صفاء : دوك نحيها و نمدهالك انا حسبتك ختي نتلابسو كيف كيف و نتي خرجتي مشحاحة
ريهام : معندهاش علاقة بمشحاحة بصح عيب تدخلي شمبرة خوك و تمسي حوايج مرت خوك
العجوزة : نتي راح توريلنا العيب دوكا وقيل
ريهام : خالتي احكمي بالعدل كيفاش تمسلي قشي بلا ما تسقسي عيب كبير و شحال من خطرة نلقى حوايجي ناقصين ماشي اول مرة
صفاء : كيفاش راكي تقولي بلي انا سراقة عيب عليك خويا عندو الحق كي عاود عليك
ناجي : صفاااا
ريهام : كيفااش
العجوزة : خليها ناجي محسوب مراحش تعرف ... ايه كيما سمعتي البارح راجلك فتح عليك دا وحدة تستاهلو و جيبلو دراري ماشي كيما نتي
ريهام بدات تضحك
ريهام : ههه سما تزوج عليا هكذا
العجوزة : ايه كيما فهمتي
ناجي : ريهام خليني نفهمك يما حبت تشوف ولادي و نتي ....
ريهام ( عيطت ) : اسسسسكت اسكت منسمعش صوتك الوقت هذا كامل و انا ساكتة و نقول معليش حملت الذل حملت الميزيرية الشر الفقر و هكذا تكافاني كنت عايشة معززة مكرمة فدار بابا جيت عندكم عييت نرقد على كرشي فارغة و قلت معليييش عايروني بالعاقر و سكتت
العجوزة : اييه عرفي واش تخرجي من فمك وليتي تعايري فينا و زيد ربي حلل ربعة
ريهام : ههه نعليركم ايه بارسكو نتوما ماشي مليح لي يكون مليح معاكم مخلوعين و كوافا على هذيك بنتك تلبس من حوايجي بالسرقة بصح راح تندم يا ناجي هههه قولي برك وين كنت حاب ترقدها مع خواتاتك فالصالون واقيل ولا انا كنت حاب تبعتني للصالون
ريهام تحكي :
غلقت الباب و طحت بكيت حتى ضاق نفسي انا لي حتمت انا لي سوفريت و عانيت بصح صبرت كنت عايشة عند بابا احسن معيشة كنت كلش نعيبو الماكلة هاذي ما ناكلهاش هاذي ماتعجبنيش كل يوم نشري تليفون بابا يعاودهولي كل عام الحاجة لي نطلبها جي تفششت فظارنا الحق يقال بصح وقت جيت هنا حسيت روحي فعالم واحد اخر الماكلة مراهي ماكلة نتشهى نشري جبة منلقاش منين نتشهى حاجة فرمضان منقدرش ناكلها نحب نخرج منقدرش بصح صبرت وقت نشكي لماما تقولي اصبري و صح صبرت و نصبر و معنديش بروبلام بصح الهناء مكانش كل يوم العياط كل يوم المشاكل يعايرو يحقرو فيا و نبلعها و نقول في وجه ناجي و فالاخر يجيب عليا واحد اخرى مسحت دموعي و عيطت لبابا عندي شحال مهدرتش معاه من وقت ضارب معايا على جال حكاية رنيم
ريهام : بابا
يوسف : خير ريهام
عرفتو مزال مزعف مني طرطقت بالبكاء
ريهام : با ... بابا
يوسف : يا بنتي واشبيك واش صرالك ضاربتي مع ناجي مسحقة حاجة قوليلي وشبيك ... حبسي لبكاء هيا تعيشي بنتي
ريهام : بابا ... وقت رجعت للدار ... لقيت ناجي راح فتح على واحد اخرى
يوسف : كيفاش ... ريهام راكي سوور بنتي متكونيش كشما درتي نعرف راسك خشين
ريهام : بابا متعرفنيش حاطتهم فوق راسي بصح .... بصح قالو عليا منجيبش دراري على هادي جابو لوليدهم واحد اخرى
يوسف : خلاص بنتي دوك نديماري نجي عندك
ريهام : لالا بابا راك بعيد من الصحراء لهنا دوك نشد تاكسي مرانيش حابة نزيد نقعد فهاذ الظار حبيتك برك تعرف على جال ماما بارسكو نعرف بلي دير فيا حالة
يوسف : ريحي تما لعشية نكون عندك راني فسيدي بلعباس دوكا ياك بنتي واحد ربع سوايع هكذاك نوصل
ريهام : صحا بابا
كوبيت و نضت نرفد فقشي نحطو فالفاليز وجدت قشي كامل و حطيته و ناجي الوقت كامل و هو يحلل عند الباب عيطت عيطة الناس برا و يكونوا سمعوني
ريهام : روح ناجي روح خير ما نخرجلك
قعدت فوق البونك نخبط فرجلي نحسب فالوقت وقتاش يلحق بابا ، من صغرنا ولفنا كلش نحكيوه لبابا حتى ابسط و اتفه حاحة تصرالنت نحكيوهالو ليه عكس ماما لي راني نخمم فردة فعلها نعرف دوك تمسح الموس فيا غفيت و ما نضتش غير على صوت التليفون لقيتو بابا
يوسف : الو وي ريهام راني لاحق وجدي روحك
ريهام : ايه بابا
نضت رفدت لفاليز و فتحت الباب ؛ غير فتحتها ناض ناجي لي كان قاعد فالصالون مقابل الشمبرة
ناجي : ريهام مصبح و انا نعيطلك خليني نفهمك ... واش هذا ريهام وين رايحة
ريهام : ادنى من قدامي
ناجي : ريهام ...
صونا الباب راحت فتحت يماه
العجوزة : اههه خويا يوسف
غير شفته رحت عنده عنقته
يوسف : بنتي
ناجي : عمي
يوسف : مرانيش عمك هاذي هي لي وصيتك على بنتي اهه و نتي يا مدام هكذا تحافظي على امانة الناس
العجوزة : يا خويا الله يهديك خلينا ندخلوا نتفهامو
ناجي : عمي خليني نفهمك
يوسف : متفهموني منفهمكم نهار مديتلكم الطفلة قلتلكم بلي اذا جا نهار و ظلمتكم انا نحاسبها قدامكم بصح وصيتكم وصيتكم بنتي منحبش دمعة طيح منها بسبتكم و نتا يا ناجي وعدتني و اليوم خلفت بوعدك و نسيت بلي عندها باباها فكتافها بنتي عندها دار و اهل مراهيش مرمية عندكم ريهام هيا جيبي حوايجك نروحوا
أنت تقرأ
انت املي _ باللهجة الجزائرية 🇩🇿 _
Romanceحكايتنا هاذ المرة غير باقي التفاصيل تعرفوهم فالكرونيك الكرونيك من تاليفي و هي من نسج الخيال 💛
