Unicode
အခန်း - (၁၇) : စွန့်ပစ်ဆေးရုံ (၁)
ကျီယွင်ရှောင်..? တော်တော်လေး ရုပ်တူ… ကျီယွင်ရှောင်အစစ်ကြီးဟ..!!!
မှောင်မိုက်နေသောငြား ချန်ကျစ်ချူးသည် ကျီယွင်ရှောင်ကို တီဗွီဖန်သားပြင်ပေါ်မှာ မကြာခဏ မြင်တွေ့ဖူးသည်ဖြစ်၍ အကြည့်တစ်ချက်ဖြင့်ပင် မှန်းဆနိုင်ခဲ့သည်။ သူ့အရှေ့မှ လူငယ်လေးသည် ကျီယွင်ရှောင်စစ်စစ်ကြီးပင်။
ချန်ကျစ်ချူးမှာ အတော်လေး အံ့အားသင့်သွားရသည်။ ကျီယွင်ရှောင်ကဲ့သို့ နာမည်ကျော် Idol တစ်ယောက်လည်း Infinite Escape တွင် ပါဝင်လာလိမ့်မည်ဟု သူ မထင်ထားခဲ့ပေ။ ပထမဆုံးအတွေးကား ‘ဒီလူသာ ဂိမ်းထဲသေသွားရင် သူ့ညီမလေးနဲ့ ပရိသတ်တွေတော့ အရမ်းဝမ်းနည်းကြရမှာပဲ..’ ဟူ၍။
ထို့နောက်မှာတော့ ကျီယွင်ရှောင်၏ အကြည့်က သူ့အင်္ကျီပေါ် ရောက်နေပြီး ရှက်ကိုးရှက်ကန်း ဖြစ်နေကြောင်း သတိပြုမိလိုက်၏။ ထိုအချိန်မှသာ သူ ကျီယွင်ရှောင်ပုံပါသည့် တီရှပ်ဝတ်ထားပြီး အရုပ်ကျီယွင်ရှောင်ကိုပါ ပွေ့ဖက်ထားမိကြောင်း သတိရသွားတော့သည်။ ချန်ကျစ်ချူးခမျာ မျက်နှာကြီး နီရဲတက်လာပြီး အရုပ်ကိုလည်း ချက်ချင်း အနောက်မှာ ဖွက်လိုက်မိသည်။
လခွမ်း.. ရှက်စရာကြီး..! ကျီယွင်ရှောင်နဲ့ ဒီလိုအခြေအနေမျိုးမှာ လာတွေ့ရတယ်လို့..! တစ်ဖက်လူမျက်နှာနဲ့ Fan club အင်္ကျီကြီးဝတ်၊ အဲ့လူပုံစံအရုပ်ကိုပိုက်ပြီး သေရေးရှင်ရေး ရုန်းကန်ရမယ့် Escape Game ထဲ ဝင်လာတာ…. အခုတော့ သူ့ကို ဘယ်လိုထင်သွားမလဲ..?!
ချန်ကျစ်ချူး၏ မျက်နှာအမူအရာက မထိန်းနိုင်အောင် တောင့်တင်းလာခဲ့၏။
ကျီယွင်ရှောင်၏ Fanbase သည် အတော်လေးကြီးမားပြီး ဆယ်ကျော်သက် မိန်းမငယ်လေးများ၊ အမျိုးသမီးငယ်များဖြင့် ပြည့်နှက်နေသည်မှာ မထူးဆန်းပါချေ။ ကျီယွင်ရှောင်သည် စတိတ်စင်ပေါ် တင်ဆက်ပုံနှင့် ကွာခြားစွာ ကြင်နာတတ်သော အကျင့်စရိုက်မျိုးရှိပြီး နာမည်အကြီးဆုံး TV ဇာတ်လမ်းတွဲတစ်ခုတွင် ထိပ်တန်းကျောင်းသားအဖြစ် ပါဝင်သရုပ်ဆောင်ထားသောကြောင့် သက်ကြီးပိုင်းများကြားတွင်လည်း နာမည်ကြီးသေးသည်။
YOU ARE READING
အသက်ရှင်နိုင်ဖို့အရေး အနမ်းတွေကို မှီခိုနေရဦးမယ်!
HorrorI rely on kisses to clear survival games. 90 Chapters + 9 Extras This is not my own. Totally Credited to original Author.
