الحلقه 34
سلسلة #القائد ( الجزء التانى )
بقلم / اسماء جمال جمعه Soma Ahmed
••••••
لايك و عشر ملصقات ارفعوا الحلقه قبل القراءه رجاءاً الاكونت و الجروب كده هيفضوا من كتر الفلتره 🙈🙈••••••
حمزه بص كتير للملف اللى اخده من الراجل و الراجل رمى كلامه اللى جذب انتباه حمزه : بس المعروف للكل انه من الصعيد
حمزه بصّله قوى و الراجل شاور بحيره : هو كاتب ف السى فى بتاعه كده .. لكن من فين تحديدا معرفتش اوصل لده
حمزه وقف بتوهه و عينيه بتوسع اوى و مد إيده فتح الملف و إبتدى يقراه بالتفصيل .. اتعدل بإهتمام و ابتدى يفحص اوراقه بجديه !
#سوووووما
هديه قاعده سرحانه و هنا اتحركت من مكتبها جنبها..
هديه ابتسمت بحيره .. لأول مره تحس انها متكتفه كده .. لاء و التكتيفه عجباها و مريحاها كمان ! طول عمرها بتحب الحريه و طول عمرها منطلقه زى ما هى طول عمرها قويه .. امتى بقت كده !
هنا غمزتلها : اتصالحتوا صح ؟
هديه كشرت : لاء
هنا رفعت حاجبها : و حياة امك ؟ امال كل السرحان ده ف مين ؟ و انا اللى مش راضيه اغلس عليكى و سيباكى تسرحى براحتك و اقول يمكن بتبوسه ف خيالها و لا شاقطه حضن كده و لا كده
هديه كتمت بوقها بفايل ف إيدها بغيظ : بسسس بس اخرسى .. انتى ف مكتب صحافه و لا دعاره ؟
هنا رفعت إيدها من على بوقها : طب احكيلى لا اعملك دعايه هنا ف الجريده و مجانا كمان و لا اللى اتعملت لبنت المرشدى بفرحها
هديه : يخربييت هنتفضح .. انتى لسانك ده ايه فرمان ؟
هنا ربعت ع المكتب و اتعدلت بحماس : هاا ؟ هاا ؟ يلا انا بحب جو الروايات ده .. اشجينى
هديه قعدت بضيق : مش عارفه يا هنا .. لا عارفه اتراضى و لا بقيت قادره تانى اخاصم ، مبقتش قادره ابعد و لا عارفه اقرب
هنا رفعت حاجبها و شاورت بمرح : لالا من الاول يا سلوى
هديه سندت كوعها ع المكتب : من يوم الحادثه متخاصمين و
هنا بمرح : لالا من الاول يا سلوى .. من اول الكُفر اللى ف بداية القصيده
هديه شالت ملف من قدامها حدفته ف وشها بغيظ : مانا بحكيلك من الاول يا ام جهل
هنا اتعدلت بحماس : اه اه معلش اندمجت شويه .. اصل دايما بيقولوا اول القصيده كُفر و الكفر ده و الله اعلم ف العلاقات بيبقى بوس و احضان و حاجات كده استغفر الله زى بتاع الروايات ، التهم شفتاها و التحم ف احضانها و حاجات كده تدعو للرذيله ...معرفش انتى الكفر بتاعك ماله قالب من بوس لبؤس ليه !
هديه عضت بوقها بغيظ و هنا رفعت إيديها : خلاص خلاص .. احكى
هديه قعدت بضيق : كذب عليا .. و المشكله انه فاكر ان المشكله ف محتوى كذبه اكتر ماهى ف فكرة انه كذب اصلا
هنا : لالا واحده واحده و براحه .. الاول كده كذب ف ايه ؟
هديه اترددت شويه قبل ما تحكيلها كل حاجه ..
هنا برّقت : يخربييت المزمزه اللى هو فيها .. بقا المز ده يطلع منه ماسورة مجارى الكذب دى ؟
هديه كشرت : شوفتى ؟ ليا الحق اسيبه و ازعل و لا لاء ؟
هنا اتعدلت بجديه : لا اذا كان كده يبقى حقك .. بس قوليلى الاول و بصراحه كده .. انتى زعلتى اكتر من انه كدب و لا من انه كذب تحديدا ف الجواز ؟
