نفوتو فترة طويلة.. إيه خلونا نفوتو 5 شهور كاملين.. ميرا بدات تتجاوز خوفها كأنو ماكانش.. حتى علاقتها بديڤ ما رجعتش تقلقها.. يمكن الوقت نساها و لا يمكن تعودت على الخوف و لا حتى أنها عاملة إحتياطاتها.. لكنو هادا هو الانسان يقدر يعيش فوسط أصعب الظروف. كوما نقول دايما الفحم تحت الضغط يرجع ألماس. لكن زوج صوالح رجعو يزعجوها و ما حسبتلهمش حساب، أولهم الحمل، واه الحمل لي أمها رجعت تجبدلها عليه بزاف خاصة أنو فاتو أكثر من 7 شهور من لي تزوجو و مازال ما بان عليه خبر.. و ثاني شي كان الدار لي أجرتها. هي مناسبة للصيف أما الشتاااا.. كأنك برا لكن مع داك شي راهي تدبر أمرها لوحدها و حتى إذا يجي عندها أي حد ما دخلهش لداخل أبدا و المقصود وليد و ديڤ. وليد فهاد الفترة كان عرف بزاف صوالح على ديڤ من تحقيقات و بحثو المستمر عليه و لكن فنفس الوقت عرف أنو ليه جدور عميقة صعيب ينبش عليها و انو ماش بالساهل يقدر يخوفه و لا يهده. ديڤ كان يمشِّي فالوقت بهدوء و لأسباب غير هو لي يعلم بيها. حتى سيرجيو كان حاس أنو وراء هاد الهدوء راح تخفا عاصفة.. لكن مين لي راح يتسبب فيها.
ميرا متغطية بالقطنية تترعد و محاوطة حتى راسها و حاطة دراهمها حدها تعد فيهم. بعد ما باعت كامل ذهبها لي كان باقي ما عدا الخاتم تاع باها الفضي لي عملاتو فسلسلة حول رقبتها. و اقتصادها فالمصاريف جمعت مبلع لاباس بيه. تبسمت و هي تحط آخر ورقة و قالت " أخيرا.. مزيا كان عندي دوك الذهيبات و لا وكان زدت هنا 10 سنين.. درك لازم نشري تيكي للبلاد.. سبحان الله بلادي و خصني حق نص كلية باه نروحلها.. أما نستاهل.. دا حق لي يعفس النعمة.. بعدا المشتا كنت نضل حدا الفورنو و خاي يخلص "تقلبت بشكلها المكور هاداك على جنب و هي تحرك فرجليها داخل الغطا باه تدفا.
فاليوم الموالي ميرا لبست مليح و غطات كامل وجها مع بوني و خرجت.. الجو كان برد و الشتا طيح. حكمت طاكسي و راحت لدار وليد. دقت الباب وشوي و فتحلها وليد
وليد" واش جابك فهاد الصباح "
ميرا " عندي موضوع حابة نحكي فيه معاك " فتحلها وليد مجال باه تدخل و غلق الباب و هي نحات معطفها و قبعتها و قعدت فالكانابي أما وليد راح ناحيت كرسي مقابلها و قعد
وليد " واش من موضوع يخرجك فهاد البرد "
ميرا " شغل كاين فرق بين برا و داخل وين راني ساكنة.. مهم جيت نحكي فموضوع طول هاد 5 شهور لي فاتت و هو شاغلني "
وليد " وسم هو.. يخص ديڤ " سحبت ميرا من صاكها الدراهم و حطتهم على الطابلة و ردت بجدية " راني حابة نرجع للبلاد.. خص نلقا حجة مقنعة باه نطلقو و نشري تيكي نرجع بيه لدزاير.. كانت تجربة سيئة و تعلمت منها ما نشوفش بعيد بزاف" خزر وليد للدراهم و رجع خزر ليها بنظرة استهزاء.
وليد " ما تقوليليش الخمس شهور لي فاتو كنتي تجمعي فيهم دراهم باه تروحي.. وكان طلبتي مني نعطيك لاه هاد الشقا "
ميرا " لا شكرا.. ماحاباش نتقل كتر من هاك.. خلينا نفضيو أمور الطلاق و نروح منا فأسرع وقت "
وليد " ماكانش هادا اتفاقنا وقت جينا هنا.. هاك راح يتلزم عليا نرجع انا ثاني و أنا مانيش حاب نرجع.. غي نساي فكرة ترجعي للبلاد "
ميرا " ما جيتش نشاورك.. جيت نعلمك برك.. يلا ما طلقتنيش نرفع قضية خلع و صاي "
وليد " ما تتحداينيش فأمور من اختصاصي.. فكرة رجعة نسايها و صاي "
ميرا بعصبية " الظاهر حاب تشوفني مقتولة ياك "
وليد " وكان سمعتي كلامي و جيتي هنا ماكانش لي يمسك صدقيني "
ميرا " اكييد.. وكان غي ماجاش ديڤ ساكن مقابل ليك "
وليد "هروبك ماشي حل.. ديڤ أخطر مما تتوقعي.. إذا حاسبة فهاد شهور لي فاتو كنت ناعس على ودنيا راكي غالطة"
ميرا " ما يهمنيش ڨاع هاد شي.. لي يهمني نرجع لبلادي و ننسا أصلا بلي تزوجت بيك وجيت هنا " خزر ليها وليد بنظرة باردة و رد عليها " خرجتي ضعيفة بزاف "
ميرا " وااه.. ضعيفة بزااف و نخاف من ظلي.. فيا غي لسان طويل" وقف وليد و راح ناحيت المطبخ كب كاس ما و قالها " غدا نشريلك تيكي و نطلقك كوما حابة "
ميرا و هي توقف " أمالا اتفقنا "
وليد " و واش على اتفاقنا الأول.. كسرتيه؟ .. أنا ما نوثقش فالناس لي تكسر وعودها "
ميرا " واش من وعد تقصد "
وليد " لازم تعطيني تعويض على اتفاقنا لي كسرتيه ".
أنت تقرأ
⚜️ أولــــــــم نـتـفـــــق؟! ⚜️ الجـزء 𝟏
Ficción Generalفتاة طموحها أن تعيش حياة مختلفة عما هو سائد في مجتمعها، و تتفق مع شاب له نفس الهدف على أن يتزوجا و يغادرا البلد ليعيش كل واحد منهما حياته الخاصة.. لكن للقدر رأيه ايضا.. فما الذي قد تؤول إليه هذه الإتفاقية من أحداث خطيرة و مطبات لا مخرج منها. هذا م...
