صباح يوم جديد بعد ما خلصت ميرا شغل الدار راحت للببجي و بقات تلعب حتى لحقها ميساج من صحبتها فيه سطر تاع الايموجي هادا 😮😱 ما داتهاش و كملت لعاب و هي تقول " صباح الخير.. هادا وين شفتي الميساج " وي كانت بعتتلها و خبرتها على الفكرة و بعتتلها ليكابتير و ليفوكال بسك ماشي حاجة لي تتصدق من مجرد كلمات. كي شافت لي ميساج غي ينبعتو تقلقت و خرجت انتح..رت بصح غير فالببجي فج..رت روحها و بعدها راحت ردت عليها
💬 غي بالميساج مالكي بعتيهم دفعة وحدة .. ما تقولي والو الفكرة مليحة بصح خص ضمان برك 💬
💬 واش المليح فيها.. راكي منيتك.. لا نتي الافلام هبلوكي 💬
💬 خير ما يجي يخطبني ولد سعدية المقمل.. مازال مه تنشر فراشه لي بايل عليه فالسطح 💬
💬 نتي خايفة غي تتزوجي لي هاكك.. غادي ربي يكتبلك واحد تحبيه و يحبك لاه تقمري بعمرك💬
💬 أنا نطول باه نحب.. و الدار راهم مقلقين 💬
💬 نتي راكي معقدة الموضوع فراسك.. هوما جامي يسيفو عليكي.. غي راكي تتخيلي 💬
💬 قرفت عيشتي واش غادي تتخرخر كتر من هاك.. عندي شوي دراهم من خلصتي لي لميتها زيد راح نطلب دراهم المهر و نديهم بيهم نستقر لهيه 💬
💬 عطيني اسم هاد العبد نحكي معاه علاه غطيتيه فليكابتير 💬
💬نخاف تتافقي معاه نتي و نقعد انا هنا.. نروح نرجع نلعب بسبابك انت.. حرت 💬 خلاتها قبل ما ترد و راحت للببجي.
فالجهة الثانية
وليد راكب يسوق فاللوطو تاعه و حداه سمير و وراهم قاعد عماد كي العادة توجور مع بعض وقتها شاف وليد فسمير و قاله بزعاقة
" الخطبة واش خصها صوالح "
تلفت سمير ليه و قاله " علاه شكون رايح يخطب "
وليد " في ميزك "
سمير يخزر ليه مصدوم " وااش "
وليد " واش لي واش "
عماد " كي تبداو توشوشو يعني الموضوع فيه إن "
سمير" سيد منيتو حاب يخطب.. ما تقولش مولات ستاتي "
وليد " وي هي "
عماد " علاه راها غايضاتك؟.. تعرفها نتا و لا كيش "
سمير " و أنا من وين نعرفها.. بصح هادا زواج ماشي خرجة "
وليد " انا قلتلها كلش بصراحة يلا قبلت داك شي يرجع شغلها "
عماد " هه قلتلها بلي نتا مافيكش الثقة "
سمير " و زيد قولها بلي نتا رخ.. يس تبيع كلش على صوالحك "
وليد " علاه غادي نتزوجو عن حب.. غادي كي نسافرو و كل واحد يعيش حياتو كوما حاب انا نتهنا من صداع والديا و هي تعيش كوما حابة سما درت فيها بليزير و زيد نخلصلها تيكي من عندي شكون كيفها "
عماد " باااا يا لطييف.. راحت فيها البنت.. هيا راها في عالم الاحلام و نتا راك خليتها تحس بلي احلامها غادي تتحقق "
وليد " انا نحللها الطريق و بالنسبة لاحلامها تحققهم و لا نن داك شي شغلها "
سمير "نتا هبلت تاع صح.. و تلاقيتها بعدا و لا غي راك تحكي"
وليد " مازال أما اكيد راح نتلاقاها "
سمير " مرات نخمم انا واحد متربي كيش صاحبت صايع كيفك "
وليد " الدراهم لي سرقتهم لجدك كي كنت صغير.. شك ربي حاسبك عليهم بيا "
يهز سمير راسو و يقول " وااه.. سور هادي هي سبة.. ربي صبرني "
عماد ضحك فالتالي و قال " تخيلتك صبارة 😂😂 🌵 " ضحك وليد و سمير قال " وين دعاويك يا الواليدة "
أنت تقرأ
⚜️ أولــــــــم نـتـفـــــق؟! ⚜️ الجـزء 𝟏
Genel Kurguفتاة طموحها أن تعيش حياة مختلفة عما هو سائد في مجتمعها، و تتفق مع شاب له نفس الهدف على أن يتزوجا و يغادرا البلد ليعيش كل واحد منهما حياته الخاصة.. لكن للقدر رأيه ايضا.. فما الذي قد تؤول إليه هذه الإتفاقية من أحداث خطيرة و مطبات لا مخرج منها. هذا م...
