انت املي _ باللهجة الجزائرية 🇩🇿 _

بارت 34

ادم : راني مليح هكذا
فاطمة : خلوه يدبر راسه حسبتلو راح ندومولوه
ادم : قادر على شقايا فطومة
فاطمة : ايه ايه
حياة : حنا سمحولنا هذاك هو لازم نروحو ... البنات هيا
فاطمة : تبقاو على خير 
حياة : الله يسلمك

هبطو و كل واحد منبعدها شد شمبرته رقد بعد يوم طويل لي عياهم

نهار جديد و احداث جديدة :

ناضت رنيم صباح فرحانة على غير العادة وجدت قهوتها و قاعدة تشرب فيها حتى تلقى لجين و امير داخلين

لجين : يا صباح الخير
رنيم : صباح النور ؛ صباح النور يا روح خالتو
امير : ثباح الخير

سخنت لجين الحليب ليها و لأمير و قعدو يشربو

لجين : اييه واش راكي دايرة فيها
رنيم : والو من الخدمة للدار
لجين : راكي درتي صحابات مكنتش مستنيتها منك
رنيم : وعلاش حتى منديرش
لجين : لالا بارسكو نتي ماشي من النوع لي تتقربي لاي واحد
رنيم : و ريحاب و وسام ماشي اي واحد
لجين : اممم شفتهم نعم التربية حسبتلك هاذيك ريهام وحدة من صحاباتها ما تصلح .... راح تقعدو نتي وياها هكذا شغل برانية
رنيم : لجين علبالك بلي الغلطة جات منها انا ما عندي ما ندير
لجين : علبالي بصح تعرفي راسها يابس كيما تاع يماها واش مراح نديرو نراحش تفهم و كي نتي الكبيرة سيي اهدري معاها و حلو البروبلام هذا فالاخر تقعدو خواتات

نطقت حياة لي سمعت هدرتهم و كانت واقفة كيما الباب

حياة : ختك عندها الحق ريهام راسها قاسح بزاف شديها و تفاهمو انا جبت خواتات مجبتش العديان  و نتي نعرفك رزينة ياك انا و ضاربت معاها بصح تقعد ختك و زيد راهي في مشاكل مع ناس دارها مكلاه منزيدوش عليها
رنيم : انا عييت من كوني اكثر وحدة تسمح في حقها على جال الناس
حياة : بصح هاذي ختك ماشي الناس
رنيم : بصح ختي فضلت صحبتها عليا سما مكانش فرق بينها و بين الناس ؛ سيي اهدري معاها هي بلاك تنقص قسوحية راسها
حياة : من وقتاش وليتي طولي لسانك معايا
رنيم : ماما مقصدتش نخالف هدرتك بصح راكي تطلبي فحاجة منقدرش نديرها
حياة : رنيم متخلينيش نوض نضربك على كبرك حتى من باباك و تقلق من البروبلام هذا كل يوم مسكين يسقسي و يقولي رنيم و ريهام مزالهم ميتهادروش هكذا ربيناكم حنا

رنيم ناضت رايحة تخرج حتى شدتها حياة من يدها

حياة : راكي تعفسي على كلمتي
رنيم : حاشا
لجين : ماما خلاص ماشي بسيف
حياة : انا واش قلت .... ( عيطت لريهام ) ريهااام

.....

ريهام : وشنو ماما
حياة : تصالحو نتي و ختك دوكا و قدامي
ريهام : ماما
حياة : هيااا قلت
ريهام : .... رنيم سمحيلي مقصدتش لي قلته وقتها
رنيم : السماح ما بيناتنا

تبسمت ريهام و رنيم خرجت و خلاتهم

حياة : رنيييم ...
لجين : خلاص ماما ياك تسامحوا
حياة : قالتها من فوق قلبها منعرفش بنتي

صونا تليفون ريهام ريبوندات

ريهام : الو ... ايه دوك نهبط
حياة : خير وين تهبطي
ريهام : جا ناجي ماما قالي اهبطي
حياة : وعلاش مقلتيلوش يطلع
ريهام : راهو مشغول ماما
حياة : ايه ملا خفي متخليهش يستنى
ريهام : اممم

ريهام تحكي :

وجدت حوايجي و سلمت عليهم و هبطت غير ركبت ديمارا مشنف

ريهام : خير واشبيك تتافاف
ناجي : شوفي نتي مخليتني نستنى ساعة فالباركينج
ريهام : يهديك ربي واحد العشر دقايق قيس ما بدلت كنت هبطت
ناجي : سما راني نكذب ولا كيفاش
ريهام : خلاص ما قلت والو

قعدت ساكتة طريق كامل مفهمتش وعلاش ولا هكذا فالاول كان معيشني كيما الاميرات مالغري ما عندوش و قيسو قيس روحو و قبلت ؛ قبلت الشمبرة هذيك بحكم معندوش الدار قبلت المشاكل تاع يماه و خواتاتو و قلت معليش ماما دايمن تقولي اصبري في وجه راجلك بصح دوكا حتى هو ولا متبعهم و ميمدليش كامل الحق ؛ دخلت للدار راسي يوجع رحت ديراكت للشمبرة غلقت على روحي الباب مرانيش حابة نقابل حتى واحد فيهم ؛ استغفرت و نضت نفرز فقشي غير فتحت الخزانة عقدت حواجبي مكانتش كامل نفس الخزانة لي خليتها حوايجي نرتبهم بشكل نلقاهم بشكل فكل مرة نروح و نجي لدارنا مفهمتش وعلاش ، حطيت الحوايج و خرجت كان وقت الفطور دخلت للكوزينة لقيتهم قعدو و ختو الكبيرة تحط فالفطور حتى نطقت يماه

**** : و نتي هذاوين جي متقولي نروح نعاونهم ولا لوستك تخدم عليك
ريهام : خالتي كنت نسقم فقشي قبل

شديت بلاصتي منبعد جات ختو رفدت طبسي تاع الحلوى كان فوق الطابلة باش تحط الماكلة

ريهام : كنتو فعرس !!!
يماه : اههه ... لالا
ريهام : هءا قاطو تاع لوز بانلي تاع عراس لالا
ختو : وعلاش منقدروش نشريو قاطو تاع لوز باش نشربو القهوة

سكتت و محبيتش نزيد فالهدرة بارسكو جاتني بيزار من وقتاش المشحاحين هاذو يشريو هاذ القاطو ماشي من عوايدهم

💜💜هاذو هوما حلقات اليوم ان شاء الله يكونوا عجبوكم خليولي ارائكم فالتعليقات و اقتراحاتكم و الى الملتقى ان شاء الله في بارت اخر 💚💚