انت املي _ باللهجة الجزائرية 🇩🇿 _

بارت 3

فاطمة : ايه محكيتيليش كيفاش جاز نهار الشوفة تاعك
رنيم : ههه متفكرينيش ... ( و حكيتلها واش صرا ) ....
فاطمة : تهنيتي منو
رنيم : هه تعرفي مرات نحس روحي نعيف لدرجة واحد ميقدر يشوف فيا ولا يقرر يرتبط فيا
فاطمة : وووه وعلاش هاذ الهدرة ؛ زينك يا بنتي مكانش منو حتى انك اكثر وحدة شابة بين خواتاتك و بين بنات الحومة كامل ؛ متقدريش تعرفي بلاك ربي مخبيلك لمليح منبعد بلاك متزوجتيش حتى لدوكا بارسكو مكتبلك تتلقاي بواحد ينسيك كامل لي جاز
رنيم : تعرفي بلي انا اكثر وحدة راضية بلي مدهولي ربي ؛ بصح ماني لوكان غير كامل الناس يفهمو بلي هذا مكتوب
فاطمة : وواش دخلك فالناس .. هاذي متكون غير حياة خلي انا نهدر معاها و ...
رنيم : لالا ماني مكان حتى فايدة اصلا متقلقنيش هدرتها نعرف تحبلي غير الخير
فاطمة : ايه تحبلك غير الخير مكانش ام تتمنى الشر لولادها نعرف لي متمنية تشوفك مزوجة بدارك و وولادك هي تخمم لغدوة يعني لقدر الله والديك سبقوك و خلاوك وحدك فهاذ الدنيا لمن تخزري نعرف لي هذا تخمامها حابة تتهنى عليك و تخلصك من كلام الناس بصح مرات الانسان يجرح غيره بلا ميحس
رنيم : بصح هيا ماما منقدرش ندي عليها ...
فاطمة : نعرف بصح متحمليش روحك فوق طاقتها فهميها بلي نتي راكي تنجرحي من كلامها باسكو وقت الانسان يلقاك ساكتة على لي قاله يحسبك راضية عليه و معندكش مشكل فيه

تبسمت فوق قلبي و درتلها براسي ايه منبعد كملنا ناكلو . وقت كملنا نضت نفرز فالطابلة حتى نلقى ماني جايبة الطباسا تعاون فيا

رنيم : وعلاش عليك ماني خلي انا نفرز
فاطمة : لالا خلي نعاونك
رنيم : واش قلنا

نحيتلها اللي فيدها و قعدتها

رنيم : نتي ريحي برك
فاطمة : غلبتيني ... ربي يعطيك ما تتمناي ان شاء الله تستاهلي كل خير و مليح متاكدة لي ربي مخبيلك حاجات بزاف مليحة
رنيم : هه ان شاء الله فطوم

كملت غسلت المواعن منبعد هبطت لدارنا لقيتهم راقدين ؛ دخلت للدوش دوشت منبعد خرجت للشمبرة قريت سورة الكهف و حطيت راسي على المخدة نخمم فلي جاي زعمة راح تضحكلي الدنيا قاعدة في تخمامي حتى غفيت ، نضت على يد تتلمس فوجهي يد صغيورة فتحت عينيا نلقاه امير وليد لجين تبسمت و نضت عنقته نبوس فيه
قعدت زمان و انا معاه حتى دخلت لجين سلمت عليها و نضت سلمت على ريهام و تلمينا فالصالون نقسرو ؛ شحال نحب هاذ اللمة

حمحمت لجين و قالت

لجين : عندي ليكم خبر
حياة : يا ستير خير متقوليليش ضاربتي مع راجلك
لجين : لالا ماما وشبيك ... هو حيوتة راح تولي جدة للمرة الثانية

ماهي غير ثواني ستوعبو فيهم هدرة لجين و حياة طلقتها بتزغريتة

حياة : ارواحي نعنقك ارواحي

رمات لجين روحها في حضن يماها فرحانة و خواتاتها فرحانينلها سكتت حياة زمان و خزرت فريهام

حياة : و نتي مكان والو

سكتت ريهام بالعة غصتها

حياة : اقعدي هكذاك حتى يعاود عليك راجلك وقتها ارواحي ندبي هنا

عيطت ريهام

ريهام : شغل مرانيش حابة ماما حبسي ما تزيديها عليا هاني نسيي بصح مراهيش فيدي
حياة : مقصدتش حاجة راني نهدر هكا باش تروحو تشوفو طبيب ولا ...
ريهام : نتي دايمن متقصديش اصلا ندمت لي جيت هاني صباح نروح لداري متتقلقيش

ناضت ريهام و راحت للشمبرة

رنيم : وعلاش ماما هكا هاي زعفت تعرفيها تتحسس بلخف
حياة : تزعف مني خير متزعف غدوة من وليد الناس مزال مجربتي ديار الناس تكون كل يوم تسمع فالهدرة العيانة و ناجي يجي نهار و يكره منها
لجين : ماما بصح مراهيش فيدها
حياة : لحد الساعة راهي فيدها واش فيها اذا قنعت راجلها و راحو للطبيب
سولا : ماما بلاك هوما مراهمش مقلقين من هاذ السوجي خليهم يعيشو حياتهم متبقايش تنكدي عليهم

رفدت بليغتها و نطقت

حياة : شوف بنت البارح جاية تعلم فيا واش ندير نوضي منا خير مانتبلى فيك

تافافت سلسبيل و خرجت و جازت العشية هذيك

رنيم قاعدة طيب فالكوزينة و تغني تحب بزاف تغني و صوتها بزاف شباب ؛ و امير يدور معاها و حتى هو يعاند فيها و يغني
وجدت الجاج محمر و قطعت بطاطا باش تقليها ( البطاطا راهي غالية رنيم 😂 ) سمعت الباب يصوني قاعدة تستنى يفتحو والو واحد محب يفتح ؛ ريهام فالشمبرة مزعفة سولا تقرى و لجين و حياة يتفرجو فالمسلسل ( شحال حالة يكونو ملمومين كامل هكا ) مسحت يديها و خرجت تشوف شكون غير فتحت لقاتها اخت سارة لكبيرة
خديجة

هذا هو البارت هيا اتفاعلوا شوية و خلولي رايكم منبعد نزيدلكم بارت ان شاء الله و راح نحطلكم تاني تعريف بالشخصيات منبعد بمانه طلبتوه 💚💛