بعد ساعة من وقتها ميرا حبت ترجع تحكي مع خوها اكيد بعد ما ألفت سيناريو مقنع تحكيهلو. و وليد ساعة و هو يحوس عليها. رغم لي الحديقة صغيرة لكن ناس فيها بزاف. حتى لقاها قاعدة تحت شجرة و مربعة رجليها و تخرب فتيليفونها. نفخ نفخة طويلة و تقدم منها حاط يديه على جنابو بعدها وقف على راسها و قال
" وكان إبرة وكان لقيتها " رفعت ميرا راسها لقاتو واقف عند راسها عقدت حواجبها و ردفت صاكها و ناضت رايحة بلا ما تحكي حتى شي. حكمها وليد من دراعها و قال " ويين بيها " سحبت دراعها بعصبية و ردت بنبرة غضب
" أي مكان ثاني.. مهم ما تكونش فيه نتا"
" ديري عقلك فراسك.. الموضوع ماشي لعبة "
"و لأنو ماشي لعبة خطيني.. ديڤ عمبالو تحبني و هو يحوس يأذيني باه نتا تنكسر.. هههه مسكين.. أوهامو راح دمرني بلا أي فايدة"
" هو و سيرجيو هاداك صحاب.. و أكيد راه ينتقم مع صاحبو "
" الله أعلم واش عملت نتا .. نحسدهم على صداقتهم.. ولاد بلاد وحدة و يدعمو بعضاهم.. ماشي كي شي ناس هنا.. بسبابهم ترجع فريسة"
" بلا عناد و رواحي معاي "
" باه تغت.. صبني بارح زعما على شوي كنت راح تعري.. ني"
" ههه.. وسم نعري فيك نتي .. نتي استفزيتيني البارح و رديتهالك.. لو أنك ما حكيتيش على زواجنا وكان ما صراش كامل هاد شي.. درك لازم تستعقلي أحسنلك "
"الكلام معاك عقيم و يعصبني برك" جات رايحة و هو حكمها من يدها و بدا يجر فيها و هي تتفلت من يدو حتى لحق بيها برات الحديقة و ركبها فالسيارة بالمشقة ضربت فالزياج و هو راح ركب و قلع بسيارتو و هي قالت " أوااه الظاهر لازم نولي نوزن طن.. غي لي يجي راه يديني تاع غصب "
" واش قصدك "
" ني نحكي مع روحي.. خليني نخرج "
" تروحي لدارك درك تجيبي صوالحك .. ما تعانديش "
" حاب تثبت لديڤ واش فراسو في بالي "
" طالما لي راه فراسو مأكد لازم تكوني حداي باه نحميكي "
" أنا نسكت خير.. كلامك يطلع القلب و ني راكبة فاللوطو"
" أحسن.. بسك صدعتيني".
ساد بيناتهم صمت رهيب لحد ما لحقو لحد دار ميرا.
سيرجيو فالعشية راح على رجليه ناحيت دار ميرا و دق الباب لكنها ما فتحتش بعد و هو يشوف فيها من بعيد و قال " معقول تكون غادرت بهاد السرعة. ما هي إلا لحظات و سمع صوت سيارة تحبس و ميرا تخرج منها بعصبية و هي تحكي بلغة ما يفهمهاش
ميرا " روح خطي حياتي نتا.. و شكرا على التوصيل " خرج وليد حتى هو و قالها " ما تخلينيش نعاملك بالأسلوب لي ما يعجبكش" تلفت وراها و عقد حواجبو و قال بالانجليزية " نتا واش راك تعمل هنا " راح بخطوات سريعة يهجم على سيرجيو لي حكم يد وليد لواهالو و ضربه للكتف ركعه بعدها قلبه على لرض و جا فوقه و قاله
" ما تجيش تستعرض عليا.. صدقني ما تشوفش خير " قام من عليه و ميرا تخزر ليهم مصدومة من بعد وليد وقف و قاله " ما نعتبروش إستعراض.. مي مانسمحلكمش تخلفو تاركم من شخص ثاني.. كرامتي ما تسمحليش "
سيرجيو " و لا أنا.. ماش سيرجيو لي يدخل بنت بريئة باه ينتقم من حثا. لة كيفك.. جيت نحذرها برك "
ميرا " مانيش محتاجة تحذير منك.. أخطيو حياتي كامل بيكم"
وليد " ما نتوقعش ديڤ يكون أكثر رغبة باه ينتقم منك.. أكيد هادو ألاعيب باه توقعها مي مانيش ناعس على ودنيا "
سيرجيو " هههههههه.. تتوقع ديڤ يثور هاك بدون سبب.. و أنو جا يسكن حداك بالصدفة.. ماش ديڤ لي يسكن في بلاص كيف داك...ديڤ هو حبيب أختي أولغا.. يعني هو بأذيتو لميرا راح يرد حقو بنفس أسلوبك القذ. ر" ميرا عقدت حواجبها و قالت " علاه واش عمل "
سيرجيو قرب لميرا و قال " زوجك هادا اعتدى على أختي.. اعتدى عليها و هي كانت تترجاه باه ما يقربش منها لكنو حيوان و ما سمعش ليها.. و أختي ما قدرتش تتحمل و قتلت روحها "
ميرا خزرت ليه بنظرات صدمة و وليد أطلق ضحكة ساخرة و قال "لي يسمعك يقول.. تعديت على عذراء.. صدقني ماكانتش.. ههه منطقكم غريب نتوما الأجانب"..... يتبـــــــــع..
أنت تقرأ
⚜️ أولــــــــم نـتـفـــــق؟! ⚜️ الجـزء 𝟏
قصص عامةفتاة طموحها أن تعيش حياة مختلفة عما هو سائد في مجتمعها، و تتفق مع شاب له نفس الهدف على أن يتزوجا و يغادرا البلد ليعيش كل واحد منهما حياته الخاصة.. لكن للقدر رأيه ايضا.. فما الذي قد تؤول إليه هذه الإتفاقية من أحداث خطيرة و مطبات لا مخرج منها. هذا م...
