LA MORENA🇲🇦🔞لامورينــــــــا🇲🇽🔞

15

"لامـوريــنـــــــــــا🇲🇽🇲🇦"
"𝓛𝓪 𝓶𝓸𝓻𝓮𝓷𝓪🇲🇦🇲🇽"

٠ بقلم : ميرا 💆🏻‍♀️
٠ الجزء : 15

"تمشي الرياح..بما لا تشتهي السفن..!"

ماشي ديما لي بغيناها هي لي كتكون ، ماشي ديما كنوصلو لدكشي لي بغينا ، و ماشي ديما كنعيشو الحياة لي تمنيناها ، كاين وحد العامل سميتو "المكتاب" كيخرج ليك من وحد القنت غابر ، كيمشيك فينما بغا ، و كيشطحك على كانتو..!

غير خرجات من عند متولي ركبات فلوطو و ديمارات عفطة وحدة حتى وصلات لدار ، حلات الباب و دخلات كتخطوي بالشوية ، كانت الدار مظلمة الشي لي كيدل على أن ختها ناعسة ، دفعات باب بيتها و لاحت عينيها ، لقاتها فعلا ناعسة و شعرها مليوح على المخدة ، تأكدات أنها مغطية مزيان عاد ردات عليها الباب و خرجات برا ، جرات كرسي جلسات فيه و تنهدات كتشوف فالسماء..

ماكان حتى وحد من غيرها ، و ماكانت حتى حاجة لي تونسها ، كانت بوحدها ، ساكتة و مطاكية على الريح و البرد بلا شكا و بلاما ايكون عندها الحق أنها تعيا ، واش هادي كانت شي حاجة جديدة عليها ؟ لا..!

سواد عينيها مقابل مع سواد الليل و عقلها خدام كيفكر ، ساعة ، جوج ، ثلاثة ، حتى قرب ايطلع النهار و هي مازال جالسة على نفس وضعيتها ، مشابكة ايديها و ساهية قدامها ، ماحسات على راسها حتى سمعات الصونيط ديال ساعة ، دوزات ايديها على وجهها لي برد و وقفات كتشوف تيليفونها لقاتها ستة ديال الصباح فالبلاصة دخلات لبيتها كتبدل حوايجها ، لبسات قبية سخونة فالأسود مع دجينز و سبرديلة ، قربات من المراية كتشوف فوجهها لي بان فيه التعب ، ماطولاتش الشوفة و ماهتاماتش ، حدها غسلاتو و خرجات لقات ختها يالاه خارجة من الحمام كتمسح فوجهها..

صباح : (بفرحة) رازية

راضية (تبسمات بالجنب كتشوف فيها) : صباح الخير

صباح اكتافات أنها تبادلها الابتسامة ، قليلة الكلام و حشومية ، خفيفة كيف نسمة الصباح و مقبولة من عند العالي..

راضية : غنوجد ليك الفطور و نتي سيري تلبسي باش نوصلك

صباح وسعات عينيها و نطقات بالاسبانية نظرا أنها مكتقنش العربية..

صباح : نتي لي..لي غتوصليني ليوم ؟

راضية (جاوباتها من الكوزينة): سي

ضحكات بحماس و دخلات لبيتها تلبس أما راضية فبقات واقفة على الحليب حتى طلع عاد طفات البوطة و دارتو فالبلاطو مع الشكلاط و طوسط حطاتو فالطبلة دالصالون و وقفات كتشوف حتى خرجات صباح كتخشي شعرها فالقب ، نيفها حمر بالبرد ديال الصباح و مرة مرة كتحك عينيها لي حتى هما بداو كيحمارو بسبب حاساسيتها من البرد..

راضية (ساست ايديها و شيرات ليها) : جلسي تفطري

صباح (رمشات قدامها باستغراب) : و نتي ؟

هزات فيها عينيها بالخف و قلبات الدورة كتجبد فالكارو و بريكة..

راضية : فطرت..