عند وليد لي كان قاعد فكافي يتقهوى و يكونيكتي مع صحابو فالبلاد و لي أبدا ما يحشمش يحكيلهم على خرايبه وقتها قال ليه صاحبو سمير" منيتك طردتها.. تبقا بنت بلادك أصاحبي ففرانسا ناضت حرب على واحد قت.. لوه تماك و نتا أمنت عليك ولية رحت قستها برا.. حشمتلك "
وليد " الميساجات الطوال نعڨز نقراهم.. لي يهم انو هي رفدت قشها و خرجت ما طردتهاش تاع سيف " شوي و شاف ميرا دخلت مع وحدة عقد حواجبو و تبعها بعينيه لين ما قعدو و دومونداو قهوة. ميرا كانت مع سكرتيرة المدير و لي قالتلها " اليوم كي شافك المدير قال لي بلي عندك هيئة تاع عارضة.. فإذا تحبي تشاركي فعرض تاع ماركة مكياج جديدة وجهك راح يكون الوجه الإعلاني تاع الماركة "
" اااه.. هادا هو الموضوع.. راسي دار دار و ماجاش كامل لهاد الفكرة.. بصح ما نحبش يخرج وجهي فالإعلانات"
" لي نحتاجوه عينيك برك.. عندك نظرة شابة "
" ههههه.. ماكانش غي انا لي عينيا شابين.. نسا هنا كامل عينيهم زورقين و شابين "
" هههههه الموضوع ماش متعلق بلون العين أما متعلق بشكلها.. و أكيد راح ندفعولك حق المشاركة.. العارضات يخلصو غاية "
"ممم.. الموضوع غريب عليا.. بصح يلا جات فعينيا برك ممكن نجرب علاه لا" تبسمت السكرتيرة و قالت ليها " تأكدي أنو قرارك هادا راح يكون لصالحك.. كي نحدو وقت تصوير راح نتواصل معاك.. درك لازم نروح نشوفك فالشركة "
"قعدي شربي قهوة قبل ما تروحي "
" مرة ثانية.. ني مشغولة درك " وقفت السكرتيرة و وقفت معاها ميرا صافحتها من بعد راحت . و ميرا قعدت كملت قهوتها تا جا سارفور و حطلها الكيك حداها " خزرت ليه و قالت "أما ما دومونديتش الكيك"
" بعتولك لي فطابلة لهيك " نعت ناحيت وليد لي كي شافتو خزرتلو خير الله من بعد قالتلو " أوكي.. شكرا " رفداتو و رفدت فنجانها و جات رايحة عندو كي سمع حس طالو رفع راسو لقاها جاية و هي تتبسم " حطتهم على الطابلة و سحبت كرسي قعدت عليه و قالت
" أهلين زوجي الغالي.. واش راك تراقبني يلا راني نخون فيك " ضحك عليها بإستهزاء و قالها " و علاه نراقبك يعني.. كنت قاعد هنا تا دخلتي مع ديك المرا و أنا .. برك بعتلك حق العشرة " خزر للكيك لي. حداها و هي خزرتلو بنظرة إعجاب مصطنعة و قالت " واااو فضلت.. كرمك راه مغرقني.. واش قدني نرد ليك الجمايل " رفدت من الكيك و كلاتو و قالت " ممم تالمو بنين عينيا دمعو " رفدت معلقة تماك و رفدت منها و قربتها ليه و قالت " حق العشرة تاني لازم ندوقك منه أنا تاني " بقا يخزر معاها مستغرب و تقدم من المعلقة و كلاه و رجع قال و هو يمسح شفايفو من الكريمة "الظاهر راكي مڨوسطة.. صباح ما كنتيش تحكي معاي هاك"
" كيش حابني نحكي مع عبد طردني من داره فنص الليل.. وكان ما ديڤ وكان إحتمال ما تشوفنيش مرة ثانية.. كلش تعلمتو إلا الدفاع عن النفس ما تعلمتوش.. ربيت لساني برك.. و درك نتا كرمتني و انا ما ننساش الخير "
" مممممم.. انا ماطردتكش دايما.. ما كنتش فوعيي وقتها.. و نتي حبيتي صباح تخرجي و انا ما نسيفش عليك تعيشي معاي "
" عندي وين نبات ما تخممش.. كريت دار و راه ننسا أصلا أنك موجود " ضحك نص ضحكة باستهزاء و قال
" شاطرة.. ما ينخافش عليك "
" كاين ولاد الحلال لي عاونوني يعطيهم الصحة.. نتا ماشي ولد الحلال الوحيد فالدنيا و لا كيش " غمزاتو و وقفت رفدت صاكها
" كي درت الخير كملو و خلص تا حق طابلة لي كنت فيها " بعتتلو بوسة فالهوا " باي زوجي العزيز " ضحك من عفستها و راح خلص و خرج ركب لوطوه و لحق بالبيس لي ركبت فيه من بعد شافها نزلت و راحت لدار كانت حابسة حداها لوطو يعرفها تاع ديڤ عقد حواجبو و هو يشوف ديڤ يعطيها المفاتح و ملف و هو قاعد على كاپو تاع لوطو و هي تتبسم معاه من بعد ودعت ديڤ لي راح ركب فلوطو و قلع رفعت المفتاح للسما فرحانة بيه و راحت دخلت للدار. رفع حاجبه و هو يشوف للدار لي ما تبانش دار تاع وحدة يادوبها خلطت لبلاد الغربة. كمل طريقه بعدها و قال "البنات خفا يبنيو حياتهم.. لقات واحد طيحه فيها بعدا و تحشيهالو"
أنت تقرأ
⚜️ أولــــــــم نـتـفـــــق؟! ⚜️ الجـزء 𝟏
General Fictionفتاة طموحها أن تعيش حياة مختلفة عما هو سائد في مجتمعها، و تتفق مع شاب له نفس الهدف على أن يتزوجا و يغادرا البلد ليعيش كل واحد منهما حياته الخاصة.. لكن للقدر رأيه ايضا.. فما الذي قد تؤول إليه هذه الإتفاقية من أحداث خطيرة و مطبات لا مخرج منها. هذا م...
