بنت الكاريان والمشهـور الوسيـم

البارت 49

🎵🌸بــنت الكريـــان والمشهـــور الوسيـــم🌸🎵

                🎵🌸صــــفقــــة زواج🌸🎵

💜🌸أحــــبـبــــت بـــســـاطــتـــك النــــــادرة🌸💜

بقلمـــــي وأناملــــي :🎶أميــمـــة مــاريبــوســــا🎶

الـبــــــــــــارت : 49
نهيلة وقفت وهزات يديها لفوق : غادي تصبري عليا شوية نخرج ونرجع وديك ساعة أنا معاك
خديجة : فين باغا تمشي
نهيلة : عندي واحد لغراض نقضيه ونرجع نجري
خديجة : وخا سيري ومتعطليش

_مشات نهيلة للبيت تاعها هزات لكارط كيشي ولوراق تاعها لي خاصنيها تاع لبنكة وخرجت وخلات ماماها وباباها فرحانين أنهم بنتهم لكبيرة غادة تزوج...

_خرجات من دار وهزت تلفون كتصوني على سفيان وكدور عينيها فدرب باش لشافتوا تقطع....

سفيان : الو نهيلة
نهيلة : فينك
سفيان : كين فالدريبة لورانية معا العشران علاش
نهيلة : على المشماش لي طاب ومحلاش اتا نزل عندي خلينا نمشيو نقديو لغراض راه تابعني شلا حويج
سفيان : وخا ازين هانا نازل عندك
نهيلة : تلقاني واقفة فالشارع
سفيان : صافي مشات

_مشات نهيلة لشارع ووقفت كتسناه... بعد مدة قصيرة وقف عليها بالموطور...

سفيان : يله ركبي
نهيلة ركبت وراه : يله وصلنا للبنكة لي كينة فراس
سفيان : حاضر الآلة

_تحرك سفيان ونهيلة للبنكة وهوما كيضحكوا... دخلوا للبنكة وهدرت معاهم وعطاتهم لوراق لي خاصة وأي حاجة طلبوها منهم وخا تعطلوا ولكن فالخر جبدوا ليها فلوسها وعطاوهم ليها... جمعتهم فواحد ساك كانت جابتوا معاها وركبت معا سفيان وتحركوا راجعين للدرب...

نهيلة : اوا اسيدي هاهوما لفلوس جبنهم المهمة لخرى بقات عليك
سفيان وهوا سيق بيها : لهلا يخطيك وان شاء الله نردهم ليك فأقرب وقت
نهيلة : نسا هدشي وفكر فراسك أنا راني مواقفاش على لفلوس باش تردهم ليا وأنا معطيتك هدشي حتا كنت مقتانعة بلي الى كنت فبلاصتك غادي دير معايا نفس شي
سفيان : لهلا يخطيك علينا وصافي
نهيلة بتفاخر : أمين أصلا أنا عارفو بلا بيا تموتوا
سفيان وقف المطور : متكبرة نزلي لداركم
نهيلة نزلات ومدات ليه ساك : هكا اسيدي فلوسك وهاهيا المتكبرة غادة
سفيان شد من عندها ساك وباس ليها راسها : عمرني نقدر نعطك حتا شوية من لي هدشي لي درتي معايا
نهيلة ضربتوا لكرشوا : مبيناتناش وكون راجل ونص ومضيعش الفلوس
سفيان : متخافيش غادي نخدمهم فالحلال ومنضيعهمش ان شاء الله
نهيلة : ان شاء الله يله نخليك تابعني شلا حويج
سفيان : الله يعونك