ريحاب : عرفتها ، و شكون هذا رنيم : ... ادم لي حكيتلك عليه شحال من مرة ريحاب : و اييه واش صرا باش راكي تبكي رنيم : كاينة وحدة فحياتو ... مانه قاتلي سوور كاينة حاجة بيناتهم ريحاب : مانه قالت ماشي هو يعني ماشي سوور رنيم : صباح وقت جات راحت سلمت عليه و جابت كادو زعما ليماه و مع الاخر داها لشمبرته معلباليش واش هدرو ريحاب : احسني الظن بالناس ؛ بلاك ماشي كيما راكي تتخايلي رنيم : نتي مشفتيهاش كيفاش تخزر فيه ريحاب : نتي يهمك هو ولا هي رنيم : ريحاب هو ممبا ما يخزرش فيا و ما يديهاش فيا .... مفهمتش وعلاش راهو يصرالي هكذا يعني عمري ما حبيت راجل من غير بابا ريحاب : وعلاش حنا من وقتاش نقدرو نتحكمو فقلبنا ... و زيد متقدريش تعرفي بلاك مام نتي تعجبيه بلاك طاح فيك ايماجيني انا قبل ما يخطبني محمد جامي بينلي ياك هو صاحب خويا كان شحال من مرة يجي معاه و كنت مرات نجوز عليه فالحومة جامي شفتو خزر فيا ولا بينلي حتى نهار خطبني منبعد قالي بلي كنتي تعجبيني من وقت كنت نجي لداركم مع خوك و ايماجين وقتها كنت مزالني صغيرة سما متقدريش تعرفي مشاعر تاع الناس كاين بزاف لي ميبينوش رنيم : مرانيش حابة ندير امل ريحاب باش مع الاخر نتصدم بالواقع اصلا ليال لوكان تشوفيها الله يبارك يعني مكانش كيفاش ميخزرش فيها ريحاب : اولا حنا بلا امل منعيشوش ماشي مليح تتعلقي بالحاجة بصح حطي في راسك كامل الاحتمالات خير حطي بلي ادم يقدر يكون صح ماشي سامع بيك و حطي العكس ؛ زوج وعلاش راكي تحقري فروحك بلاك هي صح شابة بصح عقليتها زبل حشاك و نتي واش خصك يا سعدو لي يدي وحدة كيما نتي قلبها كبير و مربية عاقلة تعرف تقيم بدارو و ولاده و فوق هاذا شابة تهبل
ريحاب : هيا نطلعوا هذاك هو و خليني نشوف هذا لي دالك عقلك و نشوف ليال تاني رنيم : استناي ندير عبايتي نخاف يكونوا الرجال فالدروج ريحاب : ايه هيا خفي
.....
طلعوا لبنات لفوق و ريحاب سلمت عليهم منبعد دخلوا للصالون قعدوا
ريحاب : وين راهي رنيم : هذيك لي لابسو روبا زرقا ريحاب : حشمت تنحيها برك عريانة كامل ... سمحيلي عندك واحد الذوق دوك هادي شابة انا جاتني نورمال بلاك تلقايها هي تغير منك الله يهديك رنيم : متعيطيش دوك يسمعوك
دخلت فاطمة شافت رنيم ضربتها بتزغريتة رنيم سوطات من بلاصتها من الخلعة
فاطمة : يا ربي واش هاذ الزين واش هاذ الشعر ارواحي نبوس الشابة تاعي رنيم : ماني
راحت عندها عنقتها
رنيم : وعلاش تزغرتي يعني فاطمة : يا بنتي تبدلتي كامل شفتو شفتو رنيم داتهالكم كامل انا نقوللهم رنيم هي الشابة كامل مسكينة مخبية زينها برك رنيم : ماني حشمتيني
