غلق لامال و راح يدخل للطونوبيل منبعد دور راسو لتاقتها لقى ضو طافي عرفها رقدت ؛ ركب و ديمارا هبط شرا الما و رجع يسوق بعد واحد عشر دقايق من لي كان يسوق لحق لواحد طريق خالية حتى يسمع العياط من برا و يشوف فبنادم يجري مور طونوبيل تاعو عقد حواجبو و مقدرش يعرف شكون بحكم كان بعيد
حبس الطونوبيل و فتح الباب ؛ حتى يلقاها ... رنيم عقد حواجبو وقت لحقت قدامو حاطة يدها على صدرها تلهث
ادم : واش جابك هنااا
رنيم : ... تروح بلا ما تودعني .... لهاذ الدرجة ما نسواش عندك و يا لوكان شوية
ذبلت عينيها و ميلت راسها ؛ قعدو شحال ساكتين حتى لقاتو عنقها مزير عليها قعدو شحال حتى جبدت روحها بلعقل ؛ خزرت فيه وجهها حمر و عينيها مدمعين
رنيم : ادم ما تروحش
ادم : لازم نروح رنيم وعلاش انا لقيتها ساهلة
رنيم : شحال راح تقعد
ادم : رنيم راح نولي لخدمتي تما حياتي و خدمتي تما
رنيم : و انا
ادم ( تنهد ) : ..... وعلاش ديرولي هكذا
رنيم : خلاص مقلت والو دبر راسك انا جيت نودعك و نولي ... طريق سلامة
دارت مولية عاود جبدها
ادم : وين رايحة
رنيم : للدار وين
ادم : اركبي
رنيم : لوين
ادم : جي معايا
رنيم : صح !!!
خبطلها راسها
ادم : بواش تخممي راح نرجعك للدار
حمارت كي حشمها هكذاك
رنيم : لالا خلي كيما جيت نولي
ادم : رنيم هيا ما تعينيش .... ديجا واش خرجك دوكا كاش واحد فعقلو يخرج يجري على 10 تاع الليل فالطريق
رنيم : انا عقلي راح هذا شحال
ادم : واش قلتي
رنيم : والو .... ( هبطت راسها ) .... انا كانت حسبتلي .... راح تبقيني على خير قبل ما تروح بصح نتا مخسرت عليا حتى كلمة مكانش علبالي بلي زعفت مني هكذا
ادم : واش حبيتيني نديرلك نتي وين تشوفيني دوري وجهك حابتيني نجي نحللك
رنيم : عندك الحق
ادم : هيا ادخلي للطونوبيل هذاك هو
رنيم : اممم
ركبت و هو رجعها للحومة ؛ غير لحقو دار ليها
ادم : هيا خلاصو دراهمك مدموزال
تبسمت و قالتله
رنيم : تهلى فروحك
ادم : و نتي تاني
تبسمت و دورت راسها باش تهبط
ادم : رنيم
رنيم : اممم
ادم : كي نولي ان شاء الله عندنا ما راح نهدرو
دارتلو براسها ايه و هبطت
طلعت بلعقل للدار ؛ فتحت الباب تنهدت وقت ملقات حتى واحد راحت لشمبرتها بالزربة غير شعلت الضو لقات ريهام قاعدة و حاطة رجل على رجل يبست فبلاصتها
رنيم : ريهام
غلقت الباب بلعقل
ريهام : وين كنتي يا لالة
رنيم : اههه ... رحت رميت الزبل ( حشاكم )
ريهام : فالليل ..... و هاذ المزبلة جاية فالطونوبيل تاع ادم
أنت تقرأ
انت املي _ باللهجة الجزائرية 🇩🇿 _
Любовные романыحكايتنا هاذ المرة غير باقي التفاصيل تعرفوهم فالكرونيك الكرونيك من تاليفي و هي من نسج الخيال 💛
