يكون عجبكم خليولي ارائكم فالتعليقات و اقتراحاتكم و فرحوني بتفاعلكم حق ما حطيتلكم هاذ الحلقات الزينات 💗💗💗