انت املي _ باللهجة الجزائرية 🇩🇿 _

بارت 5

خديجة : ههه طاطا عارفة واش راكي تهدري راكي تمعني عليا
حياة : اذا فهمتيها عليك فالغلطة راهي فيك و دوكا اخرجي منا
ريهام : ماما لهنا و خلاص كيفاش تحاوزي صحبتي هكا
خديجة : خلاص ريهام خليني نروح
ريهام : اصبري

نحاتلها يدها و خرجت

ريهام : ماما كيفاش ديريلها هاكا واش دارت حق الخير اصلا انا قاتلي على هاذ الحكاية مفهمتش وين راه المشكل السيد مرفه منها نتي تتهناي عليها و هي تاني ....

هبطو رنيم دموعها ولات تحس روحها عجوزة ماشي وحدة عمرها 25 سنة و هي اصلا مزالها صغيرة ، قعدو يخزرو فيها هي صح بكاية بصح جامي بكات قدامهم خزرت فريهام بعينين كانها تعاتب فيها لهاذ الدرجة صحبتها اهم عندها من ختها و مشاعرها
ناضت و راحت لشمبرتها ؛ غلقت الباب و طاحت فالارض تبكي و تغم في فمها تكتم شهقاتها رفدت يدها لربي تدعي يخرجها من لي فيه تستنى فالامل تاعها يجي لدرجة انه خممت انه اول واحد يطرق بابها تقبلو المهم تتهنى من لي فيه بصح متعرفش لي هاذي بلاك كانت لحظة استجابة لدعاءها باسكو منا راح تتقلب حياتها

قعدت غالقة على روحها الباب و محبتش تخرج حتى لقات روحها رقدت تفاطنت على صوت الباب بصح مراهيش حابة تخرج و تشوفهم و تتفكر لي صرا بصح صوتو خلاها تتنفض من بلاصتها

يوسف : اميرتي حلي الباب

فتحت الباب و لقاته واقف قدامها جرات عنقاته

رنيم : بابا
يوسف ( يمسحلها على شعرها ) : واش راهي بنتي شابة
رنيم : الحمد لله و نتا
يوسف : وليت مليح بشوفتكم
رنيم : وقتاش جيت ماشي مزال باش جي
يوسف : اهه سما قلقتك كي جيت
رنيم : حاشا بابا سقسيت برك
يوسف : هه نعرف ؛ حبيت نديرهالكم سوربريز بارسكو كملت خدمتي بكري قلت نجي
رنيم : خير مادرت
يوسف : و واش بيهم عينيك منفخين كنتي تبكي ؟
رنيم : لالا بابا يكون من الرقاد برك هاك تعرف رقاد العصر
يوسف : سوور ؛ مقلقوكش هاذو

و خزر فيهم كانو واقفين فالكولوار

حياة : واش هاذ الهدرة يوسف

يوسف : هدرت معاك رنيم

ريهام قاعدة تترعد ملهيك خافت تحكي بيها

رنيم : لالا بابا قتلك الرقاد برك
يوسف : ان شاء الله يكون هكا
حياة : احمم ... يوسف هيا ادخل اقعد نحطو العشا
يوسف : ايه نبدل حوايجي و نغسل و نجي

راحو للكوزينة وجدو الطابلة و قعدو منبعد لحقهم يوسف و قعدو في رحبة

يوسف : قادر نبيع قاع واش عندي غير نقعد مع بناتي و مرتي هكا
لجين : ربي يخليك لينا بابا
سولا : امين ... احممم بابا ماشي قتلي كي نجي نشوفلك التيليفون لي عجبك نشريهولك
لجين : شوف لي تخمم على روحها
سولا : ياك مدومونديتش راجلك يشريلي بابا هذا بابا
حياة : غلقي هذاك الفم هكذا تهدري مع ختك و زيد مكان لا تيليفون لا والو القراية قيس قيس و زيدي كمليها بالتليفون
سولا : بابا مكانش منها راني موفقة بين قرايتي و حياتي
يوسف : غدوة ان شاء الله نروحو و شوفي لي عجبك جيبيه

ناضت من بلاصتها باسته

سولا : يخليك ليا باباتي
يوسف : ههه خلاص روحي كملي ماكلتك .... رنيم بنتي وشبيك مراكيش تاكلي شوفي صحتك راحت من اخر مرة لدوكا زدتي شينتي 
رنيم : معينيش فالماكلة بابا
يوسف : وعلاش حابة تمرضي
امير : ثثح ماما تكولي بلي كي ثبكي بثثااف تمرض ( صح ماما تقولي كي تبكي بزاف تمرضي )

لجين فتحت عينيها فامير

لجين : امير كول و سكت
يوسف : خلي طفل ؛ امير قول لجدو شكون بكا رنيم
امير : خالتو ريهام و خخد ... خديزة ؛ حبو خالتو رنيم تتزوز قالو .... قالو بلي مللفه اييه ... و لنيم تقدل تخدم كيما دال ووو هوو كبييل ايه جدو ووو مامي مامي حاوزت تاتا خديزة ( خالتو ريهام و خخ... خديجة ؛ حبو خالتو رنيم تتزوج قالو ... قالو بلي مرفه ايييه ... و رنين تقدر تخدم كيما فالدار ووو هو كبيير ايه جدو ووو مامي مامي حاوزت طاطا خديجة )
يوسف : امير وليدي روح للشمبرة معليش

دارلو براسو ايه و هبط من الكرسي و راح

يتبع 💚💚 .....