ادم : حبو يروحو يشرو ادم يدي حبو يخرجو يحوسو ادم يدي مرضو ادم يدي راكي تشوفي فيا شوفور ياك كاين حاجة اسمها تاكسي يرفدك من باب الدار و يرجعك لباب الدار
فاطمة : وعلاش نرمي دراهمي فالتاكسي و نتا عندك طونوبيل
ادم : ايه بارسكو ليصونص باطل
دورت راسها و تشنفت
ادم : سما نتي عندك دراهم باش ديري العشاء و معندكش حق تاكسي ... يا سيدي خلاص انا نخلصلك ماتزعفيش برك
فاطمة : منحبش لي تاكسي متفهمش كاين بزاف لي يسرقوهم مشفتهمش
خبط الكاس فوق الطابلة
ادم : راكي ديري فالسبايب بلعاني ولا واش
فاطمة : اذا انا منحبش تاكسيات تسيفهم عليا ؛ خلاص متوصلني ما نوصلك دوك نشوف كمال يوصلني وخلاص
ادم : و شكون هذا كمال تاني
فاطمة : كمال وليد نورة و سورتو كي نقولو رنيم راهي جاية معايا يجي يجري ياك انا مسكينة عندي الرجال في باطل خلي ولاد الناس يوصلوني
ادم : ديري لي تساعدك
بقلمي انا youchroniquedz
رفد لافاست تاعو و خرج و هي تشنفت
فاطمة : راسو يابس حجرة
سمعت لاصونات تبسمت
فاطمة : ياعيني ولا
راحت فتحت الباب لقاتها رنيم عوجت فمها
فاطمة : هاذ الشي نتي
خلاتها فالباب و دخلت و رنيم دخلت و غلقت لباب لاحقتها ؛ قعدت فاطمة فالكرسي مشنفة حتى دخلت رنيم
رنيم : ماني وعلاش راكي ديري كيما الدراري الصغار
فاطمة : رنيم راني زعفانة منك و مرانيش حابة نهدر معاك
رنيم : ماني حبسي ما ديريلي هكذا
فاطمة : خليتيني نشوف البعيد باش يجي عندي و يقين مسكينة عندها لي كور ليوم مقدرتش جي معليش نتكل على ربي و نروح وحدي
رنيم : سما خلاص مراكيش حابة نجي معاك
فاطمة : لالا منعذبكش
رنيم : ماني
تبسمت فاطمة و فتحت يديها
فاطمة : ارواحي نعنقك ارواحي
ضحكت رنيم و عنقتها
رنيم : ايه هيا مالا نروحو
فاطمة : ايه
رنيم : مالا نشوف تاكسي يجي لينا بارسكو طونوبيل مزال مجبتها من عند لميكانيسيان
فاطمة : ايه
سمعوا الباب وقت تفتح ؛ فاطمة عقدت حواجبها وقت شافت ادم رجع
فاطمة : ادم !! كشما نسيت ؟؟
ادم : ماشي قلتي ديني نشري
تبسمت فاطمة
فاطمة : ربي يخليلي وليدي العزيز الغالي
ادم : هيا تروحوا ولا مزال
فاطمة : خلاص نروح ندير حجابي و نجي
راحت فاطمة تلبس حجابها ؛ رنيم خزرت فادم و تبسمت و رجعت دورت راسها تتفادى فيه واحد زوج دقايق كانت فاطمة جات وقتها خرجوا
فاطمة ركبت مالقدام و رنيم كانت ماللور ؛ قبل ما يديماري صونا تليفونو
فاطمة : خير ان شاء الله
ادم : الو ... شكون نتيا ... ايناس !!! .... ايه ... خلاص دوك نشوف معاها
هو غير كوبا نطقت فاطمة
فاطمة : خير ادم
ادم : ايناس بنت ختك ، قاتلك بلي ختك راهي مريضة و طلبت تشوفك و مصبح و هوما يعيطولك مرفدتيش
فاطمة : اخااه وشبيها البارح برك كنت نهدر معاها واش صرالها
جبدت تليفونها
فاطمة : اياه عيطولي 5 مرات و مسمعتوش يا ربي واش يكون صرالها
دموعها بداو يطيحو
ادم : ماني خلاص دوك نديك عندها حبسي متبكي
رنيم : مراح يكون غير الخير متتقلقيش ماني
فاطمة : عندي ختي وحدة يا رنيم شكون من غيرها لوكان كشما يصرالها نهبل
ادم : ماني بلاك مكاين والو
فاطمة : ان شاء الله ان شاء الله
ادم : ... انا مفهمتش بنت ختك منين جابت نيميرو تاعي
فاطمة : حنا وين و هو وين
رنيم : ماني انا نولي مالا منعطلكمش كثر
فاطمة : وين و القضيان كيفاش
رنيم : ماني صحة ختك قبل
فاطمة : ايه معليش انا حطني عند ختي و نتوما روحو شريو منبعد جوزو عليا
رنيم : بصح
فاطمة : رنيم لازم ليوم نكمل القضيان باسكو العشاء نديرو فالاخر تاع السمانة
رنيم سكتت و ادم غمض عينيه يكالمي فروحو و ديمارا شوية هكذا وصلوا
فاطمة : رنيم كيما وصيتك لاليست راهي عندك
رنيم : ايه كوني مهنية
فاطمة : ادم كي تقربو تلحقو عيطولي
هبطت فاطمة منبعد ولات طلت على رنيم
فاطمة : و نتي راح تقعدي تما
رنيم : مفف ... مفهمتش
فاطمة : ادم ماشي شوفور باش تركبي ماللور
زيرت على ساكها وجهها حمار من الحشمة هبطت و قعدت مالقدام و هو هدر بالتشناف
ادم : مكنتش راح ناكلك كي تركبي مالقدام
قعدت ساكتة محبتش تريبونديلو ؛ وصلوا للسوبيرات و هي هبطت و هو قعد يستنى فيها ساعة و زوج و مزال مخرجتش
ادم : **** **** يلعن الراس لي خمم يولي يديهم
فتح الباب رايح يحوس عليها حتى يلقاها جاية ؛ راح فتح لامال حطو القضيان و ديمارااا
💙 هو البارت ان شاء الله يكون عجبكم خليولي ارائكم فالتعليقات و اقتراحاتكم و ارائكم و الى الملتقى ان شاء الله 🧡💛💚
أنت تقرأ
انت املي _ باللهجة الجزائرية 🇩🇿 _
Romanceحكايتنا هاذ المرة غير باقي التفاصيل تعرفوهم فالكرونيك الكرونيك من تاليفي و هي من نسج الخيال 💛
