رجليا رفدوني ديراكت عند ماني فاطمة هي الوحيدة لي تفهمني كي شفت برا ملقيتش طونوبيل تاع ادم طلعت ، دقدت زادت شوية و فتحت الباب غير غتحتو تلاحت عندها و هي غلقت الباب
فاطمة : بسم الله الرحمن الرحيم خير يا بنتي واش صرا
دموعي هبطو حاسة روحي عاجزة دايمن زقت منكونش مليحة نحكي و نفضفض لماني بحكم معندي حتى واحد نحكيله ماما ماشي قريبة ليا و بابا رغم لي هو اقرب واحد بصح كاين حكايات منقدرش نحكيهملوا فدايمن نلقى ماني نحكيلها واش نحب و وقتما نحب كنز مدفون عمرها ما تعاود بيك ولا تعايرك بحاجة تعرفها عليك بالمختصر ماني من الناس النادرة فهاذ الدنيا قليل وين تلقى انسان تامنلوا و تحكيلو كلش، دخلتني للصالون و راحت جابتلي كاس ماء
فاطمة : هاكي شربي و مسحي دموعك و فهميني واش صرا
مسحت دموعي و بديت نحكيلها حكيتلها كلش صرا حتى لهاذ اليوم
فاطمة : يا ربي واش دارت سلسبيل ، كيفاش هذا تبعت تصاورها للرجال
رنيم : غرها الشيطان يا ماني مكانش لي ما يغلطش و يا ماني بابا نعرفو يقتلها نورمال اذا عرف .....
حسيت بيها تنهدت
فاطمة : صعيبة الدنيا هادي يا بنتي
رنيم : ماني تعيشي مديلي كاش حل زعما نمدلوا دراهم ، بصح خايفة يكمل فالتهديد تاعه ، خايفة منمدلوش يروح يحكي لبابا
فاطمة : لالا هذا باين مراهوش ناوي على خير .... خليني نهدر معاه بلاك يسمع مني
رنيم : لالا ماني وشبيك هاذو الناس مكانش معاهم هدرة
دورت راسي على صوت الباب
فاطمة : هذا يكون ادم نروح نفتح
درتلها براسي ايه و هي راحت شوية هكا لقيتو جايز قدام الصالون كنت رايحة نقولوا مساء الخير بصح هو جاز ديراكت حسيتو مزعف ؛ عوجت فمي من هاذ الجاست عيب الواحد ميسلمش على الضيف ؛ طلعت راسي وقت دخلت ماني و قعدت ؛ رفدت تليفوني لقيت كاش 10 ليزابال من عند ماما خبطت راسي بيدي علبالي ليوم متسكتش رفدت عليها صوتها ثقب وذني ، فهمتها بلي قعدت راني عن ماني سكتت كوبيت لقيت ماني تخزر فيا
رنيم : كشما صرا
فاطمة : لقيتها
رنيم : واش لقيتي
فاطمة : واش رايك نحكي لادم على هذا فؤاد
فتحت عينيا و درتلها براسي لالا
رنيم : لالا محال ؛ من جهة منقدرش نشوه صورة ختي قدامه و من جهة واش يقول وحدة عرفتها لبارح جاية تحكيلي على مشاكلها
فاطمة : يهديك ربي ؛ ادم ماشي من هاذ النوع و زيد انا راح نطلب منو و مراحش يردني رنيم راكي شفتي اليوم واش دارلك هذا فؤاد و راني سور راح يولي يعسك دايمن و يقاطعك فالحومة
سكتت نخمم فهدرتها ؛ خايفة يولي و يرجع يديرلي مشاكل كثر فالاخر لقيت بلي معندي حتى حل واحد اخر بلاك صح ادم هذا يقدر يعاوني
رنيم : معلباليش يعني
فاطمة : منبعد نسقسيه خليها عليا
درتلها براسي ايه
رنيم : ماني لازم نروح
وصلتني حتى الباب و انا هبطت هذيك لعشية جازت عليا بسيف حاسة روحي بزاف مقلقة امنيتي الوحيدة جوز هاذ الحكاية سلامات
......
عند ادم :
حطت فاطمة العشا فوق الطابلة و راحت لشمبرتو تعيطلو لقاتو قاعد فوق البونك و حاط راسو بين يديه
فاطمة : ادم
ادم : كشما تسحقي ماني
ماني : هيا تتعشا
ادم : لالا بصحتك منتعشاش
ماني : و كيفاش تخليني وحدي هيا ادم ... هيا فخاطري متيبسش راسك
ادم : .... خلاص روحي دوك نجي
راحت فاطمة و هو لحقها
ادم : ماني قتلك متزيديش تعيي روحك بالماكلة هاذي كامل
فاطمة : بووووه انا مفهمتش ضيعوك للشر لا ماكلة لا والو
ادم : ماني ياك قلنا بلي خدمتي تطلب هكذا لازم ناكل حاجة خفيفة فليل
فاطمة : معندها حتى معنى كول كول الدنيا اخرتها موت
ادم : نكمل هكا نولي قد الرودة
فاطمة : ههه كيما كنت تكون وليدي يهبل في كل حالاتو
جبدها من خدها
ادم : وليتي تتغزلي ياه
فاطمة : واش حسبتلك .... قولي عندك مشاكل فالخدمة وقيل
ادم : .... شوية بصح يجوزو نورمال
فاطمة : اممم ربي يوفقك ...... ادم حبيت نطلبك فحاجة اذا متردنيش
ادم : هاذي هدرة دوكا ماني ... قوليلي واش حابة
فاطمة : تعرف رنيم هو فالحق .... ختها الصغيرة غلطت و و .... كاين واحد لعبلها بعقلها و بعتتلو تصاورها و دوكا راهو يهدد فيهم
ادم : ايه و انا وين راهي بلاصتي فالحكاية
فاطمة : ..... الطفلة راهي حاصلة و انا نعرف الطفلة نعم التربية خاطيها هاذ العفايس يعني قلت اذا نقدرو نعاونها و نتا تشوف هاذ السيد و تهدر معاه بلاك كشما نلقاولهم حل
ادم : ماني انا خدمتي لراسي معنديش وقت نتلهى بمشاكل الناس ؛ خطيك من مشاكل الناس
فاطمة : بصح
ادم : ماني خلاص داروها بيديهم يفكوها بسنانهم مرانيش فارغ شغل لحكياتهم
فاطمة : ادم وليدي نعرفك حنين اسمع مني
ادم : ماني هاذ السوجي تغلق هنا
يتبع 💛💛💛 .....
أنت تقرأ
انت املي _ باللهجة الجزائرية 🇩🇿 _
Romanceحكايتنا هاذ المرة غير باقي التفاصيل تعرفوهم فالكرونيك الكرونيك من تاليفي و هي من نسج الخيال 💛
