LA MORENA🇲🇦🔞لامورينــــــــا🇲🇽🔞

19

"لامـوريــنـــــــــــا🇲🇽🇲🇦"
"𝓛𝓪 𝓶𝓸𝓻𝓮𝓷𝓪🇲🇦🇲🇽"

٠ بقلم : ميرا 💆🏻‍♀️
٠ الجزء : 19

"فالعشية و بالضبط حدا الباب الكلية.."

بعدما داز الوقت و سالاو ، كانت خارجة معنقة كتوبتها و حانية راسها ، ايديها غير بوحدهم كيترعدو و شفايفها كيرجفو ، غير بمجرد أنها تشوف الناس حداها كتوتر و لي دازت من حداه كيبقى ايتعجب ليها ، كاين لي مستغرب ، كاين لي لقاها سبة باش ايجبد الهدرة و النميمة و كاين لي واصلة بيه ايضحك عليها فوجهها !

كان حتى هو خارج موراها و  مركز معاها كيف خايفة و كترعد غير بوحدها ، يالاه خفف من خطاويه باش ايقرب منها و هي طيح كتوبتها ، فديك اللحظة الهدرة عاد مازادت كثرات و هو عقد حواجبو و لي داز من حداه كيلقاه داوي "مالها واش مريضة ؟" ؛ "كيقولو مريضة بالتوحد" ؛ "مسكينة بقات فيا ! " ؛ "باينا كدير هدشي بلعاني باش تجذب الناس ليها"..
و ما أكثرهم ، الهدرة غير مشايرة و اللسان منشار، كل و كيف كينويها ، كاين لي كتبقا فيه و كاين لي مكيحملهاش و غاير منها غير بسبب أنها داخلة سوق راسها..

بالخف تحنى لعندها و بدا كيجمع معاها كتوبتها ، هي لي النفس تحبسات فيها و الدموع تحجرو فعينيها مارضاتهاش لراسها..

"ايسطاس بيان ؟؟" {واش نتي بيخير}

علات فيه عينيها الدامعين و بالزربة خطفات منو كتوبتها و مشات مكملة طريقها ، خلاتو كيمسح على راسو و ايحاول ايعرف اش غيدير معاها ، من ديما كيحاول ايجبد معاها لهدرة و هي غير نافراه ، هو لي كاع البنات ديال الكلية طايحين فيه و ماحاملينهاش غير على ود الاهتمام لي عاطيها هي من دونهم..

دور وجهو خنزر فيهم وحد وحد حتى سكتو عاد تبعها ، لقاها يالاه غتهبط من الدروج ، حانية راسها و شعرها مجموع على وجهها الشئ لي مامخليش ملامحها ايبانو..

"صباح..بلاتي..صباح !"

وقفات و علات فيه راسها شوية بالشوية حتى وضاحو ملامحها الهادئين ، ميل راسو كيحقق فيها ، كانو أثار الدموع واضحين على وجهها ، هزات فيه عويناتها العسليين لي زادو تفتحو بسبب إحمرارهم بالبكاء ، و تما عاد قدرات تشوفو ، كان نفسو داك الشاب الوسيم لي من ديما كيتبعها و ايوقف حداها فأي فرصة جاتو ، شاب طويل كيتميز بقوام جذاب ، فحال أي دري زوين و بوكوص كان هو الأكثر شعبية و مركز الاهتمام فهاد الكلية ، بأخلاقو ، شخصيتو الرجولية المختلفة ، جانبو الفكاهي ، و الأهم وسامتو لي كتخلي كاع المراهقات ايعتابروه فتى أحلامهم..

"أنا أليكس..عرفتيني ؟"

صباح : (هبطات عينيها) ش شكرا..

أليكس : (حس بيها تحرجات) ماشي مشكل

بلعات ريقها و يالاه بغات تمشي حتى وقفها بهدرتو..

أليكس : بالمناسبة..تقبلي غدا تشربي معايا كافي ؟ فالكافيطيريا لي هنا ؟!"

ضهشرها لدرجة جمدات ، يلاه بغات تجاوبو و هي تبانليها "راضية" من بعيد ، متكية بايديها على موطور و كتشوفيها ببرود ، شوفاتها خلاو قلبها ايخفق بالجهد و لون ايتخطف منها الشئ لي لاحظو أليكس و دفعو اينطق باستفسار..

أليكس : صباح (كيشوفيها كيف مبلوكيا قدامها) مالك ؟؟

#يتبع..🔥