انت املي _ باللهجة الجزائرية 🇩🇿 _

بارت 62 و 63

دخلو هو و يقين و هي دارت لمروان خرجتلو لسانها و دخلت

مروان : اتحماي بيه دوكا

.....

فاطمة : راهو جا ادم

راحت عنقتو

فاطمة : واشراك يا وليدي
ادم : الحمد لله ماني
فاطمة : توحشتك هاذي غيبة يا ادم
ادم : مام انا توحشتكم
رباب : مساء الخير ادم
ادم : مساء الخير رباب ... ايه وقتاش يجيو
مروان : شوية هكذا نخرج نجيبهم قالولي ستة يكونوا هنا
ادم : خلي معليش انا نروح
مروان : لالا نتا ريح هذا وين وصلت من الصباح و نتا تسوق
فاطمة : ايه خلي خوك يجيبهم و نتا ريح
ادم : ايه كيما تحبو ؛ سمحولي انا نطلع نحط حوايجي
فاطمة : خوذ راحتك

طلع ادم و خلاهم ؛ فتح الباب و دخل حط الكابة فوق البونك و طاح متكسل فوقو ؛ حط يدو تحت راسه يخمم حتى دخلت فاطمة فيدها القهوة

فاطمة : ادم جبتلك القهوة وليدي
ادم : لوكان مشقيتيش روحك
فاطمة : تعبك راحة ... قولي فواش راك تخمم
ادم ( تنهد ) : والو
فاطمة : و وقتاش راح ترجع
ادم : غدوة عشية ولا غير غدوة صباح ان شاء الله
فاطمة : وعلاش عليك هاذ شقا يعني انا مراهيش عاجبتني الخدمة هاذي فولاية واحد اخرى راك غير تتمرمد
ادم : ..... راني نخمم ندير transfert لهنا
فاطمة ( تبسمت ) : صحح
ادم : ايه مام انا مخرجتش عليا هكذا
فاطمة : درت زينة العقل ... انا نخليك تريح شوية

خرجت فاطمة ؛ غالقة موراها الباب

.......

قاعدة تمسحلها على شعرها

ليال : خلاص ميرا خليها عليا انا نعرف واحد يعرفلي شكون بيراطالك الكونت و دارلك هكذا
ميرا : معندها حتى فايدة دوكا 😭 .... صورتي تشوهت قدام طاطا سلمى و غيث واش بقالي
ليال : هذاك غيث خليني انا نتفاهم معاه كيفاش يديرلك هكذا ... و فرضا صح واش بعتولو مكان مدخلو ديري واش تحبي .... زعما ميكونش يحبك على هاذي غار كي شاف هذوك التصاور
ميرا : اخر همي اذا غار ولا لالا .... ( مسحت دموعها ) .... ليال تقدري تخليني حابة نرقد
ليال : ايه .... اتهلاي فروحك انا نروح و غدوة ان شاء الله نولي

دارتلها براسها ايه و خرجت

.......

هبطو من الطونوبيل ؛ غير حط رجلو فالارض طلع راسو يخزر فالدار تبسم برضى عجبتو ؛ اليد لي تحطت على يدو خلاتو يدور راسو متبسم معاها ، وجهو كان صفر و فوق هذا شيان بزاف ما قعد مو غير العظم منصف لي كان طول و عرض ذاب مع المرض

رحمة : قتلك استناني نعاونك تهبط
منصف : و انا قتلك قادر على شقايا

فاطمة خرجت تجري من الباب و موراها يقين ؛ عنقت منصف و الدموع فعينيه

فاطمة : منصف وليدي توحشتك ... الحمد لله لي رجعك ربي ليا بخير
منصف : خلاص راني هنا معاكم يما
فاطمة : الحمد لله
يقين : بلاكولي خليولي بابا