انت املي _ باللهجة الجزائرية 🇩🇿 _

بارت 8

12:00 AM :

رنيم كانت قاعدة تلم فدوزانها و تتبسم مكانتش متوقعة يعجبها الحال هكذا ؛ حتى دخلت عليها وحدة تقري تاني تما

ريحاب : صباح الخير

طلعت راسها و تبسمتلها

رنيم : صباح النور
ريحاب : كنت حابة نقولك بلي راني خارجين نفطرو اذا تحبي جي معانا
رنيم : اهه مارسي بصح جبت فطوري معايا
ريحاب : .... ايه كيما تحبي ؛ تبقاي على خير
رنيم : يعيشك

جبدت رنيم فطورها منبعد ما كملته راحت كملت خدمتها

.....

رنيم تحكي *****

وصلت للدار ميتة بالعيا بارسكو ماشي موالفة نخرج و نقعد برا كامل هاذ الوقت

رنيم : ماما راني جيت

كي مسمعتش حسها عرفتها مع المسلسل و هاذا واش لقيت كي طليت عليها فالصالون تبسمت و رحت لشمبرتي بدلت حوايجي غسلت و صليت صلاتي منبعد ريحت شوية و نضت طيبت العشاء
طفيتله و حطيته فوق الطابلة و عيطتلهم ؛ دخلت ماما قعدت

حياة : مزال ما جات سلسبيل
رنيم : لالا دوك نروح نعيطلها
حياة : سوور راهي مع الهم تاع تليفون هذاك و باباك زاد كمل عليها و شرالها واحد و راح و خلاني حاصلة معاها
رنيم : ماما كامل نتاجاتها بالتليفون
حياة : مجيش تعرفي خير مني
رنيم : حاشا ماما
حياة : انا هذيك الطفلة مراهيش عاجبتني كل ما نطل عليها نلقاها فالتليفون لا قراية لا والو ... حقا كيفاش عجباتك الخدمة
رنيم : اممم عجبني الحال
حياة : مليح و يخدموا معاكم الرجال
رنيم : كاين غير المدير ماما و هو مزوج و بولادو تاني

خرجت من الكوزينة قاصدة شمبرة سولا نعرف ماما و تخمامها ، عقدت حواجبي وقت لقيت سولا قاعدة فوق البونك و غير شافتني مسحت عينيها

رنيم : سولا يا روحي وشبيك كنتي تبكي ؟
سولا : اههه لالا

رحت قعدت قدامها و مسحت على شعرها

رنيم : راكي سوور اذا بيك حاجة احكيلي
سولا : قتلك ما بيا والو
رنيم : صحا ارواحي تتعشاي
سولا : لالا مانيش قادرة
رنيم : هيا بلا فشوش
سولا : رنيم راني ريجيم
رنيم : بوووه وين راهي سمانة
سولا : هاذ الخطرة زدت شوية فالميزان حابة نقص ... تعيشي رنيم خليني نريح راني عيانة
رنيم : على راحتك

خرجت من شمبرتها غالقة الباب مورايا مستغربة من حالتها
وصلت للكوزينة جبدت الكرسي و قعدت

حياة : وين راهي مجاتش
رنيم : راهي عيانة محبيتش نوضها
حياة : دووك سوور كي جيها الفطنة فالليل تاكل
رنيم : اممم

كملنا ناكلوا فالسكات بعد ما كملنا غسلت المواعن صليت و رقدت باسكو كنت ميتة بالعيا

.........

صباح جديد :

صباح جديد على الناس من غير ربي واحد ميعرف واش مخبى فيه ، بطلتنا دارت روتينها العادي و راهي دوكا فالبوس قاعدا تقرا فالقران من تليفونها ، طفاتو وقت حبس البوس رفدت صاكها و هبطت كانت داخلة للروضة شافت الحانوت مقابلها تبسمت و دخلت عندو

رنيم : السلام عليكم
عمر : و عليكم السلام بنتي
رنيم : عمي خلطلي قيس 500د حلوى و شكولا
عمر : على العين و الراس .... نتي جديدة هنا ؟
رنيم : ايه راني نخدم فهاذ الروضة
عمر : الله يبارك
رنيم : يبارك في عمرك عمي
عمر : و هاكي الساشي تاعك راهو واجد

خلصاتو و خرجت دخلت للروضة و راحة للقاعة تاعها
لقات الولاد بداو يدخلوا وهي تصبح عليهم

رنيم : يا ولاد اتلموا هنا نمدلكم حاجة

وقت شافوها جبدت الشكولا و الحلوى راحو يسوطيو و يجريو مدتلهم و هوما يعنقو و هي تضحك
ميلت راسها وقت شافت طفلة قاعدة فالكوانة تخزرلها ببراءة راحت عندها

رنيم : وعلاش مجيتيش مع اصدقائك

طلعت كتافها و هبطتهم

رنيم : صحا هاكي شكولا تاعك

ترددت منبعد شدتها و تبسمت

رنيم : انا اسمي رنيم و نتي
رهف : ررر ... رهف
رنيم : اسمك شباب تعرفي

دارتلها براسها ايه و رنيم ضحكت و عنقتها

رنيم : وعلاش متلعبيش مع الباقي
رهف : ... ميحبونيش
رنيم : وعلاش راكي تقولي هكا اصلا هوما مقبيل برك كانو يحوسو عليك
رهف : صحح
رنيم : ايه .... ارواحي معايا

شدتها من يدها و داتها عندهم

قعدت رنيم معاهم شوية منبعد قعدت فالكرسي تنهدت و هي تشوف فالدراري ؛ صح عمرها ولا قالت بصح دايمن تتمنى دير دارها و جيب دراري هي تحبهم موت بصح المكتوب قدرلها متعيشش هاذ اللحظة دوكا

هيا شويا تفاعل حبيباتي نزيدلكم بارت
خليولي ارائكم في البارت و اقترحاتكم خليولي شوية مواقف حابين يصراو بين ادم و رنيم باش يتقربو من بعضهم حابة نقربهم شوية باش منبعد نبداو بمشاهد الغيرة و ..... 💚❤💛