انت املي _ باللهجة الجزائرية 🇩🇿 _

بارت 55

حياة : هي فالحق منكذبش عليك علبالك راهي تعيا مع الخدمة و زيد الشغل بزاف عليها بصح هكاك و نسقسيها .... رنييييم رنيييم
....
رنيم : وي ماما ... اه ماني وشراكي
فاطمة : الحمد لله و نتيا
رنيم : سافا
فاطمة : اممم حياة معليش مكلاه نشقيها عندك الحق تكون عيات
رنيم : علاه وشنو
حياة : قاتلك شراو دار و حبت تروحي تعاونيها كي راهم رايحين يفرزوها
رنيم : اههه .... هو ....
فاطمة : لالا رنيم خلاص بني اصلا هبة و البنات كامل تما و لعشية مروان يروح يجيب يقين و رباب
رنيم : ... لالا ماني واش عليه مدامك قصدتيني منردكش ياك نورمال ماما
حياة : امم دبري راسك
فاطمة : ربي يحفظك رنيم ... انا نروح نشوف مروان يكون جا بارسكو هو يوصلنا و كي نكونوا رايحين راني نجي نطبطبلك
رنيم : ايه خلاص

خرجت فاطمة و حياة دارتلها بيدها هاو وجهي

رنيم : وشنو ماما عيب نردها
حياة : دبري راسك واش نقلك ظهرك طاح و نتي تخدمي فيهم

ناضت حياة مخليتها و رنيم خبطت راسها بيدها

رنيم : حياة تقعد هي هي محال تتبدل

راحت لبست عبايتها و دات فيزو و sweet shirt طويل مع طابلية حطتهم و قعدت تستنى ففاطمة تهبط

فاطمة كانت تغلق فالبايط لي وجدت فيهم الماكلة للفطور

مروان : ماني هيا خفي شوية هذاك هو الاخرين ديجا وصلو
فاطمة : لقيتو لي يوجدلكم الماكلة و تزيدو تشركو فمكم
مروان : خلاص خودي راحتك
فاطمة : روح شوف الباب هاذي  تكون رنيم

كملت تحط البايط فالساشي حتى لقات خديجة دخلت

فاطمة : اههه خديجة صباح الخير
خديجة : صباح الخير ماني وشراكي
فاطمة : الحمد لله و نتي
خديجة : سافابا ماني
فاطمة : غير الخير
خديجة : غلطت معاكم فحاجة ... مفهمتش وعلاش ادم قالي مكلاه تزيدي جي و جاب واحد اخرى فبلاصتي
فاطمة : يا حنونتي منكذبش عليك علمي علمك جا قالي بلي خديجة مراحش تزيد جي قلت بلاك نتي وليتي متقدريش جي ولا دوك سمعتها منك .... يكون بلاك قال بزاف عليك سورتو كي مراكيش تحبي تحكمي دراهم
خديجة : زعما
مروان : ماني راني هابط نوض طونوبيل متطولوش
خديجة : وين رايحين ماني
فاطمة : لدار منصف الجديدة راح نفرزوها قبل ما يجو
خديجة : و معامن رايحة
فاطمة : مع رنيم و راهم تما مام صحاب ادم و منبعد تلحق يقين و رباب
خديجة : ياااه حالة نقدر نجي معاكم
فاطمة : .... دبري راسك كيما تحبي
خديجة : يااي مارسي نروح نوجد روحي و نجي

.......

وقت سمعت الباب رفدت ساكها و حوايجها سلمت على دارهم و خرجت ؛ غير خرجت قابلتها خديجة تبسمت معاها فوق قلبها و راحو
مسافة طريق و كانوا لحقوا لقاوهم ديجا كامل تما من غير ادم و غيث لي راحوا يجيبوا الصبيغة ؛ منبعد تقاسمو الخدمة كل واحد واش راح يدير فاطمة طلعت مع رنيم توريلها فالشنابر و البنات كانوا لتحت

هبة : اوووه ميرا سنسلة تاعك بزاف شابة منين شريتيها
ميرا : اهه مشريتهاش جابهالي غير كيف غيث كادو تاع لانيفارسار
هبة : غيث ... مليح

وسام زيرت على البالي لي كان فيدها و راحت تبالي راح تطرطق

......

فاطمة : هاذي لاشومبر تاع منصف و مرتو خيرناها تكون كبيرة و هاذي تاع ادم و لي اونفاص ليقين و لي فليطاج لي من فوق وحدة تاعي وحدة لمروان و وحدة تاع الضياف ... الشمبرة تاع ادم منصبغوهاش نخليوها بيضة هي و تاع مروان تاني سما نبداو نقيوهم هما الاولين تاع منصف يديروهالو باج و يقين روز كلار سما نحيو الغبرا برك تما باش يقدرو يصبغو
رنيم : ايه
فاطمة : نتي سقمي تاع ادم و الباقي قوليلهم واش يديرو راني مديتلك ليك المسؤولية عيشة و داندو برك مديلهم يديرو حاجة كيف كيف باش ما يكسرليش سيف راسي
رنيم : ههه خلاص

قسمو الخدمة و كل واحد شد خدمته ؛ رنيم دخلت للشمبرة تاع ادم و راحت للتاقة قعدت غايسة حتى سمعت صوتو هو و غيث كي جاو قاطعتها ميرا لي دخلت

ميرا : رنيم قاتلك فطوم روحي نقي شمبرة يقين قبل بارسكو دوك يجيو يصبغوها
رنيم : ايه

راحت ليها و بدات تباليي حتى حست ببنادم دخل عرفتو هو قالتلو

رنيم : قريب نكمل باش تبدا تصبغ

حط البيدون تاع الصبيغة و ربع يديه

ادم : نقدر نفهم وعلاش راكي ديري هكذا
رنيم ( دارت ) : واش راني ندير 
ادم : مراكيش تروماركي فروحك بلي وين تشوفيني تقلبي وجهك
رنيم : لالا ...... و زيد ندير كيما نحب
ادم : خلاص ديري كيما تحبي

رفد هذاك البيدون بالتشناف و بدا يفتح فيه متجاهلها بلعت غصتها و خرجت راحت لشمبرته ؛ حطت صباعتيها على عينيها باش ميهبطوش دموعها منبعد بدات تسيق فيها شوية هكذا و هي تخدم لقات خديجة داخلة لشمبرة يقين لي كان فيها ادم ؛ زيرت على يدها

رنيم : واش دخلني فيهم

فالاخر استسلمت لقلبها و راحت قدام الباب تتسمع و دايرة روحها زعما تحوس فالبيفي لي كانو حاطينو فالكولوار

خديجة : نقدر نفهم وعلاش مخليتنيش نكمل انا الانسولين لمانك
ادم : مكان حتى سبة ياك ماشي بسيف يعطيك صحة وقفتي معاها بصح دوكا كاين لي راح ديرهالها متتقلقيش
خديجة : غلطت فكاش حاجة
ادم : قتلك هذاك نهار بلي مدرتي حتى غلطة au contraire 
خديجة : ملا وعلاش
ادم : مي نتي لسقة صح قتلك درتي لي عليك و يعطيك الصحة هنا تحبس
خديجة : ادم .... علبالك بلي

كمل يصبغ متجاهلها منبعد كي هدرت هكذاك غمض عينو فاهمها واش راح تقول

خديجة : انا نحبك نحبك منهار شفتك ( حشمت فبلاصتها ) و تكذب لوكان تقول بلي ممرقتليش .... ادم مراح تقول والو

قلبها وجعها و هي تسمع فيهم كانت راح تروح لوكان مسمعتش واش قال الشي لي خلى قلبها يضرب قريب مخرج من بلاصته

ادم : بصح انا نحب واحد اخرى ......

هذي هي الحلقة و الحلقات تاع اليوم عييت و انا نكتب فيهم و يكون فعلمكم مكنتش راح نحطهم ههه بارسكو طحت رقدت و نضت فوسط النعاس نحوس نكتبهم ملا شجعوني بتفاعلكم و الى الملتقى ان شاء الله في بارت جديد 💚💛💚