فالليل قاعد وليد فكرسي فالطرف وحدو وقت تحطت يد على كتفو تلفت لقاه سمير صاحبو و عماد و من بعد قعدو حداه
سمير " كيراك حاس اليوم روحك "
وليد " مانيش حاس بروحي أصلا.. الطفلة راحت فجأة بلا رجعة.. كلش توقعتو إلا أنو يصرا فيها هاد شي.. كنت واثق من نفسي أني نقدر نحميها بصح فلتت من يديا فثواني "
عماد " المكتوب ما منو مهروب.. دي مكاتيب الله و لازم نرضاو بيها" تنهد وليد بضيق و سمير لي كان مطول نظر فصاحبو قاله بتساؤل " ماكش حاس أنو اللعبة لي بديتها بزعاقة رجعت درك كارثة.. نتا لي دخلت حياتها كي سم و دمرتها"
عماد " سمير ماش وقتها خلاص "
سمير " لا.. وقتها.. لازم يعترف بأغلاطو.. الطفلة راحت بسبابو.. هو أصلا على لول قاس الطفلة برا و خلاها تواجه الدنيا وحدها.. و الحقير هاداك هو لي كان يساعدها كيفاه حابها ما توثقش فيه.. مسكينة ما لقاتش ولد بلادها معاها لقات براني دعمها و هي أمنت أنو صديقها و دي نتيجة غرور وليد "
عماد " نقص حسك دوك يسمعوك الناس "
سمير " فاش يفيد.. طفرت درك البنت راحت بلا رجعة و الله أعلم يلا مازالها عايشة و لا مات..ت"وليد لأنو عارف روحو غالط ما رد حتى بحرف بقا يشوف ليديه لي عاصر عليهم شعور الندم متملكو و لكن في ماذا يفيد الندم بعد كل هذا.
وليد " أنا نروح درك.. مانيش قادر نقعد كتر هنا "
سمير " على الأقل كمل تمثيلك و قعد هنا بصفتك زوجها"
عماد " سمير خلاص.. بالغت بزاف.. ماكش تشوف حالته"
وليد " خليه عماد.. الظاهر هو الوحيد لي كان حاس أنو القصة راح تتحول لجحيم.. و غير هو لي كان واعي فينا.. يا ريتني ما استهنت برايو.. تصبحو بخير "
راح وليد ركب سيارتو و قلع بيها ببسرعة كبيرة الكل تلفتو لصوتها.. خلا الغبار وراه معبي الحالة. راح يجري بدون وجهة محددة و حبس في طريق فارغة و بقا يضرب فالمقود و يعيط بعصبية يفرغ طاقتو وقلبو لي حاس بيه مضيق و مكبوس عليه بجبل.. شعور مؤلم.. طول عمرو يعتبر الكل أقل منو و الكل ما يلحقوهش وانو كل قراراتو صح لكن درك عرف واش هي قيمة الناس حولو.. يمكن لأنو هاد المرة توشات قلبو و لا نقولو طعنت قلبو بسيف مسموم لأنو لي فقدو رغم نكرانو إلا أنو شخص إلتحم بروحه و اخترق خلاياه بحبه الغريب الصامت.. حب مجهول الهوية .. كيفاه باه شخص جامي جربه يقدر يتعرف عليه.. و لأنو نرجسيتو تطغى على شخصيتو يستمر فسحق مشاعرو تحت رجليه.
أنت تقرأ
⚜️ أولــــــــم نـتـفـــــق؟! ⚜️ الجـزء 𝟏
General Fictionفتاة طموحها أن تعيش حياة مختلفة عما هو سائد في مجتمعها، و تتفق مع شاب له نفس الهدف على أن يتزوجا و يغادرا البلد ليعيش كل واحد منهما حياته الخاصة.. لكن للقدر رأيه ايضا.. فما الذي قد تؤول إليه هذه الإتفاقية من أحداث خطيرة و مطبات لا مخرج منها. هذا م...
