༺༽Flashback༼༻
قاعدة ميرا على طرف فراشها ترفع شعرها كورت شوفال بعصبية وجها حمر و عاقدة حواجبها و هي تخزر للباب و صوت عياط أمها فالدار شدت بعدها تيليفونها فتحاتو و بقات تشوف فيه و هي مركزة مع واش مها قاعدة تقول و يديها يرعشو معصبة من هاد السيجي لي راه ينفتح بزاف هاد يامات
صوت أمها برا " قعدي بهاد العقلية و راح تبقاي تظفري الشيب هنا "
قاست تيليفونها على الفراش و ناضت وقفت عند الباب و قالت
" ياخي دي حياتي ولا حياتكم.. مازالني ما حابة نتزوج واش تاع سيف و لا حابين نعيش عيشتكم هادي " تجيها أمها و هي تعيط
" وينتا تحبي تتزوجي أمالا.. حتى تقطعي ضنايتك و لا كيش "
" ماحاباش نتزوج اصلا ياخي ليمتا نضل نقولهالكم "
" راكي فالعامين ملي كملتي قرايتك لالياتك راهم بولادهم.. من قبل كنا دايرين حجة القراية و درك واش من حجة "
" و الله الدراري لي غادي يجيو بعد الزواج مانيش واجدة باش نربيهم.. الزواج مسؤولية و في بالي راها فايتة عليك " بقات يماها تخزر ليها و قالت " أستغفر الله يا ربي.. نتي لي غادي تخرجيني من رحمة ربي. و زيد علاه راني نحكي.. من زمان ما طبل خطاب فباب الدار شك راكي برتي و فات الحال "
رفعت ميرا يديها للسما و قالت " الحمد لله يا رب.. الله لا يعتب خطاب لباب هاد الدار " قلعت مها النعالة و قاستها عليها و هي جرات غلقت الباب حتى خبطت النعالة فالباب
يماها " رجاي تخرجي نوريلك "
ميرا " ما نخرجش امالا "
راحت ميرا تقعد فطرف فراشها و دارت كيتمان باه ما تسمعش عياط مها كتر و راسها يغلي.. هاد السيجي راه مديرونجيها بزاف و هي مازالها حابة تعيش حياتها، نظرتها للزواج ماهاش ابدا مليحة و ماحاباش تدخل فيه اصلا.. رفدت تيليفونها و بقات دور فالفيس و راسها يدور فيه الف تساؤل زعما غادي يغصبوني نتزوج.. زعما تخلاص عليا و انا عايشة مع واحد ما نعرفوش و يمثل عليا دور الرجل لي يغير على مراته و يحرمني حتى من ابسط الأمور.. طلعت نفس طويل و هبطاته بشوي و انتبهت لستاتي كانت حاطاتو وحدة مخطوبة تشتكي من خطيبها لي يبان بخيل و ما عاطيهاش أي قيمة ضحكت على جنب و كتبتلها " و الله حد ما قالك نخطبي لواحد ما تعرفيهش هادي حياتك و راكي تقمري فيها واش حابة ناس ينصحوك نتي مولات حياتك و يلا كان قبلتي تتزوجي هاد الشخص فنتي سباب الجحيم لي راح تعيشيه فالمستقبل " راحت تحط التعليق من بعد خمت فحاجة فمسحاتو كامل و دخلت لهاداك الڨروب و كتبت
📜 سلام عليكم حبيت نشاركم قصتي و محتاجة تساعدوني من تجاربكم.. انا درك بنت ماشي تاع مسؤولية أسرة يعني زواج ماشي فراسي خلاص.. حابة نخدم و نسافر و نعيش براحتي و دراهمي يكون عندي مستقبل كوما هادوك لي نشوفوهم فالتيلي كي نكره نرفد فاليزتي و نروح لشي بلاد.. نستقر وين ما نحب ماشي ندف. ن روحي فالحياة. بصح بعد ما تخرجت و راني نحوس على خدمة باه نستقل ماديا اهلي راهم يشددولي على فكرة الزواج و خايفة يجي شي حد يخطبني و يجبروني اني نتزوجو و هاد شي راه معقدني بزاف لدرجة اني مستعدة نم... وت و ما نقبلش يصرالي هاك.. يعيشكم لي عندهم تجارب فهاد الموضوع ينصحوني كيش نعمل عيشكم 📜 ختارت فوطو تاع ممثل شباب باه تلفت الإنتباه للستاتي و حطاته و بقات تستنا اي تعليق بصح لي بداو يعلقولها كملولها على الحساب.. شي يقولها ما ينفعك غير الزواج و شي يقول المرا بلا رجل ما تسوا والو و بزااااف لي ضحكو عليها خطينا من التعليقات لي خارج الموضوع.. غلقت التيليفون و قاستو و مدت روحها على الفراش تحاول تتجاوز هاد الإحساس المزعج لي تحس بيه بعد كل مرة ينجبد هاد الموضوع ڨدامها
أنت تقرأ
⚜️ أولــــــــم نـتـفـــــق؟! ⚜️ الجـزء 𝟏
Ficción Generalفتاة طموحها أن تعيش حياة مختلفة عما هو سائد في مجتمعها، و تتفق مع شاب له نفس الهدف على أن يتزوجا و يغادرا البلد ليعيش كل واحد منهما حياته الخاصة.. لكن للقدر رأيه ايضا.. فما الذي قد تؤول إليه هذه الإتفاقية من أحداث خطيرة و مطبات لا مخرج منها. هذا م...
