انت املي _ باللهجة الجزائرية 🇩🇿 _

بارت 32

رنيم : وعلاش تزغرتي يعني
فاطمة : يا بنتي تبدلتي كامل شفتو شفتو رنيم داتهالكم كامل انا نقوللهم رنيم هي الشابة كامل مسكينة مخبية زينها برك
رنيم : ماني حشمتيني
فاطمة : ههه خلاص
رنيم : و يعطيك الصحة كي بعتيلي الروبة
فاطمة : بووه انا لي لازم نشكرك وقفتي معايا وقفة ولادي موقفوهاش

تبسمت رنيم و غير دورت عينيها جاو فعينين ليال لقاتها تخزر فيها واحد الخزرة راح تاكلها

رنيم : انا نروح للكوزينة نعاونهم
ريحاب : استناي نجي معاكم

.....

رنيم : طاطا واش ندير
رحمة : هي خواتاتك و هبة و وسام راحو يسقمو الطوابل فالصالون اممم روحي نتي و يقين و صاحبتك للدار لي اونفاص شوفو اذا الطيابات وجدو الطباسا جيبوهم ( لي مفهموش النسا يتعشاو فدار فاطمة و الدار لي اونفاص يتعشاو فيها الرجال و الطياب طيبو فالكوزينة تاع الدار لي اونفاص فوالا )

خرجوا بين ثلاثة غير لحقو للدار هديك لقاو الرجال يسقمو فالطوابل فالصالون و فالشمبرة
هما دخلوا ديراكت للكوزينة

رنيم : خالتي غير ابداي وجدي الطباسا تاع النسا بارسكو دوك شوية يبداو يعشيوهم

ستناو شوية منبعد حطولهم الطباسا

رنيم : انا ندي طباسا تاع شلاظة و ريحاب نتي جيبي الشربة و يقين جيبي البوراك و منبعد نوليو
يقين : ايه

رنيم رفدت الطباسا و خرجت هي غير خرجت قابلها ادم خارج من الصالون غير شافته كملت تمشي بلا ما تعبره حتى نطق

ادم : يقين واش جابكم هنا
يقين : اهههه ... ادم ماما بعتتنا نجيبو الماكلة بارسكو راح يبداو يحطو للنسا
ادم : خلي دوك حنا نجيبوهم
يقين : ااي ... ايه
ريحاب : معليش يقين نورمال نديوهم انا و رنيم مدام خوك محبش بلاك محبش عليك كي كاين الرجال ؛ خلاص خويا متشقيوش روحكم دوك انا و رنيم نجيو نديوهم
ادم : قتلك بلي انا دوك نجيبهم

راح و خلاها ؛ يقين راحت و ريحاب جرات عند رنيم

ريحاب : واقيلا محبش كي شافك نتي هنا و دارها سبة
رنيم : راكي تتخايلي بزاف
ريحاب : بصح عندك الحق ياختي السيد يهبل تقول جاي من كاش مسلسل تركي ولا
رنيم : حبسي ما تزيدي عليها السيد نورمال
ريحاب : مالا واش عجبك فيه
رنيم : نهار نعرف نقولك

ضحكو و راحو للدار ؛ بداو يحطو فالماكلة و دخلوا تعشاو لي كان يغسل الماعن يغسل و كاين لي كان يتعشى كاين لي كان يسربي و يدي و يجيب و رباب مع عبد الرحيم لي محبش يسكت بالبكاء و الناس كل  دقيقة جي تحوس عليها باش تباركلها

رنيم : رباب مديلي عبد الرحيم نديه للشمبرة يرقد راهو عذبك
رباب : زعما يسكتلك
رنيم : نسيي
رباب : تعيشي

شدتو و راحت لشمبرة ادم ؛ قعدت فوق البونك معاه بحكم الشمبرة تاع فاطمة فرغوها باش يعشيو فيها

رنيم : عبد الرحيم عمري هيا اسكت

قاعدة تبوس فيه و تهدي فيه حتى سكت شوية هكذا لقاته رقد باسته بلعقل ؛ عينيها دمعو تمنات لوكان اليوم راهي مع وليدها هكذا ، افكارها تقطعو وقت تفتحت الباب دورت راسها لقاتو ادم دخل خزر فيها و هي رجعت دورت راسها ؛ راح للخزانة فتحها جبد منها دراهم حطهم فجيبو و رجع غلقها ، هي قعدت مدورة راسها باش متشوفش فيه

ادم : نتي راح تقعدي قالبة وجهك عليا

محبتش ترد عليه و قعدت ساكتة

ادم : رنيم راني نهدر معاك

دورت راسها بلعقل

رنيم : انعم
ادم : كيفاش انا نهدر معاك و نتي حاطتني فالثقيل
رنيم : مرانيش حابة نهدر ياك ماشي بسيف

رجعت دورت راسها حتى تلقاه قعد قدامها ؛ دارت عندو لقاته يخزر فيها خزرة جامي شافتها فعينيه حمارت و دخلت بعضها

ادم : راح تقعدي زعفانة هكذا ؛ ياك تعرفيني كي نتقلق نهدر برك مقصدتش نزعفك

زادت حمارت كثر جامي توقعت تسمعو يقوللها هكذا

ادم : مراح تقولي والو
رنيم : .... بصح نتا في كل مرة تعيط عليا بلا سبة
ادم : ايه و نتي شفتي كيفاش ندير لختي و نتي كيفاش نفرغ فيك زعافي ياك

زيرت على يدها يعني سمعها كي كانت تهدر مع فاطمة

رنيم : اممم هي ختك باينة متحبش عليها و بنات الناس نورمال
ادم : ايه و وعلاش مكملتيش هدرتي
رنيم : واش نكمل !!
ادم : على ليال واش كنتي راح تقولي عليها
رنيم : اههه ... والو مكنت راح نقول والو
ادم : خرجي لي في فمك
رنيم : مكاين والو
ادم : كي شفتيني دخلت معاها لهنا معلباليش واش جا فراسك بصح سحقيتها فحاجة قلتهالها
رنيم : اممم
ادم : واشنو اممم هاذي
رنيم : يعني اذا كانت حاجة بيناتكم مكان ما دخلني
ادم : انا و ليال !! منين جبتيها هاذ الهدرة
رنيم : معلباليش قلت بلاك حتى ماني و ... قالت هكذا
ادم : ماني ... علبالها مليح بلي مكان والو بيني و بين ليال و مراحش يكون بيناتنا amitié برك
رنيم : اممم
ادم : هذا ما كان

دارتلوا براسها ايه

ادم : مزالك زعفانة

دارتلو براسها ايه

ادم : واش ندير باش يروحلك الزعاف
رنيم : متزيدش تعيط عليا هكذاك
ادم : نسيي

ناض منبعد عاود رجع

ادم : رنيم
رنيم : انعم
ادم : منين ليك هاذ الحوايج
رنيم : كيفاش معنديش حوايج ولا ...
ادم : قصدي ماشي موالفة تلبسي و ديري فروحك هكذا
رنيم : حبيت نبدل منقدرش
ادم : نعرف وحدة متحجبة تكون ساترة يديها و شعرها قدام الرجال
رنيم : لي هنا كامل متحجبات و نحاو الخيمار فالعشاء و منهم مرت خوك
ادم : رباب عندها مروان يحكم فيها
رنيم : و انا عندي بابا يحكم فيا

ضيق عينيه و هبط عندها

ادم : لسانك طوال مروماركيتيش
رنيم : وعلاش واش قلت
ادم : ما قلتي وااو 

خرج و خلاها قريب وجهها ما طرطق

هذا هو البارت ان شاء الله يكون عجبكم خليولي ارائكم فالتعليقات و اقتراحاتكم و الى الملتقى ان شاء الله في بارت اخر 💚