انت املي _ باللهجة الجزائرية 🇩🇿 _

بارت 15

رنيم : هو كنت حابة نقول اذا ... اذا غدوة تقدر تدي ماني دير ليزاناليز سينون انا نديها باسكو سكر تاعها كي قستو لقيتو طالع
ادم : ... خلاص غدوة انا نديها اصلا كنت حاب نديها جوز عند الطبيب

كمل هدرتو و طاح السكات حتى رجع كسره

ادم : اقعدي وشبيك واقفة هكذا

ترددت منبعد قعدت

ادم : قاتلي ماني بلي كاينة وحدة هنا ميت راجلها كانت هي جي تخدملها هنا
رنيم : اههه زينب وشبيها
ادم : ايه لوكان تروحي تهدري معاها اليوم تقوليلها تولي جي تخدم هنا و تقعد مع ماني كامل النهار
رنيم : منعرف اذا تقدر تقعد كامل النهار عندها ولادها
ادم : قوليلها بلي نخلصها دوبل قاتلي ماني بلي بزاف محتاجة و اذا مقدرتش نشوف واحد اخرى
رنيم : ايه

قعدت نفرك فصباعتيا

ادم : تقدري تتنفسي مراحش ناكلك
رنيم : ... وا ... واش قصدك
ادم : راكي تباني مديرونجيا
رنيم : لالا
ادم : ايه ان شاء الله بارسكو كلما نتلقاك نحسك داخلة في بعضك

سقمت خيماري و قلت

رنيم : انا ماشي انسانة اجتماعية بزاف منقدرش نتاقلم مع الناس بلخف و زيد نتا
ادم : انا ....
رنيم : معلباليش جاي شنايفي و منارفي
ادم : هكذا
رنيم : الله غالب انا جاية صريحة
ادم : وين بنتلك شنايفي

طلعت كتافي و هبطتهم و هو تبسم لقيت روحي نتبسم لا اراديا

رنيم : انا لازم نروح للدار ... ايه و العشاء مكلاه تخلي ماني تعذب روحها انا نجيبلكم العشا
ادم : لالا نشري معليش
رنيم : انا نطيب نطيب مكلاه تشريو

ناض مورايا باش يغلق الباب

ادم : صحا على واش درتي مع ماني
رنيم : بلا مزية

.....
بعد مرور شهرين :

هكذا جازوا اليامات نهار مور نهار رنيم بدات توالف و تتاقلم كثر فالخدمة لي ولات تحبها بزاف عرفت ناس بزاف تما منهم ريحاب لي رجعت صاحبتها و ناس واحد اخرين ، فاطمة مسكينة حكمها السكر و راهي بالانسولين الشي لي خلى خديجة تولي جي ديرهالها بحكم هي infirmière و هي و خطيبها نفصلوا
و دوكا نهدرو على ادم و رنيم لي ولاو نوعا ما صحاب ولاو يتلقاو بزاف و يحكيو مع بعضهم ماشي كيما قبل ؛ الاحداث هاذي فضلت نجوزها لانه مفيهاش تطور كبير بصح من دوكا تقدرو تقولو حكايتنا بدات

.......

ناضت رنيم وجدت روحها و دارت روتينها كيما العادة

رنيم : ماما راني خارجة
حياة : ربي يسهل

خرجت و غلقت الباب ؛ كانت هابطة منبعد شافت فساعتها و عضت على شواربها و طلعت للفوق طبطبت منبعد فتحتلها زينب

زينب : صباح الخير رنيم
رنيم : صباح الخير طاطا
زينب : جوزي

دخلت للداخل لقات فاطمة قاعدة تشرب فقهوتها راحت عندها

رنيم : صباح الخير ماني
فاطمة : هاي جات بنتي ارواحي ارواحي

راحت سلمت عليها و قعدت

فاطمة : اقعدي شربي القهوة معانا
رنيم : لالا يعطيك الصحة
فاطمة : كولي قتلك راني درت السفنج نعرفك تحبيه
رنيم : اههه هنا غلبتيني
فاطمة : زينب جيبي السفنج من الكوزينة

رنيم طلعت راسها تحوس بعينيها

فاطمة : رنيم كشما كاين
رنيم : اههه لالا راني نستنى فالسفنج ههه
فاطمة : زينب وين راكي طولتي
زينب : راني جيت خالتي

حطت زينب الطبسي و راحت و رنيم قطعت مورصو و كلاتو ، على تطليعة راسها شافت ادم خرج من شمبرته و جاي عندهم ؛ تبسمت وقت شافته

ادم : صباح الخير
فاطمة : صباح الخير

راح سلملها على راسها و قعد

فاطمة : نحطلك من السفنج ( شكون تحبو انا نكرهو )
ادم ( شرب من قهوته ) : لالا تعرفيني منحبش هاذ العفايس ؛ خليه لرنيم راهي حابة تزيد تسمان
رنيم : واش قصدك برنيم حابة تزيد تسمان ؛ راك تشوف فيا سمينة
ادم ( خزر فطبسي تاعها ) : شوفي شحال راكي حاطة
فاطمة : ادم خليها الطفلة تحبو

رنيم طبعت الطبسي و تشنفت

رنيم : انا لازم نروح راح عليا الحال
فاطمة : ربي يوفقك
رنيم : ان شاء الله

سلمت عليها و خرجت ، حاسة قلبي يوجع مفهمتش وعلاش قاستني هدرتو مالغري علبالي مهدر والو فالعادة حتى ويجرحني شخص و متغيضنيش هكذا
وصلت قدام لاري لقيت البوس راح رجعت نسب فروحي كيفاش خليت روحي نطول هكذا
قاعدة نشوف فالساعة و نستغفر حتى لقيت ادم حبس بطونوبيل قدامي

ادم : اطلعي نوصلك
رنيم : لالا منشقيكش
ادم : قلت اطلعي دوك يروح عليك الحال

خزرت فيه شحال منبعد طلعت

ادم : نتي راسك يابس كيفاش نقولك اطلعي و نتي قاعدة واقفة
رنيم : نخمم قبل
ادم : و هاذي تاني تخممي فيها
رنيم : اممم

دورت راسي مزيرة على ساكي بيدي من جهة حاسة روحي مديرونجيا كي راني معاه فطونوبيل و من جهة غايضتني عمري

ادم : متقوليليش زعفتي كي قلتلك هكذاك صباح

❤💜💖 هو البارت ان شاء الله يكون عجبكم خليولي ارائكم فالتعليقات و اقتراحاتكم و الى الملتقى ان شاء الله 💛🧡💚