خلونا نفوتو فترة طويلة شي شهرين هاكك فهاد الشهرين تاع الصيف و السخانة ميرا قضاتها بين كورس english و الدار و كانت تحكي معاه بليميساج مرة على مرة كي ترشقلها.
في يوم كانت قاعدة تكونيكتي كي سمعت الطبل و مها كانت دوش حطت التيليفون و راحت تفتح الباب لقات جارتهم و بنتها المتزوجة تبسمت و سلمت عليهم " سلاام.. كيراكم لاباس "
" الحمد لله بنتي و نتي كي راكي "
" الحمد لله.. دخلو.. ماما راها دوش "
ماعليش غير منا.. غي قولي لمك تجيبك و تجي نهار لاربع عرس تاع بنتي أميمة "
" آاا.. الله يسخرلها ان شاء الله "
" اميين و العقبة ليكي.. رانا نسناوكم "
" ان شاء الله.. غادي نخبر ماما "
" ايا حنا نروحو تبقاي على خير و سلمي على مك "
" يسلمك ان شاء الله "
غلقت الباب و دخلت، رجعت للبيت تكونيكتي، كي خرجت مها راحت عندها و قالتلها " جاو يعرضو للعرس تاع أميمة بنت جيرانا نهار لاربع "
" أميمة.. علاه كانت مخطوبة " ترفع يديها هاك 🤷🏻♀️ و تقول
" مانعرف.. مهم راني خبرتك قبل ما ننسا "
" شتي البزات ڨاع زوجو.. بقيتي غير نتي "
" راني راضية بهاد الشي.. بصح إذا راني متقلة عليكم قوليلي "
" تسكتي و لا راني نضربك على كبرك .. يحقلك ڨاع تحلي فمك و نتي ماشة تحضري عرس بنت بزة عليك"
" أنا كرهت و الله.. و ان شاء الله اللول لي يجي يخطب نقبل بيه غير باش نهنيكم مني أوكي.. كي خرجتي أنا نروح عند سولاف راها محتاجتني نرافقها تخرج وحد الوراق "
راحت لشومبرتها متجاهلة واش تقول مها لبست لباس صيفي فالبلو سيال يوصل تحت الركبة و اديداس بيضة مع صاكودو و كاسكات و جات خارجة صابت خوها عند الباب قال ليها
" وين راكي ماشة "
" سولاف حابة نروح معاها راها ماشة تخرج وحد الوراق "
" روحي و ما طوليش سمعتي " هزت راسها و خرجت ، غرقو عينيها فالدموع حاسة بلي راح تعالج المشكل بمشكل اكبر بصح ما ليها اي حل غير هادا « بالنسبة ليها ». عيطت لسولاف و شوي و ردت عليها
" ألو.. وي ميرا صباح الخير "
" صباح النور سولاف.. واش حبيت نقولك.. راني قلت لماما بلي راح نروح معاك تجيبي وراق.. يلا عيطتلك عرفي واش تحكي "
" أوكي.. بصح خبريني مالكي تباني مديرونجية "
" علاه فات يوم في حياتي ما ديرونجيتش فيه.. من بعد نحكو أوكي بب "
" أوكي بب.. ما تزعفيش روحك " كوبات و راحت من جهة لي بيس ركبت فالبيس و بعثت ميساج لوليد 💬 حابة نتلاقو درك .. ضروري 💬
أنت تقرأ
⚜️ أولــــــــم نـتـفـــــق؟! ⚜️ الجـزء 𝟏
Fiksi Umumفتاة طموحها أن تعيش حياة مختلفة عما هو سائد في مجتمعها، و تتفق مع شاب له نفس الهدف على أن يتزوجا و يغادرا البلد ليعيش كل واحد منهما حياته الخاصة.. لكن للقدر رأيه ايضا.. فما الذي قد تؤول إليه هذه الإتفاقية من أحداث خطيرة و مطبات لا مخرج منها. هذا م...
