وليد كي قرا الميساج راحت الضحكة من وجهه و بان عليه تقلق من ميساجها سمير خزر ليه و قال " واش غير الخير.. نقلب وجهك على غفلة " شاف وليد فيهم و رجع يضحك و قال " والو برك ما فهمتش ميساج شغل حروف مخلطين كنت نسيي نفهم.. وين كنا "
عماد " كنت تقول ما طولش الخطبة "
وليد " راها جايتني بيزار كلمة خطبة.. بصح هاديك هي.. حاب نروح خفا بعد العرس.. شغالي كامل راهم لهيك هنا ما لقيتش روحي خلاص "
سمير " و اتفقت معاها على هاد صوالح "
وليد " مازال البنت فالسبيطار.. يوم خوها ضربها حتى بقات ترعف "
عماد علا راسه من التيليفون مخلوع و قال " علاه.. لقاها معاك "
وليد " ههههه لالا.. لقاها مع وحداخر "
سمير " منيتك.. تسما طفلة خلاطة "
وليد " وين علابالي.. هي قالت بلي واحد كان يقرا معاها.. و شك ماكانتش تكذب بسك عيطتلي نتلاقاو و على غفلة قالتلي غي ما تجيش شك كي جا عندها هاداك الولد "
سمير " و نتا رحت "
وليد " وكان رحت تلاقيتها بالاك وكان أنا راني فالسبيطار معاها.. ياخي خته خبطت فاللوطو تاعي و هو حكمها من شعرها.. وكان ما دخلتش أنا كان ممكن يقتلها عادي "
عماد " عليها قبلت تتزوج بيك.. شك ماشي أول مرة هادي "
وليد " بصح كي قنعته بلي شفت خته و انا ما شفتهاش هو اقتنع و بدا يغسلها في وجها.. درك راهي فالسبيطار ما فهمتش علاه "
عماد " شك باباها ضربها "
وليد " نورمالمو باباها مي.. ت.. يوم قالت ريتني نم.. وت و نلحقه "
سمير " و الله دراما هادي ماشي واقع.. خبرني وينتا نشوفو مرات خونا.. هاد الدراما كامل راها تصرا و حنا غي نسمعو عليها برك شك راك غي تزعق بينا " يدخل وليد للستوري تاعها و يوريلهم فوطو لي حطتها تاع يدها و يقول " هاليك يدها.. باه تعرف بلي حقيقية ماشي كدبة يا الموسوس "
عماد يقرب يشوف و يقول " تبان رقيقة شوي بصح شك شابة "
سمير " صاي راح يبدا يتخيل كيش دايرة "
وليد " بنت كي البنات.. مي شابة عليهم بزيادة.. و حاسبة روحها ثاني "
عماد " لا في هادي تتوالمو.. ماكانش لي شايف روحو قدك "
يخزر وليد فالتيليفون و يقول بتلميح " بصح ما نحبش لي يشوف روحو عليا " . وليد شخص نرجسي من النوع لي يحب يكون هو الافضل يحب روحه برك و يكره انو يتعالى عليه و لا يطيح بيه اي حد كان.
ميرا بعد شوي خرجت من السبيطار و رجعت للدار مع خوها عند العتبة تاع الدار كان حابس أمين متكي على البيكي تماك كي شاف ميرا و خوها جايين عدل وقفته و قرب منهم شاف علي فيه و قال ليه " واش جابك نتا هنا "
أمين " جيت نوضح شي لي صرا الصباح.. خويا و الله غير فهمت غلط أنا ما كنتش جاي نتلاقا بيها شفتها صدفة برك كانت قاعدة وحدها و حبيت نحكي معاها عادي.. قبيل ما عرفتش واش نعمل أما كي خبرتني سولاف أنو ميرا راهي فالسبيطار تشوكيت.. قلت لازم نجي نفهمك " ميرا استغربت انو سولاف تحكي مع أمين أما علي ضحك و قال ليه " شغل جيت روطار.. حتى قراب ما نق.. تل ختي " خزرت ميرا فخوها و عاود فأمين بلا ما تحكي والو اما امين شاف فيها و قال لعلي " ما حسبتش توصل تضربها.. و الله مستعد نعمل اي شي حتى وكان نجي نخطبها سمانة جاية راني واجد " بحلقت فيه ميرا و قالت باندفاع " لاااا.. لا ماش لهاد الدرجة.. يعني خويا فهم الموضوع و تحلت و زيد ما ضربنيش غي شمس صرعتني و بدا نيفي يسيل بدم و انا ما يتخترش دمي خفا عليها رحت للسبيطار هادا ماكان " علي بقا يخزر فيها و قال ليها " نتي سكتي.. و زيد دخلي علاه راكي واقفة هنا.. تمشاي دخلي " بقات تشوف فيه تا قحر ليها و دخلت خايفة و هي تقول فخاطرها " يا ربييي... ما قصدتش باللول لي يجي يخطب أمييين "
قابلتها مها راحتلها مقلقة و قالتليها " جيتو.. طولتووو.. واش حبسلك الدم "
" واه و دارولي سيروم كي كمل جيت "
" باش نهار اخر كي نقولك ما تخرجيش فالشمس تسمعي كلامي "
" واش ندير مرات تتحتم نخرج.. نروح ننعس شوي عييت اليوم "
" ما تتعشايش "
" شبعت سقايط كي نجوع فالليل ندور نشوف وسم ناكل درك ني شبعانة تصبحو بخير "
راحت لشومبرتها غلقت الباب و بدلت قشها بعدها مدت روحها على الفراش و فتحت تيليفونها ردت على سولاف و لقات وليد عملها vu رفعت حاجبها و قالت " روح يلا زدت معاه فالهدرة و بطل " سكتت شوي و هي تخمم و بعدها قالت " وااو ميرا.. حياتك رخست. يها لهاد الدرجة.. بصح احسن من أني نتزوج واحد كوما أمين " نقلبت على ظهرها قابلت السقف و طلقت تنهيدة طويلة و قالت " زعما تهورت.. علاه ما يحقليش نعيش كوما حابة 🥺 "
أنت تقرأ
⚜️ أولــــــــم نـتـفـــــق؟! ⚜️ الجـزء 𝟏
Genel Kurguفتاة طموحها أن تعيش حياة مختلفة عما هو سائد في مجتمعها، و تتفق مع شاب له نفس الهدف على أن يتزوجا و يغادرا البلد ليعيش كل واحد منهما حياته الخاصة.. لكن للقدر رأيه ايضا.. فما الذي قد تؤول إليه هذه الإتفاقية من أحداث خطيرة و مطبات لا مخرج منها. هذا م...
