جزاء وعد

الأجزاء 149

#تتمة_الجزء_693

گلسات معاهم مشاركين أطراف الحديث و طلبات من وحدة من الخدامات تجيب ليها عصير ترد بيه الروح بينما تحط الغدا حيت مابقى ليه والو.... فهاد الأثناء نزل بغداد ريحتو سابقاه و وجهو منور گلس حدا وعد مفرق رجليه و حط يدو فوق المخدة وراها....
بغداد (قرب عند ودنها شوية و نطق) : كليتي شي حاجة؟؟
وعد(دارت شافت فيه) : لا ولكن قلت لبنات يجيبو ليا عصير انا وياك
بغداد : الله يرضي عليك
فاظمة (خاطباتو بالريفية) : بغداد اينو "شاف فيها" ثيوشى اظاوظن فاميليا ياك غاش رخبا "غدا غادي يوصلو العائلة ياك فخبارك"
بغداد ( حرك راسو) : واه ينايث عزيزي " اه قالها ليا عمي"
رجاء (بفرحة) : توحشتهم غادي يعمرو علينا الدار.... قالت ليا نورة غادي يجيو غير العيالات دابا حتى يلحقو عليهم رجالهم
رنا : خلاوهم رجالهم يتحركوا بوحدهم؟؟
جهاد : مكايخليوهمش يمشيو عند من والا عارفينهم عندمن جايين 
رجاء  : جايين قالك بغاو يدوزو معايا هاد الفترة لي بقات للعرس 
رنا (بابتسامة) : الله يجيبهم على خير
رجاء (شافت فوعد) : غدا تعرفي على بنات العائلة منهم جاو لعرسك ولكن ماتعرفتيش عليهم مزيان ومنهم ماقدروش يجيو كانو برا و مالقاو كيفاش يديرو هاديك الوقت
وعد :مرحبا بيهم كاملين
هذا كان موضوعهم بعدما ناضو من الصالون لطبلة الغداء، مجمعين شكون غادي يجي و شكون لا وهنا هنية بدات حتى هي كاتقول ليهم شكون غادي يجي من جهتها هي....
مع كملو الغدا ناض بغداد لبيروه و عاودو نتاقلو لصالون بقات رجاء و رنا هما اللخرين كايوشوشو
رنا (عضات على شفايفها) :شفتي الفم ديال وعد
رجاء (كادور فراسها) : شفتو شفتو مني نزلات قشعتو و ميكت لا عليه لا على المشية
رنا (شدات الضحكة بزز) : المشية خلاص
رجاء(شافت فيها) : عنداك تحرجيها ميكي راني شفتها دور و تقيس ففمها بلا هواها و كاتشوف فينا واش عقنا بيها...
رنا : لا لا ما غادي نقول والو براكة سارة مني غادي تشوفها غادي ضرب ليها الطر ههههه
رجاء : غير سكتي موصيبة
رنا : ايوا المهم لوسي مسكين جاه الفرج و خوا قلبو على مراتو ههههه
رجاء : الله يمسخك
دخلو گلسو جامعين الضحكة و مطمرين وهي توقف ايناس على رنا
ايناس : فيناهو عمو جهاد
رنا : باقي گالس عند الطبلة كايهضر فالتليفون احبيبة
ايناس : شكغا "خرجات من الصالون كاطير لقاتو واقف كايدير التليفون فجيبو" عمو جهاد
جهاد (بابتسامة) : الزين ديال عمو جهاد
ايناس (دارت صبعها ففمها) : بغيت نهضغ معاك و نطلبك طليبة
جهاد (رجع گلس و جرها وقفها بين رجليه) :  آمري
ايناس (حدرات راسها) : دابا انا بابا مخاصم معايا اليوم طخوا جوغ مابغاش يهضغ معايا" دلات شفايفها " قلت لماما تهضغ معاه باش نتصالحو و بغيتك حتى نتا تهضغ معاه
جهاد ( باسها فراسها) : ماتقلقيش ابنتي باباك غايكون تقلق على شي تصرف درتيه و مابغاكش تعاوديه ياك "حركات راسها بالايجاب" ونتي غادي تبقاي تسمعي الهضرة إلى رجع هضر معاك "حركات راسها تاني " ايوا صافي إلى هكا نمشي نهضر معاه دابا نيت
ايناس (تلاحت عليه بتعنيقة) : شكغا بزاف يا احسن عمو فالعالم
عنقها حتى هو و خربق ليها شعرها و ناض قاصد البيرو ديال بغداد عارف ايناس فيها الهضرة و بغداد باغي يربيها بهاد الطريقة ولكن ماعرفش الموضوع لي خلاه يعاقبها هكا.... دق لباب مع سمع صوت بغداد قال "دخل" وهو يحل الباب و دخل، لقاه خدام فالپيسي و مدور بيه الوراق  و حاط حداه كاس ديال القهوة...
جهاد : غادي نوقفك على خدمتك شوية "هز يديه" واعدت ايناس نهضر معاك دابا "قرب وقف قدام البيرو و بقى بغداد ساكت كايتسناه يكمل" جات عندي قالت ليا بابا مابغاش يهضر معايا هههه انا ماعرفتهاش أشنو دارت ولكن بقات فيا اصاحبي باينة فيها ندمانة
بغداد ( بجدية) :مزيان مني جبدتي هاد الموضوع " بحجبان معقودين شير ليه لكرسي" گلس گلس