بنت الكاريان والمشهـور الوسيـم

البارت 57

🎵🌸بــنت الكريـــان والمشهـــور الوسيـــم🌸🎵

                🎵🌸صــــفقــــة زواج🌸🎵

💜🌸أحــــبـبــــت بـــســـاطــتـــك النــــــادرة🌸💜

بقلمـــــي وأناملــــي :🎶أميــمـــة مــاريبــوســــا🎶

الـبــــــــــــارت : 57
سعاد حطت تلفون فوق ناموشية ومشات لعندها باش تصوب ليها شعرها : بان ليا تصطيتي والله طلقي جاك شيشوار نصوب ليك شعرك راك تفروحتي حق مولانا
نهيلة عطاتها شيشوار : هاكي صوبي ليا شعري وحتا يجي وتشوفي
سعاد : اوا هحنا نتبعوا الكداب حتال باب دار
نهيلة ليعتها معاها بقرصة من لفخض : انا كدابة اكبيرت الكدابين
سعاد وهيا كتحك فالقرصة : الله الله يختي على قريص عندك بحال تاع لحنانة
نهيلة : صبري كملي خلاص لنزيدك وحدة خرى

_بقاو كيهضروا ويضحكوا ويتخاصموا وهوا كيتقادوا... لباسات نهيلة لقميص لي شرات لي كان فالزرق بارد بزااف وطلقات شعرها ودارت مكياج خفيف بحكم مها حلفت عليها مدير داك تخربيق تاعها وتبان طبيعية وحتا سعاد لباسات لقميص لي جابت معاها لي كان فالخضر بارد وقادات شعرها ودارت ليها فيليل وحطت عليه شال بيض...

خديجة دقات ودخلت عليهم : تبارك الله جيتوا فنات مشاء الله عليكم
سعاد : حتا نتي جاك لقميص على مزيناتوا اخالتي

_كانت لابسة قميص فالكرونة لي جا لي مغا بشرتها لبيضة...

خديحة : ربي يحفظك ابنتي (شافت فنهيلة) واش قربوا يجيو ولا مزال
نهيلة مشات هزت تلفون تاعها : انا نصوني عليهم نشوف
خديجة : أه وخا وانا غادي نمشي نشوف واش ناقصة شي حاجة ولا لا
نهيلة : صافي

_خرجات خديجة وخلات نهيلة وسعاد لي باركين باغين يصوني على الخطاب...

نهيلة صونات عليه وحطت تلفون على وذنها... بعد مدة تفتح الخط : الو
سعاد كتهضر معاها بالإشارة باش تخليها تسمع معاها حتا هيا
نهيلة ضارت صبعها فمها وهيا مخرجة فيها عينيها باش تسكت وزادت صوت فالتلفون وضارت مكبر صوت باش حتا هيا تسمع
يونس : أهلا الحب
نهيلة بدات كدور فعينيها : اويلي نتا مالك
يونس : جداتي اه معايا هاهيا باركة حدايا وكتسلم عليك
نهيلة ضربت ليها فبالها وفهمت قصدوا : سلم عليها حتا نتا
يونس : مبلغ وصل ليها سلامك
نهيلة : فينكم دابا نتوما
يونس : قربنا نوصلوا لبلاصة شي خمسة تاع دقايق نكونوا تم