خليني نهدرلكم على خديجة شوية باسكو راح تكون حاضرة بزاف فالكرو تاعنا ؛ خديجة 23 سنة مخطوبة ، شابة بزاف شعرها كحل قصير عينيها كبار مارون سمراء شوية لي فالحومة هابلين عليها بصح ماشي شابة قد رنيم منكذبوش ؛ بصح عقليتها بزاف صعيبة تحب كلش ليها مغرورة بزاف و متحبش رنيم و هذا شعور متبادل بيناتهم
خديجة : اوهه رنيم هاذي غيبة
رنيم : الله لا يغيبك
خديجة : اممم وين راهي ريهام شفتها جات
قبل متهدر رنيم كانت نطقت ريهام لي كانت ماللور
ريهام : راني هنا ارواحي
راحت خديجة عندها سلمو على بعضهم
خديجة : توحشتك
ريهام : حتى انا ... اههه رنيم تعيشي جيبي كاس جو لخديجة
خرجت حياة مالصالون للكولوار و هدرت وقت سمعتهم
حياة : وعلاش راكي عايبة ريهام روحي حطي وحدك
سكتت ريهام و دارت لخديجة
ريهام : خديجة ادخلي للصالون دوك نجي
خديجة : داكور
راحت خديجة و ريهام دارت ليماها
ريهام : وعلاش تبهدلي فيا قدام الطفلة
حياة : و نتي تبهدلي ختك قدام الطفلة نورمال
رنيم : ماما نورمال مصرا والو
ريهام : هاي حتى هي مهدرت والو ياك دايمن هي لي طيبلنا و تحطلنا
حياة : بيناتكم نتوما الخواتات اذا حبيتو كولو بعضكم قدام الناس لالا
استغفرت ريهام و راحت للكوزينة جيب الجو
حياة : مفهمتش واش عاجبها فخديجة هاذي سيرتها على كل لسان
رنيم : وعلاش الهدرة هاذي ماما دوك تسمعك
حياة : و تسمع مكنتش نشوفها قبل طتتخطب من راجل لراجل متدخل للدار حتى 6 و 7 تاع العشية لقاو لاليبارتي ملي مات باباهم
غمضت ريهام عينيها تعرف بلي هدرة يماها صح بصح مجاياش تهدر على بنات الناس
رنيم : انا نروح نكمل لعشا
حياة : خلي دوك انا نروح ادخلي مع البنات
رنيم : تعرفيني منحبش نقسر معاها و ...
حياة : قتلك روحي متعيينيش دايمن غابنة روحك فالدار و الشغل و الطياب منين راح يشوفوك الناس و يخطبوك حتى من القسرة ولات لالا
راحت حياة للكوزينة و رنيم عضت على شواربها ماشي حابة تدخل عندها
دخلت بخطوات ثقال لقات امير عندها و هي تبوس فيه و لجين و قاعدة معاها زادت دخلت ريهام و فيدها الجو حطتهولها ؛ قعدت
خديجة قاعدة تحكي على خطيبها و واش جابلها و شرالها و واش شرات لجهازها .... ؛ لجين و ريهام منسجمين معاها و رنيم تتبسم بوجيعة متمنية تعيش و تحس كيما البنات لخرين ( راح تحسي و تعيشي ما كثر استناي برك 😂 ) نطقت خديجة معاها مخرجتها من سهوتها
خديجة : رنيم تعرفي صاحب امين( امين خطيبها ) ماتت يماه و دوكا تفاهمو الولاد يزوجو باباهم يعني ميقدروش يخليوه وحدو شكون يقيم بيه صراحة انا كي حكالي امين جيتي نتي في راسي يعني هاكي قايمة بداركم الله يبارك قلت يعني اذا تحبي نهدرلهم عليك
رنيم حمارت و عينيها تعمرو بالدموع
لجين : خديجة علبالك واش راكي تقولي ختي مزالها فعز شبابها حابة جيبيلها واحد قد باباها او اكثر
خديجة : مقلتش حاجة عيانة يعني هي مكتوبها مجاش و ....
دورو راسها على حياة لي حاطة يدها على حزامها و تخزر فيها
حياة : اخرجي من داري
خديجة : طاطا ...
حياة : قتلك اخرجي و منزيدش نسحقك هنا فهمتي
ناضت ريهام
ريهام : ماما
حياة : مزالك هنا
خديجة : راني خارجة الغلطة فيا نخمم على مصلحتها
حياة : خممي على روحك بزاف انا على الاقل بناتي قعدو رافعين راس باباهم حتى و هو غايب
خديجة : ههه طاطا عارفة واش راكي تهدري راكي تمعني عليا
هذا هو البارت ان شاء الله يكون عجبكم خليولي ارائكم فالتعليقات و اقتراحاتكم و الى الملتقى انشاءالله في بارت اخر 💛
أنت تقرأ
انت املي _ باللهجة الجزائرية 🇩🇿 _
Roman d'amourحكايتنا هاذ المرة غير باقي التفاصيل تعرفوهم فالكرونيك الكرونيك من تاليفي و هي من نسج الخيال 💛
