جزاء وعد

الأجزاء 177

#تتمة_الجزء_794

خرج من الدوش كايمسح فوجهو وهو يلمحها واقفة بحال الجماد كاتشوف فالصورة، كان توقع ان ردة فعلها غادي تكون هكا نهار تشوفها اول مرة ولكن ماعلقش على الموضوع... توجه لتجاكيطتو هز گارو و بريكة و مشى لشرجم حلو و وقف قدامو كايتكيف على الريق.... صوت الشرجم كايتحل فيق رجاء من صدمتها شافت جيهتو و رجعات كاتشوف فالصورة و قربات منها كاتلمسها بيدها بحالا باغة تأكد بلي هاديك تصويرتها و حاطها قدام ناموسيتو باش يبقى يشوف فيها حتى ينعس.... عمرو عينيها بالدموع متأثرة من الموقف و بدون ما تفكر جوج مرات قربات عندو كاتزرب و عنقاتو من اللور دافنة راسها وسط ظهرو و نطقات بصوت باكي
رجاء : سمح ليا
هز راسو لسما كايبخ الدخان و طلع تنهيدة من أعماقو عاد نزل راسو ليدها لقى الصباغة ممسوحة و دايرة پونسمون على ظهر يدها وهو يتفكر مني كان مزير ليها على يديها وهي باغة تفك منو حتى جرحاتها مع الحيط.... دابا عاد بدا كايتفكر الأحداث ديال لبارح حيت كان مرفوع فهاديك الوقت ماقادر يستوعب حتى حاجة، زير على عينيه و طفى داك لگارو و دار عندها شد يدها بين يديه
حمزة (بصوت مدعدع بالگارو) : كاضرك ؟؟
رجاء (نزلات دمعتها شدات فيدو لي شخشخ لبارح) : هادي هي لي كاضرني " هزات فيه عينيها كادمع" كاضرني فقلبي "شدات وجهو بين يديها" مانقدرش احمزة  نشوفك مرفوع بالاعصاب و كاتآذي راسك "بشهقة" انا كانعتارف غلطت و مكانش عليا....
حمزة (قاطعها حاط صبعو على فمها) : ششششش ماتجبديش ليا داك الموضوع " نزل ليها يديها من وجهو" حاليا مانقدرش نتناقش فيه
رجاء ( حدرات راسها ونطقات بصوت منغنغ) : واخا لي بغيتي
حمزة (هز ليها راسها و مسح ليها دموعها) : براكة من البكا
رجاء ( تكات على صدرو باغة غير الفرصة لي تقرب فيها منو و تحاول تمتص غضبو) : جوجو صبحات مسكينة كاتبكي مخلوعة عليك" هزات فيه عينها" وانا دوزت ليلتي معذبة و انا بعيدة عليك
طبطب على ظهرها بالشوية ماقادرش يقمعها و فنفس الوقت ماعندوش الخاطر يبادلها نفس الشيء ولا يهضر معاها كيف موالف حيت باقي معصب و مابغاتش تسرط ليه انها خبات عليه....
حمزة  : نلبس و نمشيو
رجاء ( قلبها تعصر مني عرفاتو مازال هاز فخاطرو منها ولكن مابغاتش تضغط عليه أكثر) : احم غادي يجي عندنا بغداد، دويت معاه لبارح و قال ليا مني نفيق غانجي عندكم لدار
حمزة (كايجبد حوايجو) : مرحبا بيه

#يتبع

🥀#جزاء_وعد 🥀
بقلم ===> Witta 🤓
#الجزء_795 (الفصل الرابع)

بغداد صبح مبحبح ليه الصوت و صدرو مدعدع، ايناس غير سمعات صوتو عرفاتو مريض وهي تگلس على ركابيها فوق الناموسية و بدات كاتقيس ليه فراسو بيديها الصغار، خايفة عليه من نيتها
ايناس : وااش فيك السخانة
بغداد ( شد يدها باسها ونطق بزز حاط يدو على حلقو) : لا ابنتي مافياش السخانة
ايناس ( حطات يدها على يدو لي فوق حلقو) : ضاغك هنا
بغداد : امممم تما
ايناس : ضغبك البغد خاصك تبقى تلبس مزيان باش ماتمغضش
بغداد (ماكرهش يشدها ياكلها) : سمعا وطاعة "جرها عنقها" واشنو تاني
ايناس : و خاصك تشغب السيغو و نديغو ليك حتى الحامض و العسل
بغداد (شاد ليها الخاطر) : نتي لي غاتوجديه ليا
ايناس : نوجدوه انا و ماما
هما مجمعين و وعد حداهم بدات كاتضربها الفيقة، وصلها صوت بنتها وهي تحل عينيها بالشوية و بغات دور عندهم ولكن غير تحركات حسات بالتقية طالعة مع حلقها وهي ترمي الغطا بالزربة و ناضت كاطير لطواليط خلاتهم غير كايشوفو ماعرفو باش تبلاو.....
ناض بغداد تبعها و ايناس من وراه لاصقة فجلايلو، وكيف العادة بقى جامع ليها شعرها و شاد ليها راسها حتى فرغات معدتها و نوضها ل لاڤابو غسل ليها فمها و وجهها.... تكات على كتفو كاترد النفس عاد دارو جهة الباب لقاو ايناس مدلية شفايفها و كاتشوف فيهم...
وعد : حبيبة ديالي مالكي
ايناس ( بصوت باكي) : حتى نتي مغيضة بابا مغيض و نتي مغيضة بجوج مغاض
وعد (قربات عندها و نزلات على ركابيها معنقاها) :لا ابنتي مامريضاش غير كليت واحد الحاجة خايبة و ضراتني فكريشتي
ايناس( ببراءة) : كليتي شيپس
وعد : اه هي لي كليت لبارح
ايناس : ماتبقايش تاكليها خايبة انا من نهاغ ضغاتني فالكغيشة مابقيت كناكلها واخا كاتبغي صاحبتي دوقني منها فليكول
وعد (باستها فراسها) : يخليلي لي كاتنصح ماماها
بغداد (دوز على راس ايناس بحنان) : الله يرضي عليك
وعد (ناضت وقفات و شافت فيه) : صوتك مشى ابغداد ندير ليك لحامض
ايناس : اه اه غانديغوه ليه قلتها ليه قبيلة
بغداد (بتاسم) : ديرو هاد الحامض نشوف
وعد : واش مروح؟؟
بغداد : لا غير حلقي لي ضارني
خرجات هي و ايناس من الطواليط و دخل ليها هو تكا على لاڤابو حاس براسو كايزدح و حلقو بحالا تقامشو فيه المشاش.... تجمع عليه المرض و الأعصاب لي نعس بيهم و مع حل عينيه تاني تفكر أشنو طرا ولكن تمالك نفسو و تعامل عادي قدام مراتو و بنتو مخلي اعصابو لنفسو....
قضا حاجتو و غسل وجهو و خرج من الطواليط لقى وعد قادات لفراش، بدل حوايجو و نزل لتحت لقى الهاشمية كاتحط الفطور و ايناس كادور معاها و وعد مكايناش.... عرفها غاتكون كاتجمع الروينة لي خلاو فالكيوسك، گلس فراس الطبلة حتى تمو جايين هازين كاس ديال الحامض فالصينية بحالا هازين عروسة فالعمارية... حطاتو وعد فوق الطبلة و حطات يدها على كتفو
وعد : بالشفاء ان شاء الله
بغداد : امين
مشات وعد تكمل أشنو بقى ليها و ايناس گالسة حداه مع بدا كايحرك فداك الحامض بالمعيلقة وهي تنطق
ايناس ( حاسة براسها دارت إنجاز) : ماما عصغات الحامض وانا دغت ليك فيه عسيلة "شافتو جغم منو وهي تهز يديها باش تدعي" ياااااربي تشااافي ليا بابا
بغداد  : اللهم امين "قرصها من خدها مبتسم" مرضية باباها نتي
بقات حاضياه حتى شرب داك الحامض ماجات فين ترجع وعد حتى كان كملو و غير بداو الفطور بدات ايناس كاتمد ليه داكشي لي بعيد عليه و فالاخير هزات التوست دهنات فيه الجبن و حطاتو ليه قدامو خلاتهم غير كايشوفو....
وعد (خربقات ليها شعرها) : الحنينة ديالي
بغداد (بتاسم و قرب باس ليها راسها) : ماكذبوش لي قالو سعدات لي عندو البنات
كملو داك الفطور و ناضت وعد تلبس بنتها باش يمشيو، بغداد شرب كينة ديال الراس و بقى لتحت كايتسناهم حيت لبس عاد نزل يفطر... بعد مدة كانو راكبين فالطموبيل و بغداد واقف حدا الكوفر  كايحط فيه الصندوق ديال الليمون لي لقطوه لوعد من تما باش تديه معاها، و بعض الأنواع من الفواكه الأخرى مازالة طرية و ريحتها فواحة.... سد الكوفر و ركب فبلاصتو دار السمطة و قلع من تما
وعد (شافت فيه) : غانمشيو نيشان عند رجاء
بغداد : غادي نوصلكم عاد غانمشي
وعد : غير دينا معاك
بغداد ( شاف فيها و نطق بجدية) : فين غادي نديك وانا باغي نهضر معانا هي و راجلها، من بعد و سيري شوفيها ولا هي تجي
وعد (حطات يدها على يدو) : حاول تكالميها شوية راه دوزات ليلة صعيبة بزاف
بغداد ( تنهد) : يكون خير ان شاء الله
مسافة الطريق كانو وصلو للڤيلا وقف بيهم فالگاراج وهي تشوف فيه وعد كايبان ليها عيان بزاف ماكرهاتش يطلع يرتاح فبيتو ولكن عارفة راسها واخا تقولها ليه ماغاديش يبغي...
وعد :رد البال لراسك " بتساؤل" ياك ماحاسش بالسخانة
بغداد : لا
ايناس ( نقزات من اللور تخشات بيناتهم و نطقات كي الحزقة) : إلى جاتو السخانة اماما ديغي ليه قويلبات