Project Eden Virus

7-4 Pagpapadala ng mga Hukbo

Ika-6 ng Pebrero 2019, 2:15 PM

Sa isang virtual na pagpupulong halintulad sa Zoom, nag-uulat si heneral Lao at humihingi ng huling salita mula sa kumite ng WVO tungkol sa kanilang proyekto upang sukulin ang mga hukbo ni Jaffar sa Malaysia at Japan.

Sigurado si Lao na aatakihin at kukunin ni Jaffar ang JLAB at MLAB na siyang mga laboratoryo ng WVO sa dalawang bansa sapagkat taglay ng mga ito ang mga instrumento at kemikal na maaring magamit sa pagkakalat o pagpuksa ng mga virus at epidemya. Nakahanda na ang mga sasakyang himpapawid at pandagat upang ihatid ang mga lakas militar. Inilatag nya ang mga datos at ebidensya sa gagawing pagsalakay sa mga kuta ng kanilang kalaban.

Kakailanganin ng isang libong sundalong bampira upang maipatupad ang operasyon. Sa kasalukuyan ay may numerong tig-1200 sundalo ang KLAb at KHQ. Nakahanda na ang 500 sundalo ng KLAB, kakailanganin na lamang ang dagdag na 500 na magmumula sa KHQ.

Kinuwestyon ng ilang mga pinuno ang mga plano ni Lao.

"Magiging delikado at magastos ang iyong operasyon. Tandaan mo Lao kailangan din nating bantayan ang seguridad ng Korea lalo pa ngayon na humiwalay na ang Gapyeong sa ating mga proyekto"

"Oo nga, isa pa ay may mga dumadayo rin na mga halimaw sa Korea upang sumali sa seremonya doon. Kailangan natin ng solidong seguridad para sa KHQ"

"Paano kung mag-ambag ng sundalo ang iba't ibang bansa upang tumulong"

"Magiging magulo ang proseso. Unti-unti na nating pinatutupad ang lockdown at kailangan nating maging mahigpit. May iba't ibang kaso na tayo sa Asya at hindi natin dapat ipagpaliban ang posibilidad na ang mga sundalo pa ang maaaring magpalaganap ng mga virus"

"Tandaan natin na base sa mga tala ay may mga nawawala tayong sundalo at empleyado kada taon. Kasalukuyan ay 0.8% ang bilang mula sa kabuuang populasyon sa kada bansa ang nawawala sa ating mga talaan"

Iba't ibang mungkahi at suhestyon ang narinig at nang matapos ang mga talakayan ay dismayadong lumabas si Lao at nagtungo sa isa pang silid sa kanilang himpilan upang magbigay ng direksyon sa kanyang mga nasasakupan.

Ang isang libong sundalo na ipapadala sa Japan at Malaysia ay manggagaling sa KLAB na siyang mas pamilyar sa mga pasilidad ng JLAB at MLAB at upang maiwasan ang anumang banta ng panganib, ipapatupad ng WVO ang lockdown na gagawin sa mga papasok na mga halimaw sa Korea sa loob ng dalawang araw na siya ring huling araw ng pagpaparehistro sa Gapyeong.

Inihanda ng KLAB ang mga sasakyang himpapawid na may kakayahang gumawa ng perpektong comouflage na hindi kayang makita ng mga mata at mahagilap ng teknolohiya ng mga ordinaryong tao. Gayundin nakaayos na ang kanilang mga sasakyan na dumadaan sa kailaliman ng karagatan.

Nang matapos magbigay ng mga utos, inanyayahan si Lao ng ilang opisyal sa isa pang silid upang makipag-usap naman kay Ragnar na humihingi ng ransom.

Isang espesyal na babaeng sundalong bampira ang bihag ni Ragnar. Ginigising at isinasakay ni Ragnar ang babae patungo sa iba't ibang lugar upang gawing tigabigay ng mensahe sa KLAB. Gayundin may isa pang katawan ang sundalo na hawak ng KLAB na sya ring nagsisilbing tagatanggap ng mensahe sa pamamagitan ng quantum entanglement. Nakaupo ang kaparehong babae sa harap ng mga opisyal ni Lao sa KLAB.

Mula sa sasakyan ay sinampal-sampal ni Ragnar ang babaeng sundalo na nakakadena at may mga pasa.

"Nandito ka na ba?" tanong ni Ragnar. Tumango ang babae. Pinainom nya ng tubig mula sa isang bote ang bampira.

"Sabihin mo sa iyong heneral na bihag namin ang tatlong hapones na babaeng umatake sa akin noong nakaraang gabi. Tig 10 milyong dolyar ang patong sa kanilang mga ulo. Kailangan ko ang pera sa loob ng isang linggo, kung hindi ay puputulin ko ang kanilang mga braso at binti" utos ni Ragnar.

Ipinabatid ng babaeng sundalo ang mensahe sa mga opisyal sa KLAB. Pumayag si Lao sa kondisyon.

Natuwa si Ragnar sa naging tugon. Muli siyang nagtanong kung bakit siya inatake noong mga oras na iyon.

Sumagot naman si Lao na nabalitaan nila ang ugnayan ni Jaffar sa dalawang Pseudogen na sina Ragnar at Lee.

"Bobo talaga kayo Lao. Kung may balak kaming sakupin ang mundo kasama si Jaffar edi sana hindi na kami nagtatrabaho nang marangal upang kumita ng pera. Siya nga pala sa susunod na magpadala ka ng sundalo sa aming mga nasasakupan ay hindi na ako magdadalawang isip na pagpira-pirasuhin sila. Batid ng sundalo mo rito ang sinapit ng kanyang mga kasamahan dahil sa inyong kalapastanganan at katangahan"

Nagngingitngit sa galit si Ragnar at muling nanakot.

"Tandaan nyo. Isang linggo lamang ang palugit ko sa inyo. Matapos ang isang linggo at wala pa ang ransom ay makakatanggap kayo ng mga piraso ng katawan. Pakitubos na din ang mga natitira nyo pang sundalo. Naghihingalo na sila"

Humingi ng tawad si Lao at ninais na makipag-usap pa nang mas matagal upang humingi ng impormasyon at makipagtulungan ngunit agad tinurukan ni Ragnar ng tranquilizer ang babaeng sundalo.

Muling nadismaya si Lao sa pagkakadakip ng mga Himura. Muli nyang tinipon ang mg opisyal.

"Sabi na nga ba hindi nila kakayanin si Ragnar. Mukhang wala na tayong pagpipilian. Kailangan muna nating pabayaan ang mga legal na pseudogen ngunit matyagan nyo pa rin silang mabuti. Ibigay nyo ang ransom sa mga Himura at siguraduhing sila ay makabalik nang ligtas. Sa ngayon ay kailangan nating magbigay pokus sa ating operasyon sa JLAB at MLAB. Kailangang mahuli si Jaffar at ang kanyang mga kampon. Lumalala na ang sitwasyon ukol sa pagkawala ng mga tao at bampira sa mga bansang iyon na dapat ay umaalarma na sa mga opisyal ng WVO"

Lumapit si Lao sa baaeng sundalong tigabigay ng mensahe.

"Pagakatapos ng operasyon at pagbayad ng ransom sa mga natitirang sundalong bihag ni Ragnar ay hahayaan na naming bitiwan at kalimutan mo na nang tuluyan ang isa mo pang katawan"

Sumaludo ang babaeng sundalo at nagpasalamat.