جزاء وعد

الأجزاء 150

#تتمة_الجزء_696

وعد (خرجات عينيها كاتشوف حواليها جاب الله الناس كانو قلال فالصباح) : سكتي الزمر ديما مشوهاني
سارة (بطنز) : بغينا غا نطمنو عليك مال نيتك عوجة
وعد (جراتها من دراعها) : زيدي لبيرو نسدو علينا عارفة فمك فالت ضروري تفضحي الدنيا
سارة (هزات كاسها) : بلاتي ندي معايا عصيري
هزات العصير كاضحك على وعد لي غادية قدامها و جاراها بحال شي بنت صغيرة.... كاتشوف فتقاسيم وجهها وهي تقشع فمها المجروح واخا حاولات تخبيه بالعكر ولكن باين، زيد عليها واحد الطبعة تحت فكها بانت ليها واضحة مني ميلات وجهها كاتحل فالباب....
وعد (طلقات منها و مشات گلسات فوق الفوتوي) : ربطي داك اللسان شوية
سارة ( لي فيها مامهنيها) : كبيدة نسيتي واحد المصيصة ماخبيتيهاش فلتات ليك تحت فكك
خرجو عينين وعد من شدة الاحراج و هي تهز واحد الوسادة صغيرة كانت حداها و زفات عليها بيها جاتها لوجه....
وعد : الله ينعل لي ما يحشم
سارة (كاتمو_ت بالضحك) : ههههههه صافي صافي تهدني راه قلتها ليك باش تردي البال لا يشوفها شي حد آخر حمدي الله جات غا فيا انا
وعد (بعصبية) : يشوفوها الناس كاملين إلا نتي " ناضت كاتنتر" الوحلة لي كانوحل معاك مكانوحلها مع حد "خلاتها تما كاتكركر من وراها و دخلات لطواليط لي عندها فالبيرو، وقفات قدام المراية كاتشوف تحت فكها وهي تبان ليها الطبعة" تء

#يتبع
اممممم تء تيقناك 😏

🥀#جزاء_وعد 🥀
بقلم ===> Witta 🤓
#الجزء_697 (الفصل الرابع)

ساطت منرفزة وهي كاتفكر انه غايكونو حتى مالين الدار شافوها مني كانو كايفطرو ولكن شحال قدها تخبي و ضرگ وهو ماخلا فيها حتى بلاصة بيضة و صافية طبعها كلها..... تنهدات و خرجات من تما ماعندها باش تخبيها حاليا  واصلا غادي تخرج من الريسطو نيشان لدار....
وعد (لقات سارة باقة كاتكركر) : سكتيني الله يرحم باك راه عصبتيني
سارة : غا ضاحكة معاك الحب كايعجبني نشد فيك و نعصبك "عضات على فمها كاتحبس فالضحكة" ولكن اختي راه هنشرك علم الله داكشي لي مخبي كي دايرة حالتو
وعد (بعصبية) : كي الخراااااا ها كي دايرة حالتو
عصباتها حتى مابقات عارفة راسها أشنو كاتقول، من ديما سارة كاتخرجها على طوعها بهاد الفعايل و ماشي حتى تزوجات و ولات كاتشد فيها بهاد المواضيع حتى قبل الزواج ديما مناگرين بسبب الشدان ديال سارة لي فيها كلشي زوين حتى لهاد القضية حيت الى دارت هاد التصرفات مع شي حد آخر غادي يسبها و يقمعها و يدخلها سوق راسها.... ولكن وعد ماتقدرش دير هادشي حيت صاحبتها و عزيزة عليها و الأهم من هادشي بنت الناس و وقفات معاها فالقرح قبل الفرح واخا فيها هادشي عمرها خرجات اسرارها ولا دارت معاها شي غلطة.....
تنهدات و مشات حداها كاتشوف فيها جمعات الضحكة و غير گلسات حداها شدات ليها فيدها
سارة  : غير شادة فيك الزمر ولكن والله حتى فرحت مني حنيتي فداك ولد الناس و رجعات المياه لمجاريها
وعد : عبري على الفرحة بطريقة أخرى ماشي بالمسخ
سارة : وا صاحبتي راني علمتك باش تردي لبال و مايشوفهاش شي حد آخر
وعد : هاد الكاسيطة حفظتها
سارة : ههه عارفة راسي باسلة ولكن كايعجبني الحال نشوفك مزنگة ياختي دوك الحنيكات كايوليو بحال المارشميلو وأنا كانقول مال الوكيل كلاك ماكلة
وعد (شدات على راسها) : هاهي بدات تاني
سارة (حطات يدها على فمها) : صافي صافي هاني سكتت "بابتسامة نطقات مبدلة الموضوع" غدا ان شاء الله غانشدو الطريق انا و هشام و وعد
وعد : الله يوصلكم على خير تبحري ليا مع راسك "بجدية" خاصاك شي حاجة؟؟
سارة(بامتنان) : لا الحب مخاصني والو " بفرحة" اه ماقلتش ليك هشام كرا الطموبيل لي غانمشيو فيها
وعد : وايلي كرا؟؟؟" بدون تردد "علاش ماقلتيهاش ليا نخلي ليكم ديالي
سارة : ويلي على ديالك  لا لا غا خليها الكرا حسن
وعد (هزات حاجبها) : واش انا برانية؟؟؟ والى فكرتي فبغداد راه ما غادي يقول والو
سارة : عارفاكم ولاد الدار لكبير اكبيدة ولكن هشام ماغاديش يقبل "طبطبات على ركبتها" عارفاك كاتخممي فالمصاريف ولكن ماتخافيش راه ضايرة عندنا الحركة مني باعو هو وخوتو ديك الدار و الأرض  وهو منفس وحتى الخدمة زاد فيها القدام ولا كايفكر يشري طموبيل گاع
وعد ( فرحات ليهم) : ايوا الله يسر الأمور إلى مكايعرفش شي واحد كايبيع الطموبيلات نهضر ليه مع يوسف يشوف ليه صاحبو لي فالرباط
سارة : هذاك لي شريتي من عندو نتي؟؟
وعد : اه هذاك راه عندو البونوكازيون و عندو الجديد
سارة : هاد الساعة غناخدو غير البونوكازيون حتى يسر ربي فالجديد، صافي حتى تقوليها ليه
وعد : داكوغ
كملو جماعتهم فمواضيع عديدة حتى صونا لسارة التليفون من طرف راجلها لي جا ليها تما بالطموبيل لي كرا، خرجات عندو ركبات معاه فرحانة مخلية وعد متبعاها بعينيها بابتسامة حتى غبرات عاد مشات ركبات فطموبيلتها و نطالقات فاتجاه الدار.... بعد مسافة الطريق وصلات ولقات الباب الكبير ديجا محلول، دخلات بطموبيلتها فاتجاه الباركينغ وهي تقشع الطموبيلات لي مصافين تما ديال الفريع وحدة تنسيك فلاخرة و كانو حداهم عيالات بزاف مع ولادهم صغار و بناتهم وحتى العيالات الكبار كانو تما..... قشعات رجاء و رنا و فاظمة معاهم تما كايتسالمو وهي تنزل حتى هي بابتسامة بشوشة مقربة عندهم....
رجاء (شافت جهة وعد) : هانتوما جيتو مع مرات خويا نيشان
دارت وحدة من العيالات الكبار شافت فوعد بابتسامة وهي تنطق بدارجة مهرسة
المرا : هادي مراتو ديال بغداد تبارك الله ما شاء الله "قربات عندها سلمات عليها و عنقاتها" انا مراتو ديال عمو ابنتي
وعد : متشرفين اخالتي

#يتبع
هاد الدارجة العوجة كناخدها ليكم من عند واحد عمتي كاتعدى على العربية 😂😂😂

#تتمة_الجزء_697

بدات رجاء كاتعرفها عليهم وحدة وحدة وهي كادور وتسلم عليهم، البعض منهم حضر لعرسها و عقلات عليه و كاينين لي ماعقلاتش عليهم ومنهم لي ماحضروش لعرسها حيت عايشين خارج المغرب و مالقاو كي يديرو يجيو....
دخلو كاملين لداخل وفجأة ولا الراواج فالدار ايناس كانت لداخل غير شافت دراري و بنات صغار قدها و كبر منها شوية و هي تنشط، ماقاداها فرحة حيت غاتلقى معامن تلعب.... عيطات ليها وعد عرفاتها عليهم وحتى هي حماقو عليها كاتبان كيوت بدوك العوينات الكبار بحال اللوزة.. ماجات فين دوز ربع ساعة حتى كانت تداخلات مع الأطفال لي فسنها و بدات كاتلعب معاهم عاد رجعات الفرحة فوجهها بعدما كانت فقداتها بسبب خصام بغداد ....
دازت شي ساعة وهما مجموعين  فالصالون كاملين شي مجمع مع شي وهي تنوض وعد بعدما ستأذنات منهم باش تمشي تبدل حوايجها وهي تبعها فاظمة و رجاء.....
فاظمة : وعد ستنى ابنتي ستنى
وعد (وقفات و دارت عندها) : نعام اعمتي
فاظمة : بغيت نقوليك تعيطي لريسطورة ديالك
رجاء (وقفات وراها مقاطعاها) : مكاين لاش اعمتي راه كلشي واجد مابقيناش غادي نديرو پسطيلة لعشا بغداد وصى على حولي وصل فالصباح مني يقرب الوقت غادي يحطوه يتشوا باش ناكلوه سخون
فاظمة : بغداد اينو ديما ضارب الحساب لكلشي
على ذكر اسمو  تسمعات تحنحينتو وهو داخل مع الباب، شافهم واقفين تما وهو يقرب عندهم
بغداد : السلام عليكم
جاوبوه بثلاثة : وعليكم السلام
فاظمة : تبارك الله عليك امي اينو " أولدي"
رجاء (شافت خوها مافهم والو) : كاتهضر على العشا لي ضربتي حسابو لبارح
بغداد (حرك ليها راسو) : وجد الغدا؟؟
فاظمة : واه يوجذ كنت انا بغيت نقول لوعد توصي لينا پسطيلة من الريسطورة ديالها ولكن قالو ليا راك ضربتي لحساب لكلشي  "شافت فوعد بابتسامة" غدا ان شاء الله ندوقو البسطيلة من يديك
ياله غادي تنطق وعد و تقول ليها مرحبا وهو يقاطعها صوت بغداد الجدي
بغداد : حتى نوصي ليكم عليها وعد ماغاديش تكون غدا
رجاء (باستغراب) : علاش؟؟؟
بغداد(نطق قبل مايتحرك من حداهم باش يطلع الفوق) : غانمشيو لفيرمة ان شاء الله

#بونوي 😴😴
فنظركم علاش بغا يمشي لفيرمة 👀