💙الحلقة 75 🍂🍁 أولم نتفق 🍁🍂 نجلاء الجميلة 💙
لحق سيرجيو لحد دار ميرا حبس و تلفتلها كانت حاكمة نيفها بيدها لي غرقت فالدم و قال " نزلي ميرا..لازم تروحي درك للطبيب أنا عندي شي لازم نعملو و بالاك تروحي تحكي مع ديڤ.. راح نتحاسب معاه أنا.. و زيد هاد الدار بدليها بعد فترة كي تفوت هاد القضية.. بسك راهي دار ديڤ " فتحت عينيها بصدمة و قالت "كيفاه.. هادي دار ديڤ"
" واه .. حسبت قدمهالك كصديق برك بسك ما حبكش تعيشي مع الوغ.د هاداك فنفس البيت و ماحبش يحرجك و يخبرك بلي تاعو.. بصح درك مانقدرش نتيق فتصرفاتو "
" ما تحاولش تخدعني بتصرفاتك هادي " خرجت من اللوطو و زدختها و راحت تجري و تتلفت وراها خايفة يكون لاحقها سيرجيو. دخلت دار غلقت الباب و تلتخت حده حاكمة فقلبها بيد و نيفها بيد ثانية و بعدها تلفتت لجوانب البيت حاسة كأنها تحت المراقبة و قالت بينها و بين روحها
" الكل. ب هاداك عندو الحق.. خصني ما نتهورش.. ديجا رحت نديرها قد راسي اليوم .. أنا لازم نروح منا.. لا لازم نخرج من هاد البلاد أصلا.. أحسن شي نرجع لبلادي.. شهرين العسل لي عشتهم خرجو كابوس.. مانيش قادرة نستوعب واش راه يصرالي ". ضربت فجبينها و عصرت على عينيها حاسة روحها راح تخرج من الخوف و فوتت يدها بين خصلات شعرها من بعد وقفت و راحت تجر روحها لبيتها تحوس على دواها و هي فنفسها رجعت تحس بالغربة فوسط هاد الدار.
سيرجيو لي راح لدار ديڤ كي دخل و قابله بنظرات غريبة ديڤ تقدم من كانابي قعد و قال"واش.. هاد النظرات واش وراها.. خبرني قبل السكرتيرة خلصت عليها" تقدم منه سيرجيو و قال "لي سمعتو منها صح؟ بخصوص ميرا" ضحك ديڤ باستهزاء و هو يشوف ليديه من بعد رفع عينيه بنظرة شر و قال " هههههه واش يهم فالموضوع طالما النتيجة المطلوبة راح تتحقق " حنا سيرجيو تكا بيد على دراع الكانابي و باليد الزاوجة شد ديڤ من تريكوه و قال "ماشي هادا أسلوبنا ديڤ.. نتا راك تتعامل معاه بنفس الأسلوب" بعد ديڤ يد سيرجيو عليه و قال " هادا لي لازم يصير.. أنا ندوقوه من الوجع لي تجرعناه " يبعد سيرجيو و يعيط بصوت عالي " راح تكون ميرا ضحية ثانية كيف أولغا "
يوقف ديڤ و يقول " إيييه... لااازم.. لازم يحس بلي حسيتو كي ستغل حبيبتي بديك الطريقة القذرة "
" قبل ما تكون حبيبتك.. هي أختي يعني توجعت أنا كتر منك "
" ما تقولش توجعت كتر مني.. لأني أنا لي عشت معاها كتر منك..فالوقت لي.كنت نتا عايش فوسط المافيا أنا لي كنت نحميها و أنا لي كنت معاها فكل لحظة " خزر سيرجيو لديڤ مطولا بصمت لأنو كلام ديڤ كان كلو صح بعدها قال ليه بنبرة تهديد " حتى لو.. أنا ما نسمحش الجريمة نفسها تصرا مرة ثانية.. وليد نعرف كيفاه ننتقم منو بلا ما ندخل أي حد "
" سيرجيو.. الظاهر أنو المافيا حاولو يتخلصو منك لأنك بلا فايدة.. هادو عامين فاتو.. خليتو يهرب و درك كي رجع راك حاب تستنا كتر.. اما أنا من أول يوم كان عندي هدف واحد.. مادام وليد ما يعرفنيش فراح نستغل هاد الشي و ننتقم منه.. و حتى لو كان يعرفني ماراحش نهدى غير لما نشوفو راكع تحت رجلي و يطلب مني نخليها تعيش.. وقتها نق.. تلها حداه.. و نخليه يجمع قطرات دمها بيديه.. بعدها راح يق..تل نفسو بنفسو "
"وليد أصلا ماهوش مهتم بيها" بعد ديڤ و هو يضحك و رجع تلفت ليه و قال " هههههههه ميين قال.. من الأول كان بينهم مشاكل و أنا نحاول بجهدي نصلح بينهم.. و نثور غيرتو عليها و إلاا.. علاه رحت تصورت معاها و عملت كامل داك شي.. لكن لي عملتو نتا كان أقوى.. يمكن لأنو كان محتاج يخاف ماش يغير.. خطوة نشكرك عليها سيرجيو عن حق.. عملت لي جاهدت عليه من وقت جاو فأسبوع برك "
سيرجيو" ما عملتوش باه نقتلها.. انتقامي منو أكيد راح يكون قاسي أما عليه.. ماهوش من النوع لي تكسرو بنت "
ديڤ" سيرجيو.. صداقتنا ماهاش قديمة.. و رجعت صديقك بعد وفاة أولغا.. لأنها كانت تحبك وتحكي عليك بزاف.. بصح ما تتوقعش أني راح نخليك تعرقل طريقي.. صدقني نيكولاس بمجرد أنو توقعت انو يفضحني قتلتو.. ونتا ماراحش نسمحلك توقفني لمجرد أنك خوها تاع أولغا " بقا سيرجيو فاتح عينيه بصدمة و قال سيرجيو" نعتبر هادا تهديد درك؟ "
ديڤ" اعتبرو كوما تحب.. أنا ما نهددش بالكلام برك " تعلا حاجب سيرجيو و قال " صح.. راح نشوفو ديڤ.. راح نشوفو " خرج من دار ديڤ لي رجع قعد على الكانابي شابك يديه و متكي بيهم على ركابيه بعدها فوت يده على شعره بعصبية و ضرب الطاولة الزجاجية لي حد رجله و هو يعيط بغضب. أكيد نار الغضب لي راهي متملكاته وراها حب كبير حطمه وليد بنذا. لته و لكن واش صرا بالدات بين أولغا و وليد.. هاد شي لي برك ابطالنا الثلاثة لي يعرفو حكايتو.
أنت تقرأ
⚜️ أولــــــــم نـتـفـــــق؟! ⚜️ الجـزء 𝟏
Ficción Generalفتاة طموحها أن تعيش حياة مختلفة عما هو سائد في مجتمعها، و تتفق مع شاب له نفس الهدف على أن يتزوجا و يغادرا البلد ليعيش كل واحد منهما حياته الخاصة.. لكن للقدر رأيه ايضا.. فما الذي قد تؤول إليه هذه الإتفاقية من أحداث خطيرة و مطبات لا مخرج منها. هذا م...
