انت املي _ باللهجة الجزائرية 🇩🇿 _

بارت 2

رنيم : ماما راني هابطة ندي الفطور
حياة : ايه مطوليش برك

خرجت بالزربة غالقة مورايا الباب ؛ طلعت طابقين و كنت لحقت ؛ طبطبت خطرة و زوج نستنى تفتح دورت راسي نشوف من و من اذا كاش راجل جاي ، من وقت فتحت عينيا للدنيا لقيت والديا يمشيو بهاذ العقلية نشأت في عائلة متحفظة بزاف و فوقها منحبش نتلاقى بكمال هذا واحد نسونجي و زطايلي كبير و شارف و يظل يعس الطالعة و الهابطة عينيه نحسهم ياكلوني كي ننتلقاه حتى انه جا خطبني بصح الحمد لله ماما مخلاتلوش و مبقاتلوش و حتى من بابا كان رافض معروف بمشاكلو فالحومة ، قاطعت الباب افكاري وقت تفتحت تبسمت وقت شافتني

فاطمة : ادخلي ادخلي

دخلت و رحت ديراكت للكوزينة و انا نهدر

رنيم : هاني جبتلك الطعام لي تحبيه ماني

دخلت فاطمة عندها

فاطمة : ربي يخليك يا بنتي
رنيم : بلا مزيتي ماني

زربت حطيتهولها فوق الطابلة و حطيتلها مغرفة و كاس ماء معاه جبدت دواها و حطيتو

رنيم : ماني راني حطيتلك كلش متنسايش دواك قبل ما تاكلي و غدوة ان شاء الله راني نجي نقيلك الدار
فاطمة : ياك قتلك متزيديش تعبي روحك
رنيم : تعبك راحة

سلمتلها على راسها و خرجت ؛ هاذي ماني فاطمة نعرفوها من وقت جينا نسكنو هنا عندو عامين من لي مات راجلها و هي قعدت وحدها حتى من ولادها لي نحشم نقول عليهم ولادها كل واحد وين مايجيوها غير من مناسبة لمناسبة بنتها مزوجة و عايشة في تركيا و عندها زوج دراري
هي صح لباس بيها و كل مرة جيب خدامة تعاونها بصح نحب دايمن نديلها حقها تاع الماكلة و نعاونها بلي نقدر عليه و كل جمعة نروح نغسللها و نقيلها الدار الخدامة لي  جي تمسح فوق فوق و نزيد ندوشلها والفتها و والفتني وصلت للدار لقيت سولا لحقت حطيتلهم الفطور منبعد عاونتني غسلناهم و جازت العشية عادي

صباح جديد :

صوت الباب صدعلي راسي و خلاني نوض نشوف لي مالصباح و هو يصوني مالغري علبالي شكون فتحت الباب و حطيت يدي على خصري

رنيم : خير يا طير
سارة : صباحو رورو
رنيم : لوقتاش تبطلي هاذ العادة راكي حرقتي علينا لاصونات
سارة : ههه واش ندير عادة منقدرش نبدلها و زيد راني في دارنا اييه سولا مزال مناضت
رنيم : روحي تشوفيها راكي تعرفي دار

ضحكت و دخلت و انا تبسمت من تصرفاتها هاذي سارة صحبة سلسبيل طفلة حلوة و تدخل للقلب بصح خفيفة بزاف
رحت للدوش غسلت و صليت صلاتي درت ميناج خفيف بحكم الدار نقية منبعد لبست حاجة خفيفة و طلعت عند ماني فاطمة و درت لي نديرو كل جمعة وقت كملتلها نشفتلها شعرها و حطيت لفطور عادة ما نفطر معاها يوم الجمعة ، لي منحسلها حتى طعم من غير بابا اصلا يماتي كلهم نحسهم سامطين مفيهم حتى تغيير
سولا دايمن تلقاها لاسقة فالتيليفون تكونيكتي و ماما مع المسلسلات ولا تقسر فالتليفون خواتاتي لي تزوجو لاهيين بحياتهم يعيطو خطرة فالفال اما انا فما يتفكرونيش ريهام وقت تعيطلي يا اما سحقت مني كاش روسات ولا حبتني نديرلها كاش حاجة اصلا علاقتنا ناشفة بزاف و لجين مرات تعيط تسقسي عليا
و ماما لي منفهمهاش مرات نقول تحبني و تخمم عليا و مرات نحس روحي عبئ عليها من كثرة ما تنبزني فوليت نحس روحي وحيدة وسط عائلة كبيرة من غير بابا لي يسقسي عليا و حتى هو مسكين فبلاصة مفيهاش الريزو منعرف اذا انا حساسة بالزيادة ولا عندي الحق بصح دايمن نحوس على الاهتمام من الناس لي نحبهم و لكن منلقاهش و فااخر نلقى مخدتي مشمخة بادموع فالليل هاذي هيا انا ... صح دايمن نبين لي انا مش متأثرة و ميهمنيش كلام الناس بصح وقت يطيح الليل و نبقى وحدي قناع القوة يطيح و تخرج رنيم الضعيفة

هذا هو التفاعل البنات وحدة برك تعلق هااا 😩😔😔