My Stalker (မင်းရဲ့အရိပ်ကလေး) Completed

အပိုင်း (၈)

My Stalker (မင်းရဲ့အရိပ်ကလေး)
အပိုင်း(၈)

ညှို့အသိအာရုံတွေပြန်ကပ်ချိန်တွင်တော့ ညှို့ကအခန်းတစ်ခုထဲရောက်နေပြီဖြစ်သည်။ တစ်ခန်းလုံးကတိတ်ဆိတ်နေတဲ့အပြင် ပိုးသတ်ဆေးနံ့တွေ ထောင်းထောင်းထနေသည်ကြောင့် ဆေးရုံမှန်းတော့သိသာ၏။

န​ဘေးနားက စားပွဲတွင် ပန်းအပြည့်ဖြင့် အလှပန်းအိုးလေးတစ်လုံးရှိကာ ညှို့ကြိုက်တတ်သည့် နီရဲရဲနှင်းဆီနီအစစ်တွေကို အစီးလိုက်ထိုးထားသည်။ ဧည့်သည်လာရင်ထိုင်အနားယူဖို့ ဆိုဖာတွေရှိသလို ရေချိုးခန်းအိမ်သာကအစ ပါသည်။ ဆေးရုံကြီးတစ်ခုခုက သီးသန့်ခန်းဖြစ်ပုံရ၏။

တိတ်ဆိတ်နေတဲ့အပြင် နိုးလာကတည်းကတစ်ယောက်မှမတွေ့သည်ကြောင့် လက်မောင်းမှာဆေးချိတ်ထားတဲ့ညှို့ ငြိမ်ငြိမ်သာလှဲနေလိုက်ရသည်။

ချပ်!...
တံခါးဖွင့်သံကြောင့် လှဲနေရင်းက ညှို့ခေါင်းလေးလည်ကာလှမ်းကြည့်မိတော့ ဝင်လာသည်က သူ။

မိုးသားလွှမ်းက လက်ထဲတွင်လည်းအထုတ်တွေနဲ့ အခန်းထဲဝင်လာတာ​ဖြစ်သည်။

"မင်း သတိရလာပြီလား? "
ညှို့ခေါင်းညိမ့်၍သာ တုံ့ပြန်လိုက်ရသည်။ လူကနုန်းချိနေတဲ့အပြင် ဗိုက်ကနာကျင်မှု့ကြောင့် စကားပင်ကောင်းကောင်းမပြောချင်။

"အစာအိမ်အချဥ်ပေါက်လို့ မင်းခွဲစိတ်မှု့တစ်ခုလုပ်ထားရတယ်။ "

ညှို့ကြောင်သွား၏။ ဒါကြောင့် ညှို့ဗိုက်ကအခုထိနာနေတာပေါ့။

"ချုပ်ရိုးအရာမထင်အောင် ကိုယ်ဆရာဝန်ကြီးတွေနဲ့ဆွေးနွေးထားပြီးပြီ။ ဒဏ်ရာကသေးသေးလေးမို့ သူတို့ပေးတဲ့ဆေးလိမ်းပြီး သူတို့ညွှန်ကြားတဲ့အတိုင်းလိုက်နာရင် 99% လောက်အထိ မှိန်သွားနိုင်တယ်တဲ့..."

သူပြောတာ ညှို့သဘောပေါက်သည်။ ညှို့က အနုပညာရှင်တစ်ယောက်မို့ ကမ်းခြေသွားတဲ့အခန်းတွေရိုက်ရတဲ့အခါ၊ အတိုအပြတ်တွေ ဘီကနီတွေဝတ်ရိုက်ရတဲ့အခါ အခုလိုအမာရွတ်နဲ့ဆိုတော့ ပြဿနာရှိမည်ကို သူကတွေးမိပုံပေါ်၏။ သူ့ပုံစံက Cool Guy type မို့ လူတစ်ဖက်သားအတွက် ခုလောက်တွေးပေးတတ်လိမ့်မည်ဟု ညှို့ထင်မထား။